ថ្ងៃចន្ទ ៦រោច ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៣ ខែមេសា ឆ្នាំ២០២០ ថ្នាក់ដឹកនាំគ្រប់លំដាប់ថ្នាក់និងមន្ត្រីរាជការនៅតាមអង្គភាពនានាក្រោមទីស្ដីការក្រសួង មន្ទីររាជធានី-ខេត្ត និងអង្គភាពសាធារណៈទាំងអស់ក្រោមឱវាទក្រសួងសាធារណការ និងដឹកជញ្ជូន បានមកបំពេញការងារដូចសព្វដង ដោយអនុវត្តតាមអនុក្រឹត្យលេខ ៥០ អនក្រ.បក ចុះថ្ងៃទី០៨ ខែមេសា ឆ្នាំ២០២០ ស្ដីពីការលើកការឈប់សម្រាកការងាររបស់មន្ត្រីរាជការ និយោជិត កម្មករ នៅថ្ងៃទី១៣ ទី១៤ ទី១៥ និងទី១៦ ខែមេសា ឆ្នាំ២០២០ ដើម្បីរួមគ្នាទប់ស្កាត់ការរីករាលដាលនៃជំងឺឆ្លងកូវីដ-១៩។ ការមកបំពេញការងារនៅក្នុងកាលៈទេសៈនេះ បានស្តែងចេញពីឆន្ទៈ ក្រមសីលធម៌និងមនសិកាវិជ្ជាជីវៈ ការទទួលខុសត្រូវ ក៏ដូចជារួមចំណែកជាមួយរាជរដ្ឋាភិបាលដើម្បីប្រយុទ្ធប្រឆាំងទប់ស្កាត់ការរីករាលដាលជំងឺដ៏កាចសាហាវបំផុតនេះ សំដៅរក្សាបាននូវសុវត្ថិភាពសុខភាពសម្រាប់ខ្លួនឯង ឪពុកម្តាយ ក្រុមគ្រួសារ ញាតិមិត្ត មិត្តរួមការងារ និងអ្នកដ៏ទៃទៀត ពីជំងឺកូវីដ១៩។ ទោះជាយ៉ាងនេះក្ដី រាជរដ្ឋាភិបាលនឹងសងថ្ងៃឈប់សម្រាករយៈពេល៥ថ្ងៃនៃថ្ងៃធ្វើការ នៅពេលវេលាសមស្របណាមួយជូនបងប្អូនប្រជាពលរដ្ឋ និងមន្រ្តីរាជការវិញ ខណៈពេលដែលប្រទេសជាតិបានឆ្លងរួចផុតពីជំងឺនេះ។ ក្រសួងសូមថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំគ្រប់ជាន់ថ្នាក់ និងមន្ត្រីទាំងអស់ ដែលបានចូលរួមអនុវត្តយ៉ាងសកម្មតាមស្មារតីនៃអនុក្រឹត្យនេះ ហើយក៏សូមអំពាវនាវឱ្យមន្ត្រីទាំងអស់រក្សាក្បួនអនាម័យឱ្យបានស្អាតជានិច្ច ដោយគោរពតាមការណែនាំរបស់ក្រសួងសុខាភិបាល និងបទបញ្ជារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីបញ្ជៀសមហន្តរាយនានាដែលបណ្ដាលមកពីការចម្លងវីរុសកូវីដ-១៩ នេះ ៕