គិតត្រឹមដំណាច់ខែមិថុនា ឆ្នាំ២០២៦នេះ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមឥណទានសម្បទានរបស់ធនាគារពិភពលោក(WB) នៅក្នុងក្រុងសៀមរាប ខេត្តសៀមរាប សម្រេចវឌ្ឍនភាពសាងសង់ប្រមាណ ៩០,៣៤%ហើយ សៀមរាប៖ នាថ្ងៃទី១០ ខែកក្កដា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំគណ:ប្រតិភូក្រសួង អមដំណើរដំណើរទស្សនកិច្ចរបស់គណៈប្រតិភូធនាគារពិភពលោក(WB) ដែលដឹកនាំដោយលោក Guangzhe Chen (Vice President for Planet) អមដំណើរដោយលោកស្រី Julia Fraser (ប្រធានតំណាងប្រចាំតំបន់ អាស៊ីប៉ាស៊ីហ្វិច) ដើម្បីចុះពិនិត្យវឌ្ឍនភាពការងាររបស់គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមឥណទានសម្បទានរបស់ធនាគារពិភពលោក(WB) នៅក្នុងក្រុងសៀមរាប ខេត្តសៀមរាប ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ លោកអភិបាលរង នៃគណៈអភិបាលខេត្តសៀមរាប ប្រធានមន្ទីរសាធារណការ និងដឹកជញ្ជូន ខេត្តសៀមរាប និងមន្ត្រីបច្ចេកទេស ប្រធានគ្រប់គ្រងគម្រោង និងក្រុមការងារសមាជិកគម្រោង ទីប្រឹក្សាបច្ចេកទេសគម្រោង តំណាងក្រុមហ៊ុនសាងសង់ ក្រុមការងារធនាគារពិភពលោក និងអាជ្ញាធរដែនដីពាក់ព័ន្ធ។ ដំណើរទស្សនកិច្ចនេះធ្វើឡើងដើម្បីចុះពិនិត្យវឌ្ឍនភាពការងាររបស់គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមឥណទានសម្បទានរបស់ធនាគារពិភពលោក(WB) នៅក្នុងក្រុងសៀមរាប ខេត្តសៀមរាប។ សូមបញ្ជាក់ផងដែរថា បណ្តាញលូខ្នែង ខ្នែងរង ប្រវែងប្រមាណ ៥៥,២៥ គីឡូម៉ែត្រ ត្រូវបានសាងសង់រួច ដែលស្មើនឹង ៩២,០៨% នៃគោលដៅប្រវែង ៦០ គីឡូម៉ែត្រ តាមរយៈអនុគម្រោង MPWT-CW-1A ៖ ការងារសាងសង់បណ្តាញលូខ្នែង ខ្នែងរង និងតំណភ្ជាប់តាមផ្ទះមានប្រវែង ២៨,២៣៦គ.ម អនុគម្រោង MPWT-CW-3 ៖ ការងារស្ដារធ្វើឱ្យប្រសើរឡើងវិញស្ថានីយបូមទាំងបីទីតាំង (វត្តចក សាលាកន្សែង និងជន្លង់) អនុគម្រោង MPWT-CW-4 ៖ ការងារស្ដារធ្វើឱ្យប្រសើរឡើងវិញស្ថានីយប្រព្រឹត្តកម្មទឹកកខ្វក់នៅក្នុងសង្កាត់ស្វាយដង្គំ សង្កាត់សាលាកំរើក និងសង្កាត់សំបួរ អនុគម្រោងMPWT-CW-6A ៖ ការងារសាងសង់បណ្តាញលូខ្នែង និងខ្នែងរងមានប្រវែង ១៧,៥៧៧គ.ម តំណភ្ជាប់តាមផ្ទះ និងសាងសង់ស្ថានីយបូមថ្មីចំនួនពីរទីតាំង និងអនុគម្រោង MPWT-CW-9 ៖ ការងារសាងសង់បណ្តាញលូខ្នែង និងខ្នែងរងមានប្រវែង៦,៥០គ.ម និងតំណភ្ជាប់តាមផ្ទះ ចំនួន ៤៦៧តំណ នៅក្រុងសៀមរាប ខេត្តសៀមរាប។ គិតត្រឹមថ្ងៃទី៣០ ខែមិថុនា ឆ្នាំ២០២៦ មានប្រជាពលរដ្ឋប្រមាណ ២២,៧០៧ នាក់ ដែលស្មើនឹង ៩៨.៧៣% នៃគោលដៅរបស់គម្រោងចំនួន ២៣,០០០នាក់ ដែលស្ត្រីមានប្រមាណ ១១,១៣០នាក់ ក្នុងនោះមានប្រជាពលរដ្ឋប្រមាណ ១៩៥នាក់ ជាប្រជាពលរដ្ឋស្ថិតក្នុងស្ថានភាពក្រីក្រ (ID-poor 1 និង ID-poor 2) និងប្រជាពលរដ្ឋចំនួន ២៦៨ នាក់ ជាប្រជាពលរដ្ឋស្ថិតក្នុងស្ថានភាពមានពិការភាព និងស្ត្រីមេម៉ាយ បានទទួលសេវាអនាម័យ តាមរយៈការតភ្ជាប់ទៅប្រព័ន្ធលូទឹកកខ្វក់ក្នុងគម្រោងដោយឥតគិតថ្លៃ៕