ខេត្តកំពង់ស្ពឺ៖ ស្ពានបេតុងពីរកន្លែងដែលធ្វើជំនួសស្ពានចាស់ ស្ថិតនៅភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ បានបើកឱ្យប្រជាពលរដ្ឋជិះឆ្លងកាត់បណ្តោះអាសន្ន ទ្បើងទៅឧទ្យានជាតិគិរីរម្យ កាលពីថ្ងៃទី១៥កុម្ភៈ ឆ្នាំ២០២៥...។ ក្រសួងសាធារណការ និងដឹកជញ្ជូន គូសបញ្ជាក់ថា ការបើកឱ្យឆ្លងកាត់បណ្តោះអាសន្ននេះ ជាផ្នែកមួយសម្រួលដល់ការធ្វើដំណើររបស់បងប្អូនប្រជាពលរដ្ឋ ទៅទស្សនាកម្សាន្តព្រឹត្តិការណ៍បុណ្យភ្នំ ពីថ្ងៃទី១៥ដល់១៦កុម្ភៈ ឆ្នាំ២០២៥។ គម្រោងស្ថាបនាស្ពានបេតុង២កន្លែងនេះរួមមាន៖ ស្ពានទី១ ប្រវែង១៨ម៉ែត្រ ទទឹង៩ម៉ែត្រ និងស្ពានទី២ ប្រវែង៣៦ម៉ែត្រ ទទឹង៩ម៉ែត្រ។ស្ពានទាំងពីរនេះ សម្រេចការសាងសង់ជិត១០០ភាគរយហើយ គ្រោងបញ្ចប់នៅចុងខែមីនាឆ្នាំ២០២៥នេះ និងដាក់ដំណើរការប្រើប្រាស់ជាផ្លូវការនៅមុនពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខ៕