កិច្ចប្រជុំស្ដីពីការត្រៀមរៀបចំដំណើរទស្សនកិច្ចទៅកាន់ខេត្តមណ្ឌលគិរីរបស់ក្រុមការងារស.ស.យ.ក នៃក្រសួងសាធារណការ និងដឹកជញ្ជូន --- ថ្ងៃអង្គារ ០២រោច ខែផល្គុន ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១០ ខែមីនា ឆ្នាំ២០២០ នៅ ទីស្ដីការក្រសួង ឯកឧត្ដម ប៉េង ពោធិ៍នា រដ្ឋលេខាធិការក្រសួងសាធារណការ និងដឹកជញ្ជូន និងជា ប្រធានផ្នែកការងាររដ្ឋបាល នៃស.ស.យ.ក វិស័យសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្ដីពីការត្រៀមរៀបចំដំណើរទស្សនកិច្ចទៅកាន់ ខេត្តមណ្ឌលគិរីរបស់ក្រុមការងារស.ស.យ.ក នៃក្រសួងសាធារណការ និងដឹកជញ្ជូន ដោយមានការចូល រួមពីសំណាក់សមាជិកសមាជិកាតាមផ្នែកនីមួយៗ។ កិច្ចប្រជុំនេះផ្ដោតជាសំខាន់លើការរៀបចំកម្មវិធី ការកំណត់ពេលវេលា ការកំណត់ទីតាំង និងសកម្មភាពបន្ទាប់បន្សំផ្សេងៗទៀត ដើម្បីជំរុញឱ្យការធ្វើដំណើរទស្សកិច្ចនេះពោរពេញទៅដោយសកម្មភាពរស់រវើក និងឆ្លុះបញ្ចាំងទៅនឹងកម្មវត្ថុនៃដំណើរទស្សកិច្ចនេះផងដែរ។ ឯកឧត្ដមរដ្ឋលេខាធិការបានលើកឡើងពីគម្រោងសកម្មភាព និងកម្មវិធីនានាដើម្បីឱ្យអង្គប្រជុំពិភាក្សា និង ចូលរួមជាយោបល់បន្ថែមលើចំណុចខ្វះខាត ព្រមទាំងស្នើឱ្យក្រុមការងារតាមផ្នែកនីមួយៗដែលទទួល បន្ទុកក្នុងការរៀបចំ ត្រូវរៀបចំគម្រោងឱ្យបានល្អិតល្អន់ថែមទៀត សំដៅឱ្យការរៀបចំដំណើរទស្សនកិច្ចនេះ មានលក្ខណៈគ្រប់ជ្រុងជ្រោយ និងទទួលបានលទ្ធផលខ្ពស់តាមការគ្រោងទុក៕