ការរឹតបន្តឹងច្បាប់ចរាចរណ៍ផ្លូវគោក គឺត្រូវធ្វើឡើងនៅទូទាំងប្រទេស ហើយមិនមែនជាយុទ្ធសាស្ត្រកៀង គោបញ្ចូលក្រោលឡើយ ប៉ុន្តែដើម្បីសុខសុវត្ថិភាព និងវិបុលភាពរបស់បងប្អូនប្រជាពលរដ្ឋទូទៅ --- ថ្ងៃអង្គារ ៦រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១២ ខែឧសភា ឆ្នាំ២០២០ នៅទីស្ដីការ ក្រសួងសាធារណការ និងដឹកជញ្ជូន មានការរៀបចំសន្និសីទសារព័ត៌មានស្ដីពីការអនុវត្ត រឹតបន្តឹងច្បាប់ចរាចរណ៍ផ្លូវគោក ក្រោមអធិបតីភាព លោកជំទាវ មឹន មាណវី រដ្ឋលេខាធិការក្រសួង សាធារណការ និងដឹកជញ្ជូន និងជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក ឯកឧត្ដម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក និងឯកឧត្ដមនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ។ សន្និសីទសារព័ត៌មាននេះធ្វើឡើងដើម្បីបកស្រាយពន្យល់បន្ថែមនូវការរឹតបន្តឹងច្បាប់ចរាចរណ៍ផ្លូវគោក ក៏ដូចជាការស្រាយចម្ងល់នានារបស់បងប្អូនប្រជាពលរដ្ឋ ដែលបានលើកឡើងតាមបណ្ដាញសង្គម ជុំវិញបញ្ហាដែលកើតមានឡើងក្រោមការអនុវត្តច្បាប់ចរាចរណ៍ផ្លូវគោករបស់អាជ្ញាធរមានសមត្ថកិច្ច ផងដែរ។ លោកជំទាវអគ្គលេខាធិការបានឱ្យដឹងថា យើងបានធ្វើវិសោធនកម្មច្បាប់នេះលើកចុងក្រោយតាំងពីឆ្នាំ ២០១៧ មកម៉្លេះ និងធ្វើការចេញអនុក្រឹត្យលេខ៣៩ អនក្រ.ប្រក. ចុះថ្ងៃទី ១៧ ខែមីនា ឆ្នាំ២០២០ ស្តីពី ការកែសម្រួលអនុក្រឹត្យលេខ៤៤ អនក្រ.ប្រក ចុះថ្ងៃទី២១ ខែមីនា ឆ្នាំ២០១៧ ស្តីពីការពិន័យអន្តរការណ៍ ចំពោះអំពើល្មើសនឹងច្បាប់ចរាចរណ៍ផ្លូវគោក និងបានផ្សព្វផ្សាយជាសាធារណៈតាមគ្រប់រូបភាព និងចាប់ អនុវត្តផាកពិន័យអន្តរការណ៍ជាបន្តបន្ទាប់រហូតមក សំដៅឱ្យអ្នកប្រើប្រាស់ផ្លូវថ្នល់ទាំងអស់គោរពច្បាប់ ឱ្យបានម៉ឺងម៉ាត់ និងឈានទៅកាត់បន្ថយគ្រោះថ្នាក់ចរាចរណ៍ផ្លូវគោកឱ្យបានច្រើនបំផុត។ លោកជំទាវអគ្គលេខាធិការបានបន្តថា ការរឹតបន្តឹងច្បាប់ចរាចរណ៍ផ្លូវគោក និងការបង្កើនប្រាក់ផាកពិន័យ នេះគឺមិនមែនមានបំណងរកប្រាក់ចំណេញទេ ប៉ុន្ដែយើងចង់ឃើញអ្នកប្រើប្រាស់ផ្លូវទាំងឡាយទទួលបាន សុខសុវត្ថិភាព គ្មានគ្រោះថ្នាក់ របួស និងស្លាប់ ដោយហេតុថាគ្រោះមហន្តរាយទាំងនេះបានបន្សល់ទុក ពិការភាព ស្ត្រីមេម៉ាយ ពោះម៉ាយ និងកុមារកំព្រា ដែលធ្វើឱ្យងាយធ្លាក់ក្នុងភាពក្រីក្រ។ ជាមួយគ្នានោះផងដែរ លោកជំទាវរដ្ឋលេខាធិការ បានឱ្យដឹងថា៖ ការរឹតបន្តឹងច្បាប់ចរាចរណ៍ផ្លូវគោកនេះ ធ្វើឡើងនៅទូទាំងប្រទេសទាំងផ្លូវលំ និងផ្លូវជាតិ ដោយហេតុថា គ្រោះថ្នាក់ចរាចរណ៍មិនដែលប្រកាន់ថា កើតមានតែនៅតាមផ្លូវជាតិ ឬផ្លូវកៅស៊ូនោះទេ។ យ៉ាងណាមិញ ក្រោមដំបូលសុខសន្តិភាព ផ្លូវថ្នល់ខ្វាត់ ខ្វែង ប្រជាពលរដ្ឋមានមធ្យោបាយធ្វើដំណើរច្រើនបែបច្រើនយ៉ាង រាជរដ្ឋាភិបាលមានភារកិច្ចថែរក្សាសុខ សុវត្ថិភាពរបស់ពួកគាត់ដោយមិនប្រកាន់ទីកន្លែង និងពេលវេលាឡើយ។ លោកជំទាវអគ្គលេខាធិការបានគូសបញ្ជាក់ថា ឆ្នាំ២០២០នេះ គឺជាឆ្នាំដែលត្រូវរឹតបន្តឹងច្បាប់ចរាចរណ៍ ផ្លូវគោក ហើយមុននឹងប្រតិបត្តិការរឹតបន្តឹងច្បាប់ចរាចរណ៍នៅថ្ងៃទី០១ ខែឧសភា ឆ្នាំ២០២០នេះ ក្រសួង និងអាជ្ញាធរមានសមត្ថកិច្ចបានជូនដំណឹងដល់សាធារណជនតាំងពីដើមឆ្នាំមកម្ល៉េះ ដើម្បីឱ្យបងប្អូនប្រជា ពលរដ្ឋបានត្រៀមឯកសារផ្លូវច្បាប់បានគ្រប់គ្រាន់មុនពេលសមត្ថកិច្ចចុះធ្វើប្រតិបត្តិការ និងអាចចៀសផុត ពីការពិន័យនានា។ ឆ្លើយតបនឹងការចោទសួរអំពីការរឹតបន្តឹងច្បាប់ ពោលគឺយុទ្ធសាស្ត្រកៀងគោបញ្ចូលក្រោល លោកជំទាវ រដ្ឋលេខាធិការបានបកស្រាយថា ឆៀករថយន្តគឺជាកាតព្វកិច្ចផ្លូវច្បាប់របស់ម្ចាស់យានយន្ត ហើយការ ឆៀកនេះទៀតសោត ត្រូវតែធ្វើឡើងតាមកាលកំណត់របស់រថយន្តនីមួយៗ មិនមែនដល់ពេលរឹតបន្តឹងទើប យករថយន្តទៅឆៀកនោះទេ។ ការមិនយករថយន្តទៅឆៀក មិនត្រឹមតែគ្រោះថ្នាក់ចំពោះខ្លួនឯងនោះទេ ប៉ុន្តែវាបង្កគ្រោះថ្នាក់ដល់អ្នកដ៏ទៃផងដែរ។ ចំណែកឯការធ្វើបណ្ណបើកបរគឺជាកាតព្វកិច្ចរបស់អ្នកបើកបរ ព្រោះបណ្ណបើកបរជាភស្តុតាងបញ្ជាក់ពី សមត្ថភាពរបស់អ្នកបើកបរតាមប្រភេទយានយន្តនីមួយៗដែលកំណត់ដោយច្បាប់ មិនមែនជាការកៀង គោបញ្ចូលក្រោលតាមការចោទប្រកាន់នោះទេ ប៉ុន្តែដើម្បីសុវត្ថិភាពរួម។ ជាមួយគ្នានោះផងដែរ ឯកឧត្ដម ហ៊ឹម យ៉ាន បានឱ្យដឹងថា លទ្ធផលនៃការរឹតបន្តឹងច្បាប់ចរាចរណ៍ផ្លូវ គោករយៈពេល ១១ថ្ងៃ បានរកឃើញថា៖ មានបទល្មើសសរុបចំនួន ១៩.០០៤ករណី ក្នុងនោះម៉ូតូមាន ចំនួន៧៥% និងរថយន្តមានចំនួន២៥%។ ម៉្យាងវិញទៀត បើប្រៀបធៀបនឹងរយៈពេលដូចគ្នាក្នុងឆ្នាំ ២០១៩ មានការថយចុះចំនួន៥៤% ស្មើនឹង១២លើក អ្នកស្លាប់ថយចុះ១៦នាក់ ស្មើនឹង៩០% និងអ្នក របួសថយចុះ ៥៩នាក់ ស្មើនឹង ៥៣%។ លោកជំទាវរដ្ឋលេខាធិការបានអំពាវនាវឱ្យបងប្អូនប្រជាពលរដ្ឋទាំងអស់ចូលរួមជាមួយរាជរដ្ឋាភិបាល ដោយគោរពច្បាប់ចរាចរណ៍ផ្លូវគោកប្រកបដោយសតិសម្បជញ្ញៈខ្ពស់ និងត្រូវចងចាំថា៖ ប្រទេសមាន ច្បាប់ ប្រជាពលរដ្ឋមានវិន័យ នោះវានឹងនាំមកនូវសុខសន្តិភាព និងវិបុលភាពជាមិនខាន។ បើយើង គោរពច្បាប់ គ្មានសមត្ថកិច្ចណាមកផាកពិន័យយើងឡើយ៕