សិក្ខាសាលាផ្សព្វផ្សាយស្តីពីការអនុវត្តគម្រោងអភិវឌ្ឍន៍ស្ថាប័នសម្រាប់អង្គភាពគ្រប់គ្រងប្រព័ន្ធចម្រោះទឹកកខ្វក់ខេត្តសៀមរាប (២០២៤-២០២៥) នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមហិរញ្ញប្បទានដោយធនាគារពិភពលោក ភ្នំពេញ៖ នាថ្ងៃសុក្រ ទី១២ ខែធ្នូ ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីភាពបើកសិក្ខាសាលាផ្សព្វផ្សាយស្តីពីការអនុវត្តគម្រោងអភិវឌ្ឍន៍ស្ថាប័នសម្រាប់អង្គភាពគ្រប់គ្រងប្រព័ន្ធចម្រោះទឹកកខ្វក់ខេត្តសៀមរាប (២០២៤-២០២៥) នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមហិរញ្ញប្បទានដោយធនាគារពិភពលោក ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ លោកប្រធានគ្រប់គម្រោង និងមន្ត្រីសមាជិកអង្គភាពគ្រប់គ្រងគម្រោងនៃក្រសួងសាធារណការ និងដឹកជញ្ជូន លោក-លោកស្រី តំណាងមន្ទីរ និងអង្គភាពគ្រប់គ្រងប្រព័ន្ធចម្រោះទឹកកខ្វក់ខេត្តសៀមរាប បាត់ដំបង ពោធិ៍សាត់ និងខេត្តកណ្ដាល ក្រុមការងារតំណាងធនាគារពិភពលោក (WB) ក្រុមហ៊ុនទីប្រឹក្សាបច្ចេកទេស SUEZ Consulting (SAFEGE) MPWT-CS-4A និងទីប្រឹក្សាជាតិ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP)។ សិក្ខាសាលានេះរៀបចំឡើងក្នុងគោលបំណងដើម្បីផ្សព្វផ្សាយអំពីលទ្ធផល ព្រមទាំងការចែករំលែកនូវបទពិសោធន៍ និងឯកសារពាក់ព័ន្ធនានា នៃការងារអភិវឌ្ឍស្ថាប័នរបស់អង្គភាពគ្រប់គ្រងប្រព័ន្ធចម្រោះទឹកកខ្វក់ក្នុងខេត្តសៀមរាប ទៅដល់ភាគីពាក់ព័ន្ធ រួមមាន៖ អាជ្ញាធរមូលដ្ឋាននៅក្នុងខេត្តសៀមរាប មន្ទីរ និងអង្គភាពគ្រប់គ្រងប្រព័ន្ធចម្រោះទឹកកខ្វក់ ដែលអញ្ជើញមកពីរាជធានី-ខេត្ត ក្រុងគោលដៅ ក្នុងការតម្រង់ទិសការអនុវត្តផែនការយុទ្ធសាស្ត្ររយៈពេលវែង និងផែនការកែលម្អការអនុវត្តដោយផ្ទាល់ ឱ្យទទួលបានជោគជ័យ និងលទ្ធផលល្អប្រសើរ ប្រកបដោយចីរភាព និងបរិយាបន្ន៕