នៅមុននេះបន្ដិចយោងតាមសេចក្ដីជូនដំណឹងរបស់មន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា អាជ្ញាធររាជធានីភ្នំពេញសម្រេច កំណត់ល្បឿនបើកបរចំពោះយានយន្ដគ្រប់ប្រភេទ ដែលធ្វើចរាចរនៅលើដងមហាវិថី សម្តេចអគ្គមហាសេនាបតីតេជោ ហ៊ុន សែន (ផ្លូវ៦០ម៉ែត្រ) បន្ទាប់ពីមើលឃើញមានបញ្ហាគ្រោះថ្នាក់កើតឡើងជាញឹកញាប់។ បើតាមការបញ្ជាក់របស់មន្ទីរសារធាណការ និងដឹកជញ្ជូនរាជធានីភ្នំពេញនៅលើផេកហ្វេសប៊ុកផ្លូវការរបស់ខ្លួនមានខ្លឹមសារយ៉ាងដូច្នេះថា“ដោយប្រឈមបញ្ហាគ្រោះថ្នាក់ចរាចរកើតមានជាញឹកញាប់ដោយការបើកបរលឿន លើដងមហាវិថី សម្តេចអគ្គមហាសេនាបតីតេជោ ហ៊ុន សែន ចាប់ពីផ្លូវលេខ ២៧១ ដល់ផ្លូវជាតិលេខ ២ ចាប់ពីពេលនេះតទៅ មហាវិថីនេះត្រូវបានកំណត់ល្បឿនយានយន្តបើកបរមិនអោយលើស ៤០គ.មក្នុង១ម៉ោង។” គួរជម្រាបផងដែរថា គ្រោះថ្នាក់ចរាចរនៅក្នុងប្រទេសកម្ពុជា គឺតែងតែកើតមានស្ទើររាងរាល់ថ្ងៃ ដែលបង្កឲ្យមានអ្នករងរបួស និងស្លាប់បាត់បង់ជីវិតជាច្រើននាក់ផងដែរក្នុងមួយឆ្នាំៗ។ ប៉ុន្ដែទោះជាយ៉ាងណាមន្ដ្រី រួមនឹងអាជ្ញាធរពាក់ព័​ន្ធក៏បានបាត់វិធានការដើម្បីឆ្លើយតបទៅនឹងបញ្ហាខាងលើនេះផងដែរ ដោយក្នុងនោះអ្នកបើកបរម៉ូតូតម្រូវអោយពាក់មួកសុវត្ថិភាព ម៉ូតូត្រូវមានកញ្ចក់មើលក្រោយ អ្នកបើកបររថយន្ដត្រូវពាក់ខ្សែក្រវ៉ាត់ ពិនិត្យជាតិអាកុលលើអ្នកបញ្ជាយានយន្ដ និងកំណត់ល្បឿនក្នុងការបើកបរជាដើម៕