(បន្ទាយមានជ័យ)៖ ថ្ងៃសៅរិ៍ ៨កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែតុលា ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញអមដំណើរសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា បន្តចុះជួបសំណេះសំណាល សាកសួរសុខទុក្ខ និងចែកអំណោយជូនប្រជាពលរដ្ឋមួយម៉ឺនគ្រួសារ ដែលរងគ្រោះដោយទឹកជំនន់ នៅស្រុកអូរជ្រៅ និងស្រុកម៉ាឡៃ ខេត្តបន្ទាយមានជ័យ។ សូមជម្រាបជូនថា៖ តាមរបាយការណ៍របស់អាជ្ញាធរខេត្តបន្ទាយមានជ័យ ស្ថានភាពទឹកជំនន់ មានការស្រកចុះបន្តិចហើយ ស្រុកដែលនៅរងផលប៉ះពាល់មានស្រុកមង្គលបុរី ក្រុងសិរីសោភ័ណ និងស្រុកអូរជ្រៅ ដែលមិនទាន់ស្រកអស់នៅរងផលប៉ះពាល់ដដែល ស្ថានភាពទឹកនៅស្រុកអូរជ្រៅស្រកច្រើន ស្រកពីភូមិមួយ ទៅភូមិមួយ ពីឃុំមួយទៅឃុំមួយ ឥឡូវនេះស្រកទៅដល់ក្រុងសិរីសោភ័ណហើយ។ តាមរបាយការណ៍ របស់អគ្គនាយកដ្ឋានបច្ចេកទេស សហការជាមួយមន្ទីរសាធារណការ និងដឹកជញ្ជូនទាំង២៥ រាជធានីខេត្ត និងអង្គភាពវិស្វកម្ម ស្តីពីស្ថានភាពជំនន់ទឹកភ្លៀង ដែលបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់កម្ពុជាគិតត្រឹមថ្ងៃទី២៣ ខែតុលា ឆ្នាំ២០២០នេះ មានខេត្តចំនួន២៤ រាជធានីខេត្ត ដែលទទួលរងនូវការជន់លិច ក្នុងនោះរួមមាន៖ ខេត្តបន្ទាយមានជ័យ បាត់ដំបង ពោធិ៍សាត់ត្បូងឃ្មុំ កំពង់ឆ្នាំង កំពង់ធំ កែប កំពង់ស្ពឺ ប៉ៃលិន កណ្ដាល ព្រៃវែង ឧត្តរមានជ័យ សៀមរាប រតនគិរី រាជធានីភ្នំពេញ កំពង់ចាម កំពត តាកែវ ស្វាយរៀង ព្រះសីហនុ កោះកុង ព្រះវិហារ ស្ទឹងត្រែង និងខេត្តមណ្ឌលគិរី ដោយឡែកខេត្តចំនួនមួយគឺខេត្តក្រចេះ មិនទាន់មានរងផលប៉ះពាល់នៅឡើយទេ។ លើសពីនេះទៀត ទំហំនៃការជនលិចលើហេដ្ឋារចនាសម្ព័ន្ធ ដែលទទួលរងផលប៉ះពាល់មានចំនួន១៨៧ខ្សែ មានចំនួន ៥៣៨កំណាត់ និងមានប្រវែងសរុប ៦៦២ គីឡូម៉ែត្រ ស្ពានចំនួន ៥កន្លែង ស្ពានបេតុង៤កន្លែង ស្ពានឈើ ១កន្លែង មានប្រវែងសរុប២៦១ម៉ែត្រ។ សម្ដេចតេជោនាយករដ្ឋមន្ត្រី បានគូសបញ្ជាក់អំពីវីរៈភាពរបស់ប្រជាពលរដ្ឋកម្ពុជា មន្ត្រីរាជការស៊ីវិល កងកម្លាំងប្រដាប់អាវុធគ្រប់ប្រភេទ ដែលបានធ្វើសកម្មភាពព្រមគ្នាដើម្បីជួយសង្គ្រោះប្រជាជនចេញពីតំបន់រងគ្រោះដោយទឹកជំនន់ និងចូលរួមឧបត្ថម្ភឧបត្ថម្ភគាំទ្រដល់ប្រជាពលរដ្ឋដែលរងគ្រោះទឹកជំនន់។ អំណោយដ៏ថ្លៃថ្លារបស់សម្ដេចតេជោនាយករដ្ឋមន្ត្រី