[VOD] - ក្រសួងនឹងចាត់វិធានការតឹងរ៉ឹងលើរថយន្តធុនធ្ងន់ដែលនៅបន្តដឹកទំនិញលើសទម្ងន់កំណត់
2020-11-02
ទៅកាន់ទំព័រចុះផ្សាយក្នុង VOD
ក្រសួងសាធារណការ និងដឹកជញ្ជូន ព្រមានជាថ្មី ដោយចាត់វិធានការតាមផ្លូវច្បាប់តឹងរ៉ឹងចំពោះម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបរថយន្តធុនធ្ងន់ ដែលនៅបន្តដឹកទំនិញលើសទម្ងន់កំណត់ដែលបណ្តាលឱ្យខូចផ្លូវ។
សេចក្តីជូនដំណឹងរបស់ក្រសួងសាធារណការ និងដឹកជញ្ជូន ដែលបានផ្សព្វផ្សាយនៅថ្ងៃចន្ទនេះ បានលើកឡើងថា កន្លងមក ក្រសួង ក៏ដូចជាគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានសង្កេតឃើញមានម្ចាស់ក្រុមហ៊ុនដឹកជញ្ជូន ម្ចាស់រថយន្ត និងអ្នកបើកបររថយន្តធុនធ្ងន់មួយចំនួន នៅតែមិនទាន់ចូលរួមគោរពច្បាប់និងលិខិតបទដ្ឋានគតិយុត្តិឱ្យបានពេញលេញនៅឡើយ។
ករណីនេះ ក្រសួងបានណែនាំជាថ្មីដល់ម្ចាស់ក្រុមហ៊ុន ម្ចាស់រថយន្ត និងអ្នកបើកបររថយន្តធុនធ្ងន់ទាំងអស់ ត្រូវគោរពនិងអនុវត្តច្បាប់ស្តីពីផ្លូវថ្នល់ឱ្យបានត្រឹមត្រូវ។
ក្រសួងបន្តថា ក្នុងករណីម្ចាស់ក្រុមហ៊ុនដឹកជញ្ជូន ម្ចាស់រថយន្ត និងអ្នកបើកបររថយន្តធុនធ្ងន់ណាមួយនៅតែបណ្តែតបណ្តោយឱ្យដឹកជញ្ជូនឬផ្ទុកទម្ងន់លើសពី២០ភាគរយ នោះប្រធានស្ថានីយជញ្ជីងអចល័ត និង/ឬប្រធានក្រុមជញ្ជីងចល័ត ត្រូវចាត់វិធានការតាមច្បាប់ ដោយដកបណ្ណបើកបរនិងព្យួរទុកចំនួន២ឆ្នាំ និងត្រូវឃាត់យានជំនិះទុកចំនួន១ឆ្នាំ ដោយរក្សាទុកនៅទីតាំងណាមួយសមស្រប ហើយម្ចាស់យានយន្តត្រូវទទួលខុសត្រូវលើការលើកដាក់ទំនិញ និងបង់ថ្លៃឈ្នួលកន្លែង ទុកដាក់ថែទាំទំនិញ និងយានជំនិះដោយខ្លួនឯង។
ក្រៅពីនោះ ក្រសួងក៏បានព្រមានបញ្ឈប់អាជីវកម្មដឹកជញ្ជូនរបស់ក្រុមហ៊ុនចំនួន១ឆ្នាំ ក្នុងករណីទទួលរងនូវការពិន័យអន្តរការណ៍ម្តងរួចហើយ ហើយនៅតែបន្តប្រព្រឹត្តល្មើសទៀត។
ក្រសួងសាធារណការ បន្ថែមថា ចំពោះមន្ត្រីមានសមត្ថកិច្ច (ស្ថានីយជញ្ជីងអចល័ត និងជញ្ជីងចល័ត ក្រោមឱវាទក្រសួងសាធារណការ និងដឹកជញ្ជូន) ដែលអនុញ្ញាតឱ្យរថយន្តផ្ទុកលើសទម្ងន់កម្រិតកំណត់ ធ្វើចរាចរណ៍លើបណ្តាញផ្លូវថ្នល់ នឹងត្រូវទទួលទណ្ឌកម្មវិន័យទៅតាមច្បាប់និងអនុក្រឹត្យនានាដែលពាក់ព័ន្ធផងដែរ។
បើតាមក្រសួង សេចក្តីជូនដំណឹងនេះ មានប្រសិទ្ធភាពអនុវត្តចាប់ពីថ្ងៃទី១៦ ខែវិច្ឆិកា ឆ្នាំ២០២០តទៅ៕
