(បន្ទាយមានជ័យ)៖ ថ្ងៃព្រហស្បតិ៍ ៦កើត ខែកត្តិក ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី២២ ខែតុលា ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញអមដំណើរសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បន្តចុះជួបសំណេះសំណាល សាកសួរសុខទុក្ខ និងចែកអំណោយជូនប្រជាពលរដ្ឋមួយម៉ឺនគ្រួសារ ដែលរងគ្រោះដោយជំនន់ទឹកភ្លៀងនៅស្រុកថ្មពួក និងក្រុងប៉ោយប៉ែត ខេត្តបន្ទាយមានជ័យ។ យោងតាមរបាយការណស្តីពីផលប៉ះពាល់ដោយសារជំនន់ទឹកភ្លៀងរបស់ឯកឧត្តមអភិបាលនៃគណៈអភិបាលខេត្តបន្ទាយមានជ័យបានឲ្យដឹងថា ស្ថានភាពទឹកជំនន់ក្នុងខេត្តបន្ទាយមានជ័យ ជាពិសេសស្រុកថ្មពួក មានបងប្អូនប្រជាពលរដ្ឋ ដែលទទួលរងផលប៉ះពាល់ដោយទឹកជំនន់មានឃុំចំនួន៦រួមមាន ឃុំថ្មពួក ១១០៧នាក់ ឃុំគោករមៀត ៦៧៩នាក់ ឃុំបន្ទាយឆ្មារ ១១៨៦នាក់ ឃុំគំរូ ១១៦៦នាក់ ឃុំគោកកឋិត ៧៩៣នាក់ ឃុំភូមិថ្មី ១០៦៩នាក់ សរុបចំនួន ៥ពាន់នាក់។ ចំណែកនៅក្រុងសិរីសោភ័ណ និងស្រុកមង្គលបូរី ទឹកនៅនឹងដដែល ប៉ុន្តែដោយសារទំនប់អូរខៃដន បាក់ពីក្រុងប៉ោយប៉ែតកាលពីម្សិលម្ងៃ រហូតមកដល់ម៉ោងនេះ ទឹកកំពុងតែវាយលុកចូលក្នុងស្រុកអូរជ្រៅបន្ថែម ដោយតួលេខប្រជាពលរដ្ឋ ទទួលរងផលប៉ះពាល់ដោយទឹកជំនន់ពីម្សិលមិញមានចំនួន២៩.០០០ គ្រួសារ ប៉ុន្តែរហូតដល់ថ្ងៃនេះមានចំនួន ៣៦.០០០គ្រួសារ អាចនឹងកើនឡើងក្នុងស្រុកអូរជ្រៅ និងក្រុងសិរីសោភ័ណ ព្រោះទឹកកំពុងធ្លាក់មកដល់ប៉ែកខាងជើងផ្លូវជាតិលេខ៦ និងបន្តធ្លាក់ពីស្រុកអូរជ្រៅមកក្រុងសិរីសោភ័ណ ថែមទៀត។ អំណោយដ៏ថ្លៃថ្លារបស់សម្ដេចតេជោនាយករដ្ឋមន្ត្រី ត្រូវបានចែកជូនបងប្អូនប្រជាពលរដ្ឋរងគ្រោះដោយជំនន់ទឹកភ្លៀងចំនួន១ម៉ឺនគ្រួសារ នៅក្នុងកម្មវិធីចែកអំណោយដាច់ដោយឡែកពីគ្នាចំនួនពីរគឺកម្មវិធីទីមួយ រៀបចំឡើងនៅស្រុកថ្មពួក និងកម្មវិធីទីពីរនៅសង្កាត់ផ្សារកណ្ដាលក្រុងប៉ោយប៉ែត ដោយក្នុងមួយគ្រួសារទទួលបានអង្ករចំនួន២៥គីឡូក្រាម មីចំនួនមួយកេស ទឹកសុទ្ធចំនួនមួយកេស ត្រីខ មួយយួរ ទឹកត្រីមួយយួរ ទឹកស៊ីអ៊ីវមួយយួរ មុងមួយ កន្ទេលមួយ ភួយមួយ ក្រមាមួយ សារុងមួយ និង ថវិកាចំនួន៥ម៉ឺនរៀល ដើម្បីចូលរួមចំណែកសម្រាលទុក្ខលំបាករបស់បងប្អូនប្រជាពលរដ្ឋបានមួយចំណែកក្នុងគ្រាដ៏លំបាកនេះ។ ថ្លែងទៅកាន់អង្គពិធីទាំងមូលនាឱកាសនោះ សម្ដេចនាយករដ្ឋមន្ត្រី បានថ្លែងនូវការកោតសរសើរដល់អាជ្ញាធរខេត្តបន្ទាយមានជ័យ ក៏ដូចជា អាជ្ញាធរថ្នាក់ស្រុក ថ្នាក់ឃុំ មន្ត្រីភូមិ និងអាជ្ញាធរពាក់ព័ន្ធទាំងអស់ ព្រមទាំងប្រជាពលរដ្ឋដែលបានសហការ រួមគ្នាដោះស្រាយបញ្ហាគ្រោះទឹកជំនន់ក៏ដូចជាជំងឺកូវីដ-១៩ក្នុងគ្រាដ៏លំបាកនេះ។ ឆ្លៀតក្នុងឱកាសនោះផងដែរ សម្តេចនាយករដ្ឋមន្ត្រី ក៏បានគូសបញ្ជាក់ផងដែរថារដ្ឋាភិបាលមានផែនការផ្ដល់ពូជស្រូវ និងពូជដំណាំផ្សេងៗដល់ប្រជាពលរដ្ឋដែលដីស្រែចំការរបស់ខ្លួនត្រូវទឹកជន់លិច ដើម្បីធ្វើការដាំដុះឡើងវិញ ជាពិសេសជាងនេះទៅទៀត រាជរដ្ឋាភិបាល នឹងគិតគូរយកចិត្តទុកដាក់ខ្ពស់លើការស្តារហេដ្ឋារចនាសម្ព័ន្ធរូបវ័ន្តទាំងឡាយ ដែលត្រូវបានខូចខាតដោយសារទឹកជំនន់ផងដែរ៕