ត្រូវបានចែកជូនបងប្អូនប្រជាពលរដ្ឋរងគ្រោះដោយជំនន់ទឹកភ្លៀងចំនួន១ម៉ឺនគ្រួសារ នៅក្នុងកម្មវិធីចែកអំណោយដាច់ដោយឡែកពីគ្នាចំនួនពីរគឺកម្មវិធីទីមួយ រៀបចំឡើងនៅស្រុកអូរជ្រៅ និងកម្មវិធីទីពីរនៅស្រុកម៉ាឡៃ ដោយក្នុងមួយគ្រួសារទទួលបានអង្ករចំនួន២៥គីឡូក្រាម មីចំនួនមួយកេស ទឹកសុទ្ធចំនួនមួយកេស ត្រីខ មួយយួរ ទឹកត្រីមួយយួរ ទឹកស៊ីអ៊ីវមួយយួរ មុងមួយ កន្ទេលមួយ ភួយមួយ ក្រមាមួយ សារុងមួយ និង ថវិកាចំនួន៥ម៉ឺនរៀល ដើម្បីចូលរួមចំណែកសម្រាលទុក្ខលំបាករបស់បងប្អូនប្រជាពលរដ្ឋបានមួយចំណែកក្នុងគ្រាដ៏លំបាកនេះ។ ឆ្លៀតក្នុងឱកាសនេះផងដែរ សម្ដេចតេជោនាយករដ្ឋមន្ត្រី បានជម្រាបជូនថា៖ រាជរដ្ឋាភិបាលបានអនុម័តច្បាប់ថវិកាហិរញ្ញវត្ថុសម្រាប់ការគ្រប់គ្រងឆ្នាំ២០២១ ដោយគិតគូរយ៉ាងម៉ត់ចត់ទៅលើការដោះស្រាយបញ្ហាប្រជាជនទទួលរងគ្រោះជំងឺកូវីដ-១៩ ក៏ដូចជាប្រជាជនរងគ្រោះដោយទឹកជំនន់ ក្នុងនោះរួមមានកញ្ចប់ថវិកាសម្រាប់ការប្រយុទ្ធ និងការពារជីវិតប្រជាជន រក្សាលំនឹងសេដ្ឋកិច្ចសង្គម និងជីវភាពប្រជាជន ក្រោយវិបត្តិជំងឺកូវីដ-១៩ នឹងគ្រោះទឹកជំនន់។ សម្ដេចក៏បានអំពាវនាវឲ្យប្រជាជនទូទាំងប្រទេស ពិសេសអ្នករងគ្រោះទាំងឡាយ ត្រូវខិតខំងើបឈរឡើងពីការលំបាក ដើម្បីឈានឆ្ពោះទៅមុខស្របតាមកិច្ចខិតខំប្រឹងប្រែងរបស់រាជរដ្ឋាភិបាល ដែលបានដាក់ចេញនូវវិធានការដែលមានចែងក្នុងច្បាប់ស្ដីពីការគ្រប់គ្រងថវិកាឆ្នាំ២០២១ ពោលគឺច្បាប់នេះធ្វើឡើង ដើម្បីប្រយុទ្ធការពារប្រជាជន រក្សាលំនឹងសង្គម សេដ្ឋកិច្ច ជីវភាពប្រជាជននិងតម្រង់ឆ្ពោះទៅការស្ដារឡើងវិញនៃសេដ្ឋកិច្ចរបស់យើង។ លើសពីនេះទៀត សម្តេចតេជោនាយករដ្ឋមន្ត្រីបានណែនាំឱ្យក្រសួងសាធារណការ និងដឹកជញ្ជូនពិនិត្យមើលហេដ្ឋារចនាសម្ព័ន្ធផ្លូវថ្នល់ស្ពានទាំងអស់ ដែលបានខូចខាតដោយទឹកជំនន់នៅទូទាំងប្រទេស ធ្វើការជួសជុលជាបន្ទាន់ ក្រោមសមត្ថកិច្ចរបស់ខ្លួន ដើម្បីសម្រួលដល់ការធ្វើចរាចរណ៍របស់បងប្អូនប្រជាពលរដ្ឋ។ សម្ដេចតេជោនាយករដ្ឋមន្ត្រី បានណែនាំឲ្យអាជ្ញាធរពាក់ព័ន្ធទាំងអស់នៅបន្តចែកជំនួយឧបត្ថម្ភដល់ជនរងគ្រោះដោយទឹកជំនន់ និងបានបញ្ជាក់បន្ថែមថានេះជាជំនួយបណ្ដោះអាសន្នសម្រាប់សម្រាលការលំបាកចំពោះមុខតែប៉ុណ្ណោះ ប៉ុន្តែដើម្បីឈានទៅកសាងភាពរីកចម្រើនបាន តម្រូវឲ្យគ្រួសារនីមួយៗមានផែនប្រឹងប្រែងស្ដារឡើងវិញនូវជីវភាពរបស់ខ្លួន៕