បច្ចុប្បន្ននេះ ប្រទេស វៀតណាម បាននិងកំពុងសិក្សា និងពន្លឿនគម្រោងតភ្ជាប់ផ្លូវដែកពីភ្នំពេញ ទៅកាន់ទីក្រុង ហូជីមិញ ឲ្យឆាប់លេចចេញជារូបរាង ដើម្បីសម្រួលដល់ការដឹកជញ្ជូនរវាងប្រទេសទាំងពីរតាមផ្លូវដែកនេះ ក៏ដូចជាផ្ដល់ភាពងាយស្រួលដល់ភ្ងៀវទេសចរក្នុងការធ្វើដំណើរផងដែរ។ បើតាមការបញ្ជាក់របស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។ ការបញ្ជាក់បែបនេះ របស់លោកទេសរដ្ឋមន្ត្រី ធ្វើឡើងនាថ្ងៃទី ២៥ ខែ វិច្ឆិកា ឆ្នាំ ២០២០ ក្នុងឱកាស ដឹកនាំកិច្ចប្រជុំភាគីស្ដីពីការធ្វើឱ្យ ប្រសើរឡើងនូវការដឹកជញ្ជូនឆ្លងកាត់ព្រំដែនរវាងកម្ពុជា និងវៀតណាម តាមរយៈប្រព័ន្ធវីដេអូពីចម្ងាយ ដោយមានការអញ្ជើញចូលរួមពីគ្រប់ភាគីពាក់ព័ន្ធផងដែរ។ លោកទេសរដ្ឋមន្ត្រីបានបញ្ជាក់យ៉ាងដូច្នេះថា​៖ «តាមការស្នើសុំបញ្ជាក់ពីភាគីកម្ពុជា ទាក់ទងនឹងគម្រោងតភ្ជាប់ផ្លូវដែកពីភ្នំពេញទៅក្រុងហូជីមិញ ភាគីវៀតណាមបានឆ្លើយតបថា ខ្លួនបាននិងកំពុងសិក្សាគម្រោងនេះ យ៉ាងយកចិត្តទុកដាក់បំផុត និងខិតខំប្រឹងប្រែងពន្លឿនគម្រោងនេះ ឱ្យបានឆាប់ចេញជារូបរាងឡើងនាពេលអនាគតដ៏ខ្លីខាងមុខ»។ ទន្ទឹមនេះដែរ តាមរយៈ ឯកឧត្តម វ៉ាស៊ីម សុរិយា វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន កាលពីពេលកន្លងទៅបានឱ្យដឹងថា គម្រោងផ្លូវរថភើ្លងនេះ ជាការអភិវឌ្ឍរបៀងសេដ្ឋកិច្ចរវាងកម្ពុជា និងវៀតណាម ដោយនឹងសម្រួលដល់ការដឹកជញ្ជូន ជំរុញសកម្មភាពសេដ្ឋកិច្ច និងការធ្វើដំណើររបស់អ្នកទេសចរ។ លោកបានបន្ដថា ៖ «គម្រោងនេះនឹងជួយឱ្យតម្លៃដឹកជញ្ជូនយើងកាន់តែចុះទាប ចំណេញពេលវេលា និងកាត់បន្ថយការកកស្ទះចរាចរណ៍ផងដែរ»។ បើតាមការបញ្ជាក់ដដែលពីឯកឧត្តមបានឲ្យដឹងថា សព្វថ្ងៃការដឹកជញ្ជូនទំនិញពីប្រទេសចិនមកប្រទេសកម្ពុជា ប្រមាណ ៤០ ភាគរយ ត្រូវបានឆ្លងកាត់ប្រទេសវៀតណាម ដូច្នេះប្រសិនបើគម្រោងសាងសង់ផ្លូវដែកនេះកើតមានឡើងវានឹងជួយលើកកម្ពស់ហេដ្ឋារចនាសម្ព័ន្ធដឹកជញ្ជូនរបស់កម្ពុជាក្នុងការរក្សាភាពប្រកួតប្រជែងក្នុងតំបន់ជាក់ជាមិនខាន។ គួររំលឹកផងដែរ សម្រាប់គម្រោងផ្លូវដែក ភ្នំពេញ វៀតណាមនេះ ត្រូវបានសិក្សារួចជាច្រើនលើកច្រើនសារមកហើយ ដោយចាប់តាំងពីឆ្នាំ២០០០មក ការសិក្សាធ្វើឡើងដោយក្រុមហ៊ុនជាច្រើនដូចជា ម៉ាឡេស៊ី កូរ៉េ និងចុងក្រោយ គឺក្រុមហ៊ុនចិន។ សូមបញ្ជាក់ ប្រសិនបើគម្រោងនេះលេចចេញនូវរូបរាងពេលណា វានឹងធ្វើឲ្យប្រសើរឡើងនូវហេដ្ឋារចនាសម្ព័ន្ធដឹកជញ្ជូន និងច្រកទ្វារព្រំដែន មិនត្រឹមតែបម្រើឱ្យពាណិជ្ជកម្ម រវាងប្រទេសទាំងពីរប៉ុណ្ណោះទេ ប៉ុន្តែថែមទាំងបម្រើឱ្យការធ្វើពាណិជ្ជកម្មដល់កម្ពុជា វៀតណាម និងថៃ ក៏ដូចជាអាស៊ានទាំងមូលផងដែរ៕