[CEN] - ទេសរដ្ឋមន្ត្រី ស៊ុន ចាន់ថុល ស្នើដល់កងកម្លាំងនគរបាល បន្ដចូលរួមសហការជាមួយមន្ទីរសាធារណការ ដើម្បីចុះត្រួតពិនិត្យ និងបង្ក្រាបទីតាំងកែច្នៃរថយន្ដខុសច្បាប់
2020-09-08
ទៅកាន់ទំព័រចុះផ្សាយក្នុង CEN
ភ្នំពេញ៖ ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន ក្នុងជំនួបសំណេះសំណាលជាមួយ នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ នៅព្រឹកថ្ងៃទី៨ ខែកញ្ញា ឆ្នាំ២០២០នេះ បានស្នើដល់កងកម្លាំងនគរបាលជាតិ បន្ដចូលរួមសហការជាមួយមន្ទីរសាធារណការ ដើម្បីចុះត្រួតពិនិត្យ និងបង្ក្រាបទីតាំងកែច្នៃរថយន្ដខុសច្បាប់។
ថ្ងៃអង្គារ ទី៨ ខែកញ្ញា ឆ្នាំ២០២០ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បាន ដឹកនាំគណៈប្រតិភូក្រសួងអញ្ជើញជួបសំណេះជាមួយនាយនគរបាលជាន់ខ្ពស់នៃអគ្គស្នងការនគរបាល ជាតិ ក្រសួងមហាផ្ទៃ ក្នុងឱកាសអបអរសាទរពិធីបុណ្យភ្ជុំបិណ្ឌប្រពៃណី ជាតិខ្មែរ ឆ្នាំជូត ទោស័ក ពុទ្ធសករាជ ២៥៦៤ គ្រឹស្តសករាជ ២០២០។
កម្មវិធីនេះមានការអញ្ជើញចូលរួមពីឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នង ការនគរបាលជាតិ ថ្នាក់ដឹកនាំក្រសួងសាធារណការ និងដឹកជញ្ជូន ថ្នាក់ដឹកនាំអគ្គស្នងការនគរបាលជាតិ ថ្នាក់ដឹកនាំនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ឯកឧត្តម អស់លោក លោកស្រីស្នងការនគរបាលរាជធានី-ខេត្តសរុបប្រមាណ៨៤រូប។
ថ្លែងទៅកាន់អង្គពិធីទាំងមូល ឯកឧត្ដមទេសរដ្ឋមន្ត្រី បានលើកឡើងថាការជួបជុំរបស់យើងនៅថ្ងៃនេះ អាចប្រព្រឹត្តទៅបានក៏ដោយសារស្រុកទេសយើងមានសុខសន្តិភាព ក្រោមការដឹកនាំប្រកបដោយគតិ បណ្ឌិត និងគោលនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានអរគុណសន្តិភាព ដែលនាំមកនូវការរស់រានមានជីវិត និងការរីក ចម្រើនលើគ្រប់វិស័យ។
