[Koh Santepheap] - ស្ថាប័នរដ្ឋចំនួន3 ចាប់ផ្តើមប្រើ QR CODE ដើម្បីគ្រប់គ្រងការងារ
2018-01-11
ទៅកាន់ទំព័រចុះផ្សាយក្នុង Koh Santepheap
រាជធានីភ្នំពេញ ៖ ការរីកចម្រើននៃវិស័យបច្ចេកវិទ្យាបានផ្ដល់ភាពងាយស្រួលកាន់តែប្រសើរឡើងសម្រាប់វិស័យសាធារណៈ និងឯកជនក្នុងការអនុវត្តការងារ និងអាជីវកម្ម ។ បច្ចុប្បន្ននេះ នៅកម្ពុជាមិនថាក្រុមហ៊ុន សហគ្រាស ឬស្ថាប័នរដ្ឋទេ កំពុងងាកមកប្រើបច្ចេកវិទ្យាដើម្បីបម្រើឲ្យផលប្រយោជន៍ខ្លួន ក្នុងនោះគេសង្កេតឃើញស្ថាប័នរដ្ឋចំនួន៣ រួមមាន ក្រសួងកសិកម្ម, ក្រសួងសាធារណការ និងក្រសួងរៀបចំដែនដី ដែលកំពុងផុសផុលជាងគេទៅលើការប្រើប្រព័ន្ធ QR Code ដើម្បីគ្រប់គ្រងការងារ ។ តើស្ថាប័នទាំងនោះប្រើប្រព័ន្ធ QR Code គ្រប់គ្រងទៅលើអ្វីខ្លះ ?
យោងតាមអនុប្រធានការិយាល័យភូតគាមអនាម័យ នៃអគ្គនាយកដ្ឋានកសិកម្ម លោក ហ៊ាន សេរីវុធ មានប្រសាសន៍កាលពីថ្ងៃទី១០ មករា ម្សិលមិញថា កាលពីពេលថ្មីៗនេះ ក្រសួងកសិកម្ម រុក្ខាប្រមាញ់ និងនេសាទ បានបើកកិច្ចប្រជុំពិភាក្សាស្ដីពីប្រព័ន្ធគ្រប់គ្រងការអនុវត្តកសិកម្មល្អតាមប្រព័ន្ធ QR Code នេះផងដែរ ដើម្បីផ្ដល់ព័ត៌មាន និងតាមដានប្រវត្តិ ក៏ដូចជាកំណត់អត្តសញ្ញាណផលិតផលកសិកម្ម ដែលលក់នៅទីផ្សារដោយមាន QR Code ហើយវាក៏ជាយន្តការក្នុងការត្រួតពិនិត្យ និងតាមដានកសិដ្ឋានដែលយល់ព្រមអនុវត្តកសិកម្មល្អ ។ ទោះបីយ៉ាងណា ក្រសួងពុំទាន់ប្រកាសដាក់ឲ្យដំណើរការនៅឡើយទេ ។
លោកថ្លែងថា ៖« អគ្គនាយកដ្ឋានមិនទាន់ដាក់ឱ្យអនុវត្តកសិកម្មនៅឡើយទេ នូវប្រព័ន្ធ QR Code នេះ ។ វាកំពុងស្ថិតក្នុងដំណាក់កាលរៀបចំ តែយ៉ាងណា លោករំពឹងថា អាចនឹងប្រើប្រាស់បាននាពេលឆាប់ៗ » ។
លោកបន្តថា ប្រព័ន្ធ QR Code នេះ វាជួយបានច្រើនទៅដល់អ្នកបរិភោគ ព្រោះប្រទេសផ្សេងៗនៅអាស៊ាន ក៏បានអនុវត្តច្រើនដែរ ។ ពេលអ្នកប្រើប្រាស់ ឬអ្នកបរិភោគទាំងអស់ឃើញមាន QR Code បិទនៅលើផលិតផល ពេលនោះនឹងបានដឹងពីប្រភពនៃការផលិតតាមរយៈស្កេន QR Code នេះ ។
លោកលើកឡើងថា ៖« បច្ចុប្បន្ន កម្ពុជា យើងអត់ទាន់មានផលិតផលកសិកម្មណាមួយ បិទ QR Code ទេ ។ ដូច្នេះ ទើបយើងរៀបចំបង្កើតឡើងដើម្បីលើកស្ទួយកសិផលរបស់កសិករ និងចូលរួមចំណែកឱ្យអ្នកបរិភោគទាំងអស់មានភាពជឿជាក់ និងជាផ្នែកមួយលើកទឹកចិត្តដល់កសិករដែលបានអនុវត្តកសិកម្មល្អឱ្យកើនឡើងបន្ថែមទៀត » ។
