[VOD] - រដ្ឋាភិបាលចាប់ផ្ដើមគម្រោងកសាង និងកែលម្អផ្លូវក្រុងសៀមរាបតម្លៃ១៤០លានដុល្លារ
2020-11-30
ទៅកាន់ទំព័រចុះផ្សាយក្នុង VOD
កម្រោងកសាង និងកែលម្អផ្លូវនានាប្រវែងសរុបជាង ១០០គីឡូម៉ែត្រនៅខេត្តសៀមរាប ត្រូវបានបើកដំណើរការនៅថ្ងៃនេះ ដោយរំពឹងថា ទីក្រុងទេសចរណ៍មួយនឹងក្លាយជាទីក្រុងឆ្លាតវៃ។
ដំណើរការសាងសង់ និងកែលម្អផ្លូវ ៣៨ខ្សែនៅក្រុងសៀមរាបនេះ ត្រូវបានបើកជាផ្លូវការនៅថ្ងៃនេះក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន។
ទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន ឱ្យដឹងថា ផ្លូវទាំង ៣៨ខ្សែដែលត្រូវកសាង និងកែលម្អនោះ មានប្រវែងដល់ទៅ ១០៨.៧៥គីឡូម៉ែត្រ ហើយគម្រោងមួយនេះ ត្រូវចំណាយថវិកាជាតិដល់ទៅ ១៤០លានដុល្លារ ខណៈទំហំថវិកា ៩លានដុល្លារទៀត នឹងត្រូវចំណាយមស្រាប់កសាងប្រព័ន្ធបង្ហូរទឹកភ្លៀង និងទឹកកខ្វក់នៅក្រៅគម្រោងសាងសង់ផ្លូវទាំង ៣៨ខ្សែនោះ។
ទំព័រហ្វេសប៊ុកនាយករដ្ឋមន្ត្រីបញ្ជាក់ថា គម្រោងមួយនេះ នឹងកែប្រែទីក្រុងសៀមរាប ឱ្យក្លាយជាទីក្រុងឆ្លាតវៃសម្រាប់គោលដៅទេសចរណ៍ទំនើប ដែលទាក់ទាញការវិនិយោគបន្ថែមទៀតពីវិនិយោគទាំងក្នុងស្រុក និងក្រៅស្រុក។
គម្រោងកសាង និងកែលម្អហេដ្ឋារចនាសម្ព័ន្ធផ្លូវថ្នល់នៅក្រុងសៀមរាប ត្រូវបានរដ្ឋាភិបាលប្រកាសឱ្យដឹងកាលពីដើមខែកញ្ញាកន្លងមកនេះ ដោយលោកនាយករដ្ឋមន្ត្រី ហ៊ុន សែន ប្រកាសនាពេលនោះថា គម្រោងមួយនេះ គឺជាផ្នែកមួយនៃការស្ដារសេដ្ឋកិច្ចឡើងវិញក្រោយវិបត្តិកូវីដ១៩៕
