(ភ្នំពេញ)៖ ​ម្ចាស់​គម្រោង​សាងសង់​ព្រលានយន្តហោះ​អន្តជាតិ​ភ្នំពេញ​ថ្មី គឺក្រុមហ៊ុន OCIC បានប្រកាសថា ក្នុង​ឆ្នាំ​២០២១នេះ ខ្លួន​នឹង​ចាប់ផ្តើម​សាងសង់​ស្ពាន​អាកាស​មួយ​ចេញពី​ភ្នំពេញ​តភ្ជាប់​ទៅកាន់​ព្រលានយន្តហោះ​អន្តរជាតិ​ថ្មី ក្រោម​តម្លៃ​វិនិយោគ​ប្រហែល ៤០០លាន​ដុល្លារ​។ អគ្គនាយក​ក្រុមហ៊ុន OCIC លោកឧកញ៉ា ពុង ឃាវសែ បាន​ប្រាប់​ទស្សនាវដ្តី Construction & Property កាលពីចុងឆ្នាំ២០២០ថា ក្រុមហ៊ុន OCIC មាន​ផែនការ​នឹង​សាងសង់​ស្ពាន​អាកាស​មួយ​ខ្សែ​ប្រវែង ២១,៥គីឡូម៉ែត្រ​ ចេញ​ពី​ភ្នំពេញ​ឆ្ពោះទៅ​ព្រលានយន្តហោះ​អន្តរជាតិ​ភ្នំពេញ​ថ្មី​ក្នុង​ឆ្នាំ​២០២១ ដោយ​គ្រោង​នឹង​ចំណាយ​ប្រាក់​ប្រហែល ៤០០លាន​ដុល្លារ​។ លោកឧកញ៉ាបានបញ្ជាក់ថា ការសាងសង់​ផ្លូវអាកាស​នេះ​នឹង​ធ្វើ​ឡើងជា ២ដំណាក់កាល​ដោយ​ដំណាក់កាល​ទី​១ មាន​ប្រវែង​ជាង ១០គីឡូម៉ែត្រ​ ចេញពី​ផ្លូវ​លេខ ២៧១ (​ក្បែរ​ក្បាលថ្នល់​) ឆ្ពោះទៅ​ផ្លូវជាតិ​លេខ២ និង​ដំណាក់កាល​ទី​២ មាន​ប្រវែង​ជាង ១១គីឡូម៉ែត្រ ចេញពី​ផ្លូវជាតិ​លេខ២ ឆ្ពោះ​ទៅដល់​ព្រលាន​យន្តហោះ​អន្តរ​ជាតិ​ភ្នំពេញ​ថ្មី ដែល​ស្ថិត​ក្នុងស្រុក​ស្អាង ខេត្តកណ្តាល​។ ការសាងសង់​ដំណាក់កាល​ទី​១ នឹង​ចាប់ផ្តើម​ក្នុង​ឆ្នាំ​២០២១ ហើយ​គ្រោង​នឹង​បញ្ចប់​ក្រោយ​ព្រលានយន្តហោះ​ថ្មី​ (២០២៣) ដោយ​វា​អាច​អាស្រ័យ​ទៅលើ​ទុនវិនិយោគ​។ នេះបើតាមការបញ្ជាក់ពីប្រភពដដែល៕