(ភ្នំពេញ)៖ នៅព្រឹកថ្ងៃទី២៧ ខែសីហា ឆ្នាំ២០២០ ក្រុមការងាររដ្ឋបាលខណ្ឌសែនសុខ សហការជាមួយមន្ទីរសាធារណការរាជធានីភ្នំពេញ បានបន្តចុះត្រួតពិនិត្យទីតាំងយានដ្ឋានជួសជុលរថយន្តបានចំនួន ១៥ទីតាំង ក្នុងនោះមានច្បាប់ចំនួន ០២ទីតាំង និងគ្មានច្បាប់ចំនួន ១៣ទីតាំងត្រូវបានផ្អាកជាបណ្តោះអាសន្ន។ សូមជម្រាបថា កាលពីដើមសប្តាហ៍នេះ អាជ្ញាធរបានចុះបិទអាជីវកម្មទីតាំងយានដ្ឋានកែច្នៃ និងជួសជុលរថយន្តខុសច្បាប់ចំនួនជាង ៤០ទីតាំង ក្នុងចំណោមយានដ្ឋានសរុបចំនួន១១០ទីតាំង ក្នុងខណ្ឌសែនសុខ រាជធានីភ្នំពេញ។ ការរឹតបន្តឹងច្បាប់នេះ ធ្វើឡើងតាមលិខិតលេខ៥១៥ ចុះថ្ងៃទី ៣០ ខែកក្កដា ឆ្នាំ២០២០ របស់គណៈកម្មធិការជាតិសុវត្ថិភាពចរាចរណ៍ផ្លូវគោក ដែលបានណែនាំគ្រប់រាជធានី-ខេត្ត ចុះត្រួតពិនិត្យ និងបិទទីតាំងយានដ្ឋានកែច្នៃ យានដ្ឋានដែលគ្មានច្បាប់អនុញ្ញាត នៅក្នុងភូមិសាស្រ្តរាជធានីភ្នំពេញ-ខេត្តរបស់ខ្លួនអោយបានទាំងស្រុង។ ពិសេសថ្មីៗនេះ ដោយយោងទៅតាមការណែនាំនេះ និងស្របតាមអនុសានស៍ណែនាំបន្ថែមពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ សូមបញ្ជាក់ដែរថា យានដ្ឋានជួសជុលថយន្តក្នុងរាជធានីភ្នំពេញសរុបមានចំនួន៩៧១ គ្មានច្បាប់អនុញ្ញាតចំនួន ៣៩០ទីតាំង យានដ្ឋានកែច្នៃរថយន្តចំនួន ២៤ទីតាំង គ្មានច្បាប់អនុញ្ញាតចំនួន ២២ទីតាំង ក្នុងនោះយានដ្ឋានស្ថិតក្នុងខណ្ឌសែនសុខមាន ១១០ទីតាំង និងគ្មានច្បាប់អនុញ្ញាតជាង ៤០ទីតាំង៕