::: យុទ្ធនាការអប់រំផ្សព្វផ្សាយច្បាប់ ស្តីពីចរាចរណ៍ផ្លូវគោក ដល់អ្នកប្រើប្រាស់ផ្លូវទាំងអស់ ពិសេសអ្នកប្រើប្រាស់ទោចក្រយានយន្ត ឱ្យយកចិត្តទុកដាក់ខ្ពស់ក្នុងការបើកបរ និងចូលរួមគោរពច្បាប់ស្តីពីចរាចរណ៍ផ្លូវគោកទាំងអស់គ្នា នៅថ្ងៃទី១៤ ខែមករា ឆ្នាំ២០២១ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ. បានអញ្ជើញជាអធិបតីភាព ក្នុងពិធីយុទ្ធនាការអប់រំផ្សព្វផ្សាយច្បាប់ ស្តីពីចរាចរណ៍ផ្លូវគោក ដែលប្រារព្ធឡើងនៅសាលាខេត្តកំពង់ធំ ដោយមានការចូលរួមពីគ្រប់អជ្ញាធរពាក់ព័ន្ធ និងបងប្អូនប្រជាពលរដ្ឋដែលជាអ្នកប្រើប្រាស់ផ្លូវ សរុបចំនួន ១៩៥នាក់។ យុទ្ធនាការនេះ រៀបចំឡើងក្នុងគោលបំណងដើម្បីដាស់តឿនដល់អ្នកប្រើប្រាស់ផ្លូវទាំងអស់ ពិសេសអ្នកប្រើប្រាស់ទោចក្រយានយន្ត ត្រូវមានស្មារតីយកចិត្តទុកដាក់ខ្ពស់ គោរពច្បាប់ស្តីពីចរាចរណ៍ផ្លូវគោក ពេលបើកបរ និងអ្នកប្រើប្រាស់រថយន្តគ្រប់ប្រភេទ ត្រូវពិនិត្យសុវត្ថិភាពលក្ខណៈបច្ចេកទេសយានយន្តមុនពេលចេញដំណើរ ដើម្បីការពារសុវត្ថិភាពរបស់ខ្លួនដើម្បីទប់ស្កាត់ កាត់បន្ថយចំនួនគ្រោះថ្នាក់ នៅកម្រិតទាបបំផុត។