[Phnom Penh Post] - អគ្គស្នងការបញ្ជាឱ្យនគរបាល ផ្អាកពិន័យ បទល្មើសបើកបរ និង អាល់កុល ព្រោះកូវីដ១៩
2020-12-02
ទៅកាន់ទំព័រចុះផ្សាយក្នុង Phnom Penh Post
ភ្នំពេញ: លោក នេត សាវឿន អគ្គស្នងការនគរបាលជាតិនៃក្រសួងមហាផ្ទៃបានដាក់បទបញ្ជាបន្ទាន់ដល់នគរបាលក្នុងគោលដៅនានាក្នុងរាជធានីភ្នំពេញ បញ្ឈប់ជាបណ្ដោះអាសន្នចំពោះការអនុវត្តច្បាប់ផាកពិន័យបទល្មើសច្បាប់ចរាចរណ៍ និងផ្អាកការពិនិត្យជាតិអាល់កុលនៅពេលយប់ដោយបង្វែរភារកិច្ចមកសម្រួលចរាចរណ៍ កាត់បន្ថយការកកស្ទះប្រមូលផ្ដុំគ្នាច្រើន ខណៈមេរោគកូវីដ១៩កំពុងរាតត្បាតចូលក្នុងសហគមន៍ចាប់តាំងពីព្រឹត្ដិការណ៍ «សហគមន៍ ២៨វិច្ឆិកា»។
ការបង្វែរភារកិច្ចនេះត្រូវបានបិទបញ្ចប់នៅពេលមានការណែនាំជាថ្មីពីមេដឹកនាំ។
យោងតាមសារសំឡេងរបស់លោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញនៅថ្ងៃទី ១ ខែធ្នូបានឱ្យដឹងថា លោក នេត សាវឿន បានណែនាំក្នុងរយៈពេល ១៥ ថ្ងៃចាប់ពីថ្ងៃទី ១ រហូតដល់ថ្ងៃទី ១៥ ខែធ្នូនេះស្នើឱ្យមន្ត្រីនគរបាលចរាចរណ៍នៅក្នុងរាជធានីភ្នំពេញធ្វើការផ្អាកការអនុវត្តច្បាប់ចរាចរណ៍ផ្លូវគោកដែលកំពុងអនុវត្តទៅតាមអនុក្រឹត្យលេខ ៣៩ ជាបណ្ដោះអាសន្ន។ បន្ទាប់មកនៅថ្ងៃទី ១៦ ខែធ្នូថ្នាក់ដឹកនាំនឹងពិចារណាឡើងវិញចំពោះការបន្តអនុវត្តច្បាប់ចរាចរណ៍។
លោក ស ថេត បញ្ជាក់ទៀតថា ថ្នាក់ដឹកនាំស្នងការរងនគរបាលរាជធានីភ្នំពេញដែលទទួលបន្ទុកនៅក្នុងខណ្ឌនីមួយៗ ត្រូវតែធ្វើការណែនាំតាមគោលដៅរៀងៗខ្លួនចាប់ពីថ្ងៃទី ១ ធ្នូ។
លោក ជឹម ស៊ីថា អធិការនគរបាលខណ្ឌដង្កោបានថ្លែងពីម្សិលមិញថា លោកបានទទួលបទបញ្ជារបស់ថ្នាក់លើរួចរាល់ហើយ ដោយក្រុមការងារនៃអធិការដ្ឋាននគរបាលខណ្ឌដង្កោទាំងអស់នឹងគោរព។
លោក អធិការនគរបាលខណ្ឌដដែលនេះបានថ្លែងបញ្ជាក់ថា៖ «យើងបានទទួលបញ្ជាហ្នឹងហើយ ខ្ញុំអត់មានមតិអ្វីទេ គឺយើងគោរពតាមអនុសាសន៍របស់ថ្នាក់ដឹកនាំយើង»៕
