កណ្តាល៖ ក្រោយពេលជំនន់ទឹកភ្លៀងហូរជន់តាមតំបន់ជា ច្រើននោះមក មន្ទីរសាធារណការខេត្តកណ្ដាល បានសម្រេចបិទចរាចរណ៍សម្រាប់រថយន្ដធំ បើកបរលើកកំណាត់ផ្លូវ ចំនួន៩ខ្សែ នៅក្នុងភូមិសាស្រ្ដខេត្តកណ្ដាល។ មន្ទីរសាធារណការ និងដឹកជញ្ជូនខេត្តកណ្តាល បានចេញសេចក្ដីជូនដំណឹង នៅថ្ងៃទី១៤ ខែតុលា ឆ្នាំ២០២០ ថា មន្ទីរបានសម្រេចបិទចរាចរណ៍រថយន្តដឹកទំនិញធុនធំគ្រប់ប្រភេទ នៅលើកំណាត់ផ្លូវជាតិតូច និងធំ ចំនួន៩ខ្សែ ជាបណ្ដោះអាសន្ន នៅក្នុងភូមិសាស្ត្រខេត្តកណ្ដាល រួមមាន ផ្លូវជាតិលេខ២, ៣, ៤, ៥, ២០, ២០អា, ២១, ២១អា និងផ្លូវជាតិលេខ ២១បេ។ ការបិទចរាចរណ៍សម្រាប់រថយន្ដធុនធំគ្រប់ប្រភេទជាបណ្ដោះអាសន្ននាពេលនេះ ក៏ដោយសារតែស្ថានភាពជំនន់ទឹកភ្លៀង បាន និងកំពុងជន់ឡើងខ្លាំង បណ្ដាលឱ្យទឹកលិចកំណាត់ផ្លូវមួយចំនួន នៅក្នុងខេត្តកណ្ដាល។ ស្ថិតក្នុងស្ថានភាពបែបនេះ នឹងធ្វើឱ្យផ្លូវ និងស្ពានមិនអាចទ្រាំទ្រនឹងទម្ងន់រថយន្តដឹកទំនិញធុនធ្ងន់បាននោះឡើយ។ អាជ្ញាធរខេត្តកណ្ដាល បានឲ្យដឹងដែរថា កំណាត់ផ្លូវជាតិលេខ៣ ជិតទំនប់៧មករា ស្ថិតក្នុងភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ត្រូវទឹកជំនន់ហូរកាត់ជិតប្រវែង១០០ម៉ែត្រ កាលពីវេលាម៉ោង២ និង៣០នាទីរសៀល ថ្ងៃទី១៤ ខែតុលា រហូតដល់យប់ថ្ងៃដដែលនេះ។ រីឯទឹកនៅទំនប់៧មករា បានហក់ឡើងដល់ ៩,៤៥ម៉ែត្រ លើសពីព្រឹកមិញ ដល់ទៅ ០,២០ម៉ែត្រ ហើយវាហួសកំណត់ ពីការប្រកាសអាសន្នទៅទៀត។ ស្ថិតក្នុងស្ថានភាពបែបន អាជ្ញាធរសូមក្រើនរំឭកដល់បងប្អូនទាំងអស់បង្កើនការប្រុងប្រយ័ត្នខ្ពស់បំផុត ចំពោះគ្រោះជំនន់ទឹកភ្លៀង ជាពិសេស បងប្អូនប្រជាពលរដ្ឋ រស់នៅក្នុងស្រុកកណ្តាលស្ទឹង ខេត្តកណ្តាល និងខណ្ឌដង្កោ រាជធានីភ្នំពេញ៕