ប្រជាពលរដ្ឋបានសម្តែងនូវក្តីរីករាយជាខ្លាំងចំពោះសម្មិទ្ធិផលអភិវឌ្ឍថ្មីមួយទៀតហើយនោះ គឺស្ពានឆ្លងទន្លេបាសាក់ ចាក់អង្រែក្រោម ព្រែកប្រា ដែលកំពុងសម្រេចលទ្ធផលស្ថាបនាបាន៧៩%។ប្រជាពលរដ្ឋ មានលំនៅដ្ឋានជិតស្ពាន និងអ្នកតែងតែធ្វើដំណើរឆ្លងកាត់តំបន់នោះ ពិតជារំភើបចំពោះសម្មិទ្ធិផលថ្មីៗរបស់ជាតិដែលកំពុងបន្តកកើតមានជាបន្តបន្ទាប់ស្របពេលដែលប្រទេសជាតិក៏កំពុងឋិតក្នុងការអភិវឌ្ឍន៍ក្រោមម្លប់នៃសុខសន្តិភាពផងនោះដែរ។ ពួកគាត់រំពឹងខ្ពស់ថាស្ពានឆ្លងទន្លេនេះនឹងដើរតួនាទីសំខាន់ក្នុងការជួយដល់លំហូរចរាចរណ៍ដែលកំពុងតែមមាញឹកខ្លាំងក្នុងពេលបច្ចុប្បន្ននិងជាចរន្តតភ្ជាប់និងជាសសៃឈាមដឹកជញ្ជូនដ៏សំខាន់មួយរបស់រាជធានីភ្នំពេញដែលជាបេះដូងនៃប្រទេសជាតិផងដែរ។ផ្អែកតាមមន្ត្រីជំនាញជាន់ខ្ពស់ នៃក្រសួងសាធារណការ និងដឹកជញ្ជូន គិតត្រឹមដើមខែកក្កដាឆ្នាំ២០២៦នេះ គម្រោងស្ថាបនាស្ពានឆ្លងទន្លេបាសាក់ ចាក់អង្រែក្រោម ព្រែកប្រា សម្រេចបាន ៧៩ % ដោយក្នុងនោះដែរ វឌ្ឍនភាពគម្រោងរួមមាន៖ ១.ផ្នែកគ្រឹះស្ពានសម្រេច១០០% ២. រចនាសម្ព័ន្ធក្រោមស្ពានសម្រេចបាន១០០ % ៣ . រចនាសម្ព័ន្ធលើនៃស្ពានតភ្ជាប់សម្រេចបាន១០០% ៤ .រចនាសម្ព័ន្ធលើនៃស្ពានមេសម្រេចបាន៨៤% និង៥ .បណ្តាញផ្លូវសម្រេចបាន៥១% (ផ្លូវតភ្ជាប់ប្រវែង ៨០៤,៣០ សម្រេចបាន៥០% និងផ្លូវបង្វែរទិស( Ram) ប្រវែង១,៥៤១ម. សម្រេចបាន៥០%)។យ៉ាងណាមិញ ស្ពានឆ្លងទន្លេបាសាក់ ចាក់អង្រែក្រោម ព្រែកប្រា ត្រូវបានសម្ពោធបើកការដ្ឋានសាងសង់កាលពីថ្ងៃទី១៩ ខែកុម្ភៈ ឆ្នាំ២០២៤ កន្លងទៅ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតីហ៊ុនម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ សម្រាប់ស្ពានឆ្លងកាត់ទន្លេបាសាក់ (ចាក់អង្រែក្រោម–ព្រែកប្រា) ជាស្ពានទី៧តាមដងទន្លេបាសាក់បន្ទាប់ពីស្ពានដែលបានសាងសង់រួចទាំង៦រួមមានស្ពានឆ្លងកោះពេជ្រ កោះនរា ស្ពានព្រះមុនីវង្សទាំង២ស្ពានសំរោងស្ពានកោះអន្លង់ចិន និងស្ពានកោះធំ៕