[Bayon TV] - អភិបាលខេត្ដព្រះសីហនុ ជំរុញឲ្យពន្លឿនការសាងសង់ផ្លូវជាង ៣០ ខ្សែ ឱ្យបានឆាប់
2020-03-13
ទៅកាន់ទំព័រចុះផ្សាយក្នុង Bayon TV
ព្រះសីហនុ ៖ កាលពីរសៀលថ្ងៃព្រហស្បតិ៍ទី ១២ មីនា រដ្ឋបាលខេត្ដព្រះសីហនុ ដឹកនាំដោយអភិបាល នៃគណៈអភិបាលខេត្ត រៀបចំបើកកិច្ចប្រជុំត្រួតពិនិត្យការស្ថាបនាហេដ្ឋារចនាសម្ព័ន្ធផ្លូវទាំង ៣៤ខ្សែ នៅក្នុងខេត្តព្រះសីហនុ នៅសាលាខេត្ត ព្រះសីហនុ ដោយមានការចូលរួមពី អាជ្ញាធរក្រុង ស្រុក មន្ទីរ អង្គភាពពាក់ព័ន្ធ កងវិស្វកម្ម និងក្រុមហ៊ុន ដែលទទួល ស្ថាបនាផ្លូវទាំង៨។
នៅក្នុងឱកាសនោះ ឯកឧត្តម គួច ចំរើន អភិបាលខេត្តព្រះសីហនុ មានប្រសាសន៍ថា តាមរបាយការណ៍របស់ក្រុមការងារ បច្ចេកទេសពិនិត្យឃើញថា មកដល់បច្ចុប្បន្នការងារស្ថាបនាផ្លូវទាំង ៣៤ ខ្សែ ជួបបញ្ហាប្រឈមមួយចំនួន និងជំរុញឱ្យ ក្រុមហ៊ុន និងកងវិស្វកម្មស្ថាបនាផ្លូវ ត្រូវពន្លឿនការសាងសង់ផ្លូវ និងដាក់លូឱ្យបានទ្វេដងទើបទាន់ពេលវេលា។ ការស្ថាបនាផ្លូវទាំង ៣៤ ខ្សែក្នុង ខេត្តព្រះសីហនុ ដែលប្រើពេល រយៈពេល ៨ខែ ដោយបានបើកការដ្ឋានកាលពីថ្ងៃទី ១៦ ខែវិច្ឆិកា ឆ្នាំ២០១៩ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រី មកដល់ពេលនេះការអនុវត្តការងារសាងសង់អស់ រយៈពេលជិត ៤ខែហើយ។
ឯកឧត្តម ក៏ស្នើសុំឱ្យក្រុមហ៊ុន និងកងវិស្វកម្មទាំង ៨ គិតពីបញ្ហាប្រព័ន្ធលូ ដោយត្រូវធ្វើការកែសម្រួលតាមបទដ្ឋាន បច្ចេកទេស និងតាមកិច្ចសន្យា និងបានជំរុញឱ្យក្រុមបច្ចេកទេសចុះពិនិត្យគ្រប់ការដ្ឋាន ប្រសិនបើរកឃើញថា ដាក់លូមិន មានលក្ខណៈ បច្ចេកទេសត្រឹមត្រូវតម្រូវឱ្យកាយចេញ ដោយបញ្ចៀសផលប៉ះពាល់ដល់លំនៅឋានប្រជា ពលរដ្ឋចេញ-ចូល ក៏ដូចជាការធ្វើដំណើរ។
ជាមួយគ្នានេះ ឯកឧត្តម បានប្រាប់ឱ្យក្រុមហ៊ុនសាងសង់ទាំង៨ ត្រូវសហការជាមួយក្រុមហ៊ុនអានកូ ផលិតទឹកស្អាត អង្គភាព រដ្ឋាករទឹកស្អាតខេត្ដ ក្រុមហ៊ុនខ្សែកាបអុបទិច និងអគ្គិសនីខេត្ត ដើម្បីការស្ថាបនាផ្លូវទាំង ៣៤ ខ្សែក្នុងក្រុងព្រះសីហនុ ឱ្យបានរលូនតាមការគ្រោងទុក។ ជាការឆ្លើយតប ក្រុមហ៊ុនទាំង៨ ក៏បានធានាការពន្លឿនដំណើរការសាងសង់ ដោយដាក់បន្ថែមកម្លាំង ដើម្បីស្ថាបនាផ្លូវ ចាក់បេតុង និងដាក់លូឱ្យបានទាន់តាមផែនការ៕
