កំពង់ចាម ថ្ងៃទី១១ ខែធ្នូ ឆ្នាំ២០២០ -- នៅព្រឹកថ្ងៃសុក្រ ១១រោច ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១១ ខែធ្នូ ឆ្នាំ២០២០ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម រួមជាមួយឯកឧត្តម លោកជំទាវអភិបាលរងខេត្ត ដឹកនាំមន្ត្រីជំនាញ អាជ្ញាធរ ក្រុងកំពង់ចាម អញ្ជើញចុះពិនិត្យមើលសកម្មភាពនៃការអ៊ុតកៅស៊ូប៉េទីមលើកំណាត់ផ្លូវ ចំនួន០៣ខ្សែ ស្ថិតនៅក្នុងក្រុងកំពង់ចាម។ ក្នុងឱកាសចុះពិនិត្យនេះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានណែនាំទៅក្រុមការងារអ៊ុតបេទីម ត្រូវយកចិត្តទុកដាក់អនុវត្តន៍តាមកម្រិតស្តង់ដា លក្ខណៈបច្ចេកទេសដើម្បីធានាគុណភាព សោភណភាព និងអាចប្រើប្រាស់បានយូរអង្វែង។ ការអ៊ុតផ្លូវទាំង៣ខ្សែក្នុងក្រុងកំពង់ចាម ដែលមានប្រវែង២.៨៤៥ ម៉ែត្រប្រើប្រាស់ គម្រោងថវិកាប្រចាំឆ្នាំ របស់រដ្ឋបាលខេត្តកំពង់ចាម ដែលខ្សែទី១ ប្រវែង១.៥៦២ម៉ែត្រលើ ផ្លូវលេខ៧ចាស់ ដែលមាន ទទឹង១០ម៉ែត្រ ចាប់ពីផ្លូវកែងរង្វង់មូល (១-៧៩) ភូមិទី៦ សង្កាត់វាលវង់ ដល់ផ្លូវព្រះមុនីវង្ស ភូមិទី៤ សង្កាត់វាលវង់ក្រុងកំពង់ចាម។ ខ្សែទី២ (ផ្លូវលេខ៥១) ប្រវែង ៥១២ម៉ែត្រ ទទឹង ៨ម៉ែត្រ ចាប់ពីស្តុបលំហែរផ្លូវជាតិលេខ ៧ថ្មី ភូមិបឹងស្នាយ សង្កាត់សំបួរមាស ដល់ផ្លូវលេខ៧ចាស់ ភូមិទី៦ សង្កាត់វាលវង់ ក្រុងកំពង់ចាម។ ខ្សែទី៣ (ផ្លូវលេខ៥៥) ប្រវែង៧៧១ម៉ែត្រ ទទឹង ៧,៥-៨ម៉ែត្រ ចាប់ពីផ្លូវភ្លោះព្រះបាទមុនីវង្ស ភូមិទី៤ សង្កាត់វាលវង់ ដល់ផ្លូវលេខ ៨៥ ភូមិទី៦ សង្កាត់វាលវង់ ក្រុងកំពង់ចាម៕