បាត់ដំបង៖ គណៈកម្មាធិការជាតិសុវត្ថិភាពចរាចរណ៍ផ្លូវគោក ខេត្តបាត់ដំបងបានឱ្យដឹងថា ក្នុងរយៈពេល១១ខែឆ្នាំ២០២០នេះ មានករណីគ្រោះថ្នាក់ចរាចរណ៍ចំនួន១៩១ លើកបើធៀបឆ្នាំ២០១៩ មាន២២៤លើក ថយចុះ៣៣លើក ស្មើនឹង១៥ភាគរយ ។ ចំណែកអ្នកស្លាប់ មានចំនួន៧៧ នាក់ បើធៀបទៅឆ្នាំ២០១៩ មានចំនួន៨៩នាក់ គឺថយចុះ១២នាក់ ស្មើនឹង១៣ភាគរយ ។ រីឯអ្នករងរបួសធ្ងន់វិញ មានចំនួន១៤៦នាក់ ធៀបនឹងឆ្នាំមុន មានចំនួន១៦៩នាក់ ថយចុះ២៣នាក់ស្មើនឹង១៤ភាគរយ និង របួសស្រាលចំនួន១៣៤នាក់ កើនចំនួន៤៥នាក់បើធៀបឆ្នាំមុន។ ក្រៅពីមនុស្សស្លាប់ និងរបួស គ្រោះថ្នាក់ចរាចរណ៍ ឆ្នាំ២០២០ ក៍បណ្តាលឱ្យខូចខាតរថយន្តធុនធ្ងន់៣៨គ្រឿង ធុនស្រាល ៦៦គ្រឿង ម៉ូតូ១៧៤គ្រឿង ។ គ្រោះថ្នាក់ចរាចរណ៍ដែលមានចំនួនច្រើនជាងគេ គឺបើកបរក្នុងល្បឿនលឿន ដែលមានចំនួន៥៥លើកស្មើនឹង២៩ភាគរយ បត់ឆ្វេងបត់ស្តាំមិនប្រយ័ត្ន៣៥លើក ស្មើនឹង១៨ភាគរយ ប្រជែងក្នុងស្ថានភាពគ្រោះថ្នាក់ចំនួន២៥លើក ស្មើ១៣ភាគរយ និងបើកបរមិនគោរពសិទ្ធិអាទិភាពចំនួន ២០លើក ស្មើ១១ភាគរយ ។ ក្នុងកិច្ចប្រជុំត្រួតពិនិត្យការអនុវត្តផែនការសកម្មភាព សុវត្ថិភាពចរាចរណ៍ផ្លូវគោក ឆ្នាំ 202០ ខេត្តបាត់ដំបងដែលប្រព្រឹត្តទៅ នាថ្ងៃទី២២ខែធ្នូឆ្នាំ២០២០ នៅសាលាខេត្តបាត់ដំបង លោកព្រំ វន្ថា ប្រធាននាយកដ្ឋាន ចរាចរណ៍ផ្លូវគោក នៃក្រសួងមហាផ្ទៃ បានមានប្រសាសន៍ថា លទ្ធផលនៃការថយចុះនេះ គឺជាផ្នែកមួយក្នុងចលនាប្រឡងប្រណាំង តំបន់ពិសេសនៃសុវត្ថិភាពចរាចរណ៍ផ្លូវគោក ទូទាំងប្រទេស ដែលបានកំណត់ឱ្យផ្តោតយកចិត្តទុកដាក់លើសកម្មភាពអាទិភាព៨ចំណុច មានប្រសិទ្ធភាពនៃការគ្រប់គ្រងសុវត្ថិភាពចរាចរណ៍ផ្លូវគោក ហេដ្ឋារចនាសម្ព័ន្ធផ្លូវថ្នល់សុវត្ថិភាព យានយន្តមានសុវត្ថិភាពអាកប្បកិរិយាប្រកបដោយសុវត្ថិភាពរបស់អ្នកប្រើប្រាស់ផ្លូវ កិច្ចធានាប្រព័ន្ធសង្គ្រោះបន្ទាន់, ការអនុវត្តច្បាប់ប្រកបដោយប្រសិទ្ធភាពនិងតម្លាភាព, ការផ្តល់បណ្ណបើកបរប្រកបដោយគុណភាពនិងការគ្រប់គ្រងនិង វាយតម្លៃលើសុវត្ថិភាពដឹកជញ្ជូនអ្នកដំណើរ កម្មករនិងទំនិញជាដើម៕