កិច្ចប្រជុំពិភាក្សាជាមួយភ្នាក់ងារតំណាងក្រុមហ៊ុននាវាស្តីពីការផ្តល់សេវាដល់ក្រុមហ៊ុននាវានៅក្នុងព្រះរាជាណាចក្រកម្ពុជា --- ថ្ងៃសុក្រ ១៣កើត ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៦ ខែមីនា ឆ្នាំ២០២០ នៅទីស្តីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាស្តីពីការផ្តល់សេវាដល់ក្រុមហ៊ុននាវា ដោយមានការចូលរួមពីសំណាក់ឯកឧត្តមអគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ លោកប្រធាននាយកដ្ឋាននាវាជំនួញសមុទ្រ អនុប្រធាននាយកដ្ឋាន និងមន្ត្រីជំនាញនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងភ្នាក់ងារតំណាងក្រុមហ៊ុននាវា។ កិច្ចប្រជុំនេះផ្តោតជាសំខាន់លើការរៀបចំបង្កើតសមាគមន៍ភ្នាក់ងារតំណាងក្រុមហ៊ុននាវា និងការផ្តល់សេវាដល់ក្រុមហ៊ុននាវា។ ឯកឧត្តមរដ្ឋលេខាធិការ បានស្នើឱ្យភ្នាក់ងារតំណាងក្រុមហ៊ុននាវាចងក្រងគ្នាបង្កើតជាសមាគមន៍ឡើង ដើម្បីងាយស្រួលក្នុងការបង្កើត និងបង្កើនទំនាក់ទំនង កិច្ចសហប្រតិបត្តិការរវាងភ្នាក់ងារតំណាងក្រុមហ៊ុននាវាជាមួយនិងរាជរដ្ឋាភិបាល ជាប្រភពលំហរូព័ត៌មានពីរាជរដ្ឋាភិបាលទៅកាន់ភ្នាក់ងារតំណាងក្រុមហ៊ុននាវា និងការផ្តល់ព័ត៌មានត្រឡប់និងទទួលបាននូវផលប្រយោជន៍សម្រាប់គ្រប់ក្រុមហ៊ុនជាសមាជិកផ្ទាល់។ ជាមួយគ្នានេះ ឯកឧត្តមរដ្ឋលេខាធិការបានគូសបញ្ជាក់ពីការយកកម្រៃសេវា ចំពោះក្រុមហ៊ុននាវាប្រកបដោយភាពមិនច្បាស់លាស់ និងប្រែប្រួលខ្លាំង រវាងភ្នាក់ងារតំណាងក្រុមហ៊ុននាវានីមួយៗ ដែលបណ្តាឱ្យតម្លៃនៃការដឹកជញ្ជូន នៅតែមានកម្រិតខ្ពស់ ជាហេតុធ្វើឱ្យក្រសួងបានផ្តួចផ្តើមឱ្យក្រុមហ៊ុនពិចារណាលើការកំណត់តារាងតម្លៃសេវាស្តង់ដាទៅដល់ក្រុមហ៊ុននាវា៕