ឆ្លៀតក្នុងឱកាសនោះដែរ ឯកឧត្ដមទេសរដ្ឋមន្ត្រីបានជម្រាបជូនអំពីសមិទ្ធលផលរបស់ក្រសួង ក៏ដូចជា រាជរដ្ឋាភិបាលក្នុងការកសាង និងអភិវឌ្ឍជាមួយដៃគូអភិវឌ្ឍន៍លើគម្រោងពង្រឹង ពង្រីក និងលើកកម្ពស់ គុណភាពផ្លូវជាតិសំខាន់ៗពីផ្លូវកៅស៊ូពីរស្រទាប់ស្តើង(DBST) ទៅជាផ្លូវបេតុកៅស៊ូ(AC) និងពង្រីកផ្លូវពី ពីរគន្លងទៅបួនគន្លង ការសាងសង់ផ្លូវល្បឿនលឿនភ្នំពេញ-ខេត្តព្រះសីហនុ ការស្ដារផ្លូវដែក និងការចុះហត្ថលេខាលើអនុស្សរណៈយោគយល់ ជាមួយប្រទេសថៃទាក់ទងនឹងការដឹកជញ្ជូនតាមផ្លូវរថភ្លើងឆ្លង កាត់ព្រំដែន ការពង្រីកកំពង់ផែកុងតឺន័រក្រុងភ្នំពេញ និងក្រុងព្រះសីហនុ និងយន្តការទប់ស្កាត់ និងលុប បំបាត់រថយន្តកែច្នៃខុសលក្ខណៈបច្ចេកទេស និងរថយន្តដឹកជញ្ជូនលើសទម្ងន់កម្រិតកំណត់ជាដើម។
ឯកឧត្ដមទេសរដ្ឋមន្ត្រីបានថ្លែងអំណរគុណ និងកោតសរសើរយ៉ាងជ្រាលជ្រៅចំពោះ កងកម្លាំងនគរបាល ជាតិ ដែលបានលះបង់យ៉ាងធំធេងក្នុងកិច្ចការពារសន្តិសុខ សុវត្ថិភាពសាធារណៈជូនបងប្អូនប្រជាពល រដ្ឋ ក្នុងឱកាសបុណ្យភ្ជុំបិណ្ឌ។
ដោយឡែក ថ្លែងទៅកាន់អង្គពិធីទាំងមូលនាឱកាសនោះដែរ ឯកឧត្តមនាយឧត្តមសេនីយ៍សន្តិបណ្ឌិត បានលើកឡើងអំពីប្រវត្តិ និងរចនាសម្ព័ន្ធដឹកនាំរបស់កងកម្លាំងនគរបាលជាតិដែលរួមមាន៖ ភារកិច្ចសំខាន់ៗ ក្នុងកិច្ចការពារបូរណភាពទឹកដីនៅតាមព្រំដែនទឹកនិងព្រំដែនគោក ដោយរួមសហការជាមួយកងយុទ្ធ ពលខេមរភូមិន្ទ ដើម្បីបង្ក្រាបបទល្មើសឆ្លងដែន ការពារសន្តិសុខជាតិ និងការពារសន្តិសុខសណ្ដាប់ធ្នាប់សង្គម។
ទេសរដ្ឋមន្ដ្រី ស៊ុន ចាន់ថុល បានគូសបញ្ជាក់ថា យានដ្ឋានកែច្នៃរថយន្ដខុសច្បាប់ទាំងអស់នេះ ក៏ជាដើមចមដែលនាំឲ្យមានគ្រោះថ្នាក់ចរាចរណ៍ និងបង្កលក្ខណៈឲ្យរថយន្ដដឹកលើសចំណុះផងដែរ ដូច្នេះដើម្បីធានាសុវត្ថិភាពចរាចរណ៍ និងកុំឲ្យយានយន្ដកែច្នៃខុសលក្ខណៈបច្ចេកទេស មានបើកលើផ្លូវបន្ដទៀត ត្រូវតែអនុវត្តពីដើមទីតែម្ដង។
ក្នុងជំនួបដែលមានការចូលរួមពីថ្នាក់ដឹកនាំនគរបាលពាក់ព័ន្ធជាច្រើនរូបទៀតផងនោះ នាយឧត្តមសេនីយ៍ សន្ដិបណ្ឌិត នេត សាវឿន បានទទួលយកសំណើនេះដោយក្ដីរីករាយ និងដាក់បទបញ្ជាភ្លាមៗ ទៅនាយកដ្ឋានជំនាញ ស្នងការរាជធានី-ខេត្តទាំង២៥ ត្រូវសហការជាមួយមន្ទីរសាធារណការ ដើម្បីចុះពិនិត្យ និងបង្ក្រាបទីតាំងកែច្នៃយានយន្ដខុសច្បាប់ឲ្យអស់ពីមូលដ្ឋាន។
