ចូលរួមទស្សនា​ស្តង់បង្ហាញរបស់ក្រសួងសាធារណការ​ និងដឹកជញ្ជួន​ ក្នុងពិព័រណ៍ការងារលេីកទីពីរថ្ងៃនេះ នឹងមានឱកាសឆ្លេីយសំណួរឈ្នះមួកសុវត្ថិភាព​ --- ថ្ងៃសុក្រ ១២កើត ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១២ ខែមិថុនា ឆ្នាំ២០១៩ ក្រសួងសាធារណការ និងដឹកជញ្ជូន បានដាក់តាំងបង្ហាញប្រព័ន្ធបច្ចេកវិទ្យាព័ត៌មាន Mobile App នៅក្នុងពិព័រណ៍ការងារលើកទី២ ដែលរៀបចំឡើងដោយសាកលវិទ្យាល័យភូមិន្ទភ្នំពេញ ក្នុងគោលបំណង ដើម្បីផ្សព្វផ្សាយលើកកម្ពស់សុវត្ថិភាពចរាចរណ៍ តាមរយៈកម្មវិធីបច្ចេកវិទ្យាព័ត៌មាន និងចែករំលែក ចំណេះដឹងទូលំទូលាយ ដល់សិស្ស-និស្សិត ដែលមកពីបណ្តាសាកលវិទ្យាល័យនានា ក្នុងរាជធានីភ្នំពេញ។ ការដាក់តាំងបង្ហាញប្រព័ន្ធបច្ចេកវិទ្យាសំខាន់ៗ មានដូចជា កម្មវិធីយល់ដឹងអំពីទ្រឹស្តីនៃការបើកបរ (Cambodia Driving Rules) កម្មវិធីថែទាំផ្លូវ (ROAD CARE Mobile App) និងកម្មវិធីព័ត៌មានសាធារណការ និងដឹកជញ្ជូន (MPWT News) បានរៀបចំដោយ មណ្ឌលផ្តល់ប្រឹក្សាយោបល់ លើសេវាសាធារណៈ របស់ក្រសួងសាធារណការ និងដឹកជញ្ជូន ដែលកំពុងដើរតួនាទីយ៉ាងសំខាន់ ក្នុងការចូលរួមចំណែក ផ្តល់ព័ត៌មាន និងដោះស្រាយបញ្ហាកង្វល់របស់ប្រជាពលរដ្ឋក្នុងការផ្តល់សេវាសាធារណៈ។ សូមជម្រាបជូនផងដែលថា ការដាក់តាំងបង្ហាញនូវកម្មវិធី Mobile App របស់ក្រសួង ក្នុងពិព័រណ៍ការងារ លើកទី២នេះ បានទទួលការចាប់អារម្មណ៍ពីសំណាក់ សិស្ស-និស្សិត និងសាធារណជនទូទៅ ដែលអាច ផ្តល់នូវចំណេះដឹងនានា អំពីច្បាប់ចរាចរណ៍ផ្លូវគោក ទទួលបានព័ត៌មានទូទៅក្នុងវិស័យសាធារណការ និងដឹកជញ្ជូន និងរបៀបប្រើប្រាស់កម្មវិធីរាយការណ៍ពីផ្លូវខូច (គ្រលុកសំបុកមាន់) ដើម្បីធ្វើការ ជួសជុលបានទាន់ពេលវេលា ព្រមទាំងទទួលបានរង្វាន់មួកសុវត្ថិភាព ពីការលេងល្បែងកំសាន្ត យ៉ាងសប្បាយរីករាយ។