ចំណែកប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន លោក ហ៊ាង សុន្ធាយុត្តិ បានមានប្រសាសន៍ថា ក្រសួងបានប្រើបច្ចេកវិទ្យា QR Code នេះ ដើម្បីងាយស្រួលក្នុងការគ្រប់គ្រងយានយន្ដ ។ លោកថា ៖ «ស្លាកលេខរថយន្ត និងម៉ូតូ ដែលក្រសួងចេញឱ្យប្រើប្រាស់ដោយមានភ្ជាប់ជាមួយបច្ចេកវិទ្យា QR Code នេះ ដើម្បីផ្ទៀងផ្ទាត់ភាពត្រឹមត្រូវរបស់រថយន្ត និងម៉ូតូ, កាត់បន្ថយភាពភ័យព្រួយរបស់ប្រជាពលរដ្ឋពីការលួចស្លាកលេខ ។ លើសពីនេះ ផ្តល់ភាពងាយស្រួលដល់មន្ត្រីប៉ូលិសក្នុងការផ្ទៀងផ្ទាត់ ពេលមានបញ្ហាអ្វីមួយកើតឡើង » ។
លោកបញ្ជាក់ថា ៖« បន្ទាប់ពីក្រសួងចេញឱ្យប្រើប្រាស់ស្លាកលេខរថយន្ត និងម៉ូតូមាន QR Code កាលពីខែកក្កដា ឆ្នាំ២០១៧កន្លងទៅ មានទោចក្រយានយន្តជាង១០ម៉ឺនគ្រឿងហើយ ក្នុងនោះរថយន្តមានប្រមាណ៣,៥ម៉ឺនគ្រឿង និងម៉ូតូមានប្រហែល៧ម៉ឺនគ្រឿង ។ស្លាកលេខប្រើ QR Code នេះចែកជា២ប្រភេទ គឺ QR Code ប្រើនៅលើប័ណ្ណសម្គាល់ និង QR Code ប្រើលើស្លាកលេខរថយន្តនិងម៉ូតូ អាចបញ្ជាក់ភាពត្រឹមត្រូវស្របច្បាប់បានសម្រាប់អ្នកប្រើប្រាស់ » ។
ដោយឡែក ក្រសួងរៀបចំដែនដី នគរូបនីយកម្ម និងសំណង់ ក៏កំពុងរៀបចំប្រព័ន្ធគ្រប់គ្រងទិន្នន័យ និងប្រព័ន្ធផ្តល់ព័ត៌មានសង្ខេប តាមរយៈ QR Code នៅលើប័ណ្ណកម្មសិទ្ធិរបស់ប្រជាពលរដ្ឋផងដែរ ក្នុងគោលដៅងាយស្រួលគ្រប់គ្រង, កាត់បន្ថយបញ្ហាជម្លោះដីធ្លី, អំពើពុករលួយ និងកៀរគរចំណូលថវិកាជាតិ ។
ថ្លែងនៅក្នុងកិច្ចប្រជុំបូកសរុបលទ្ធផលការងារកន្លងមក លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី មានប្រសាសន៍ថា ដើម្បីឱ្យការគ្រប់គ្រងមានភាពងាយស្រួល និងអាចកាត់បន្ថយអំពើពុករលួយក្នុងការរកចំណូលចូលថវិកាជាតិ ក្រសួងនឹងដាក់ឲ្យដំណើរការប្រព័ន្ធ QR Code នៅលើប្លង់កម្មសិទ្ធិអចលនទ្រព្យ ។
លោកទេសរដ្ឋមន្ត្រីថ្លែងថា ៖« ការរៀបចំប្រព័ន្ធទិន្នន័យដី និងប្រព័ន្ធផ្តល់ព័ត៌មានសង្ខេប តាម QR Code លើប័ណ្ណកម្មសិទ្ធិនេះជាចំណុចសំខាន់ណាស់សម្រាប់ឆ្នាំ២០១៨ ដែលផ្ដល់ភាពងាយស្រួលដល់ការគ្រប់គ្រង, ធានាបាននូវសុវត្ថិភាព ហើយការបម្រើសេវាសាធារណៈរបស់យើងបានទៅដល់មនុស្សម្នាក់ៗ » ៕