បន្ថែមពីលើនេះ ឯកឧត្តម នាយឧត្តមសេនីយ៍ សន្តិបណ្ឌិត បានប្តេជ្ញាចូលរួមសហការជាមួយក្រសួង សាធារណការ និងដឹកជញ្ជូនអនុវត្តការកាត់ទ្រុងយានយន្តដឹកជញ្ជូនលើសទម្ងន់កម្រិតកំណត់ និងបិទ យានដ្ឋានជួសជុលកែច្នៃយានយន្តខុសច្បាប់ ដោយសហការជាមួយអាជ្ញាធរខេត្ត មន្ទីរសាធារណការ និងដឹកជញ្ជូន និងរួមគ្នាអប់រំប្រជាពលរដ្ឋដើម្បីកាត់បន្ថយគ្រោះថ្នាក់ចរាចរណ៍។
ឯកឧត្តម នាយឧត្តមសេនីយ៍ សន្តិបណ្ឌិត បានថ្លែងអំណរគុណយ៉ាងជ្រាលជ្រៅដល់ឯកឧត្តមទេស រដ្ឋមន្ត្រី ដែលបានសហការយ៉ាងជិតស្និទ្ធ និងជួយជ្រោមជ្រែងទាំងស្មារតីនិងសម្ភារដល់កិច្ចការរបស់កង កម្លាំងនគរបាលជាតិ ជាពិសេស ការដឹកនាំរបស់ឯកឧត្តមទេសរដ្ឋមន្ត្រីក្នុងនាមជាអនុប្រធានអចិន្ត្រៃយ៍ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក ធ្វើឲ្យកិច្ចការរឹតបន្តឹងចរាចរណ៍ផ្លូវគោកទទួលបានជោគជ័យគួរឱ្យកត់សម្គាល់ និងបានស្នើសុំឱ្យបន្តកិច្ចសហការល្អនេះជាបន្តទៀត។
នាយឧត្តមសេនីយ៍ នេត សាវឿន បានថ្លែងយ៉ាងដូច្នេះថា «ចំពោះសំណើនេះ សូមឲ្យស្នងការរាជធានី-ខេត្ត សហការជាមួយមន្ទីរសាធារណការ ធ្វើសេនាធិការជូនគាត់ ហើយចាប់ដៃគាត់ធ្វើរឿងនេះ (យានដ្ឋានកែច្នៃរថយន្ដខុសច្បាប់)។ យើងឯកភាពគ្នាក្រោមការដឹកនាំរបស់សម្ដេចក្រឡាហោម ក្រោមការដឹកនាំរបស់ទេសរដ្ឋមន្ដ្រី យើងប្ដេជ្ញាចិត្តថាត្រូវតែដោះពីដើមទី បានន័យថា កន្លែងជួសជុល កន្លែងធ្វើយានកែច្នៃ»។
នាយឧត្តមសេនីយ៍ អគ្គស្នងការនគរបាលជាតិ បានដាក់បញ្ជាទៅកាន់ស្នងការខេត្តទាំងអស់ថា មកទល់ម៉ោងនេះ មិនមែនជាពេលវេលាត្រូវអប់រំ ម្ចាស់ទីតាំងដែលគ្មានច្បាប់អនុញ្ញាតទៀតនោះទេ គឺត្រូវអនុវត្តតាមផ្លូវច្បាប់ ហើយប្រសិនបើម្ចាស់ទីតាំងមិនអនុវត្តទៀត គឺត្រូវឃាត់ខ្លួនម្ចាស់ទីតាំងនោះ ដើម្បីកសាងសំណុំរឿងបញ្ជូនទៅតុលាការតែម្ដង។
បន្ថែមពីនេះ នាយឧត្តមសេនីយ៍ នេត សាវឿន ក៏បានសំណូមពរដល់ទេសរដ្ឋមន្ដ្រី ស៊ុន ចាន់ថុល សូមណែនាំបន្ថែមទៅកាន់មន្ទីរសាធារណការរាជធានី-ខេត្ត ដើម្បីឲ្យអ្នកឯកទេស ទៅគ្រប់គ្រង និងណែនាំអំពីបច្ចេកទេសដល់ទីតាំងយានដ្ឋានតែម្ដង ដើម្បីកាត់បន្ថយហានិភ័យ។ នាយឧត្តមសេនីយ៍ អះអាងថា ការងារនេះ គឺត្រូវតែរួមគ្នារវាងជំនាញសាធារណការ និងកងកម្លាំងទើបអាចអនុវត្តបានជោគជ័យ៕
