កាលពីថ្ងៃចន្ទ ០៤រោច ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៣ ខែមករា ឆ្នាំ២០២០ មានបេសកកម្មដឹកនាំដោយឯកឧត្តម កឹម បូរី តំណាងដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ចុះពិនិត្យទីតាំង និងជំរុញពន្លឿនការអនុវត្តគម្រោងសាងសង់ស្ថានីយបូមទឹកកខ្វក់ចំនួន០៣ នៅឆ្នេរមាស អូរអេម៉ារីយូ និងឆ្នេរអូរត្រេះ និងកែលម្អស្ថានីយចាស់ចំនួនមួយកន្លែង ក្នុងក្រុងព្រះសីហនុ ខេត្តព្រះសីហនុ ដែលគម្រោងអនុវត្តដោយក្រសួងសាធារណការ និងដឹកជញ្ជូន ។ បេសកកម្មមានការចូលរួមអមដំណើរដោយ ឯកឧត្តម វង្ស ពិសិដ្ឋ អនុរដ្ឋលេខាធិការ ក្រសួងសាធារណការ និងដឹកជញ្ជូន និងមន្ត្រីបច្ចេកទេសពីនាយកដ្ឋានសំណង់ចម្រោះទឹកកខ្វក់ មន្ទីរសាធារណការ និងដឹកជញ្ជូនខេត្តព្រះសីហនុ នាយកដ្ឋានហេដ្ឋារចនាសម្ព័ន្ធសាធារណៈ និងតំណាងក្រុមហ៊ុនពាក់ព័ន្ធ។ ក្រោយពីការចុះពិនិត្យទីតាំងទាំង០៣រួចរាល់ ឯកឧត្តម កឹម បូរី ក៏បានដឹកនាំក្រុមការងារជួបប្រជុំពិភាក្សាជាមួយឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ពីវឌ្ឍនភាព និងការឯកភាពគាំទ្រលើគម្រោងទីតាំងទាំង០៣ ជាពិសេសទីតាំងស្ថានីយនៅឆ្នេរអូរត្រេះ និងការចុះពិនិត្យស្ថានីយប្រព្រឹត្តកម្មទឹកកខ្វក់ ពិនិត្យវឌ្ឍនភាពគម្រោងស្តារប្រឡាយអូរឈើទាល ប្រវែងជាង២៥០០០ម អនុវត្តដោយនាយកដ្ឋានសំណង់ប្រព័ន្ធចម្រោះទឹកកខ្វក់ និងមន្ទីរសាធារណការ និងដឹកជញ្ជូនខេត្តព្រះសីហនុ៕