ឯកឧត្តម ឈួន វិន ប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី អញ្ជើញជាអធិបតីកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅអនុវត្តការងារបន្ត ឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី មណ្ឌលគិរី៖ នាថ្ងៃសុក្រ ទី១២ ខែធ្នូ ឆ្នាំ២០២៥ ឯកឧត្តម ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅអនុវត្តការងារបន្តឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ដែលបានប្រព្រឹត្តទៅនៅសាលាខេត្តមណ្ឌលគិរី ដោយមានវត្តមានចូលរួមពី ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី ឯកឧត្តម ថង សាវុន អភិបាលនៃគណៈអភិបាលខេត្ត និងជាអនុប្រធានអចិន្រ្តៃយ៍ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ឯកឧត្តមអនុប្រធានក្រុមការងារ និង ឯកឧត្តម លោកជំទាវ លោក លោកស្រី ដែលជាសមាជិក សមាជិកា នៃក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី និងមន្ត្រីពាក់ព័ន្ធពីគ្រប់អង្គភាពជុំវិញខេត្តជាច្រើនរូបផ្សេងទៀត។ លទ្ធផលការងារប្រចាំឆ្នាំ២០២៥ ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានចូលរួមគាំទ្រ និងអនុវត្តកម្មវិធីគោលនយោបាយអាទិភាពទាំង៦ និងវិធានការគន្លឹះទាំង៥ របស់រាជរដ្ឋាភិបាល នីតិកាលទី៧ នៃរដ្ឋសភា រួមទាំងការគាំទ្រ និងជំរុញការអនុវត្តគោលនយោបាយភូមិ ឃុំ សង្កាត់មានសុវត្ថិភាព កំណែទម្រង់វិមជ្ឈការ និងវិសហមជ្ឈការ ការផ្តល់សេវាជូនប្រជាពលរដ្ឋតាមយន្តការច្រកចេញចូលតែមួយ។ ក្នុងនោះ កម្មវិធីគោលនយោបាយអាទិភាពទាំង៦ ដែលក្រុមការងាររាជរដ្ឋាភិបាលចុះមូលដ្ឋានបានចូលរួមគាំទ្រ និងចូលរួមអនុវត្ត រួមមាន៖ (១). ការពង្រើកសេវាថែទាំសុខភាព (២).ការបណ្ដុះបណ្ដាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន១,៥លាននាក់ (៣).ការធ្វើស្ថាបនូបនីយកម្មវិធីជាតិជំនួយសង្គមសម្រាប់គ្រួសារក្រីក្រ ក្រុមជនងាយរងគ្រោះនៅក្នុងគ្រួសារក្រីក្រ និងគ្រួសារងាយរងហានិភ័យ (៤).ការអនុវត្តយុទ្ធសាស្រ្តស្តីពីការអភិវឌ្ឍសេដ្ឋកិច្ចក្រៅប្រព័ន្ធ (៥).ការរៀបចំយន្តការសម្របសម្រួល និងកម្មវិធីហិរញ្ញប្បទាន និង (៦).ការដាក់ពង្រាយមន្ត្រីបច្ចេកទេសកសិកម្មក្នុងគ្រប់ឃុំ សង្កាត់។ បន្ថែមពីនេះ ក្នុងរយៈពេល១២ខែកន្លងមកនេះ ក្រុមការងារសម្រេចបានសមិទ្ធផលសំខាន់ៗជាច្រើនរួមមាន៖ (១).សក្តានុពលតំបន់ទេសចរណ៍ក្នុងខេត្ត(ផ្តោតលើស្រុកចំនួន៣គឺស្រុកកែវសីមា កោះញែក និងស្រុកពេជ្រាដា ដែលកន្លងទៅបានចែករំលែកក្រុងស្រុកចំនួន២ រួចមកហើយ (២).ការធ្វើបច្ចុប្បន្នភាពទៅលើបញ្ហាដីធ្លី (៣).ការផ្តល់សេវាសុខាភិបាលតាមមូលដ្ឋានក្នុងខេត្ត (៤).បណ្ណការងារ ការបណ្តុះបណ្តាលវិជ្ជាជីវៈ និងពលករត្រឡប់មកពីប្រទេសថៃ (៥).គោលនយោបាយវិស័យកសិកម្ម អំពីទីផ្សារកសិកម្ម តួនាទីភារកិច្ចមន្ត្រីកសិកម្មឃុំសង្កាត់ និងបញ្ហាប្រឈម (៦).បញ្ហាប្រឈម និងសំណូមពរ ក្នុងការរៀបចំបណ្តាញអគ្គិសនីក្នុងតំបន់ដាច់ស្រយោល ព្រមទាំងបានផ្សព្វផ្សាយមាតិកាជាប្រចាំក្នុងផេក និងគ្រុបតេឡេក្រាមរាល់សកម្មភាពការងាររបស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី។ ឆ្លៀតក្នុងឱកាសនេះ ឯកឧត្តមប្រធាន បានសម្តែងនូវការអបអរសាទរលើសមិទ្ធផលទាំងអស់ និងថ្លែងអំណរគុណចំពោះក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់ និងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ នៅខេត្តមណ្ឌលគិរី បានប្រឹងប្រែងរួមគ្នាក្នុងការបំពេញភារកិច្ចទៅតាមតួនាទីរៀងៗខ្លួន ដែលនាំឱ្យក្រុមការងាររាជរដ្ឋាភិបាលចុះមូលដ្ឋានរបស់ខេត្ត ទទួលបានលទ្ធផលជាច្រើនកន្លងមក។ ជាពិសេសលើសកម្មភាពរបស់ក្រុមការងាររាជរដ្ឋាភិបាលចុះមូលដ្ឋានទាំងអស់ ដែលបានចុះធ្វើវេទិកាសាធារណៈថ្នាក់ជាតិ តាមលំដាប់ថ្នាក់នីមួយៗ ទទួលបានលទ្ធផលល្អប្រសើរតាមផែនការគ្រោងទុក ព្រមទាំងក្តាប់បាននូវបញ្ហាប្រឈម តម្រូវការ និងចម្ងល់នានារបស់ប្រជាពលរដ្ឋ និងការដោះស្រាយតាមលទ្ធភាព និងសមត្ថកិច្ចរបស់ខ្លួន ចំណែកបញ្ហាដែលនៅសេសសល់មួយចំនួន ក្រុមការងារបានត្រួតពិនិត្យ និងពិគ្រោះយោបល់ជាមួយក្រសួង ស្ថាប័នពាក់ព័ន្ធ និងភាគីពាក់ព័ន្ធដើម្បីដោះស្រាយបន្តទៀត។ លទ្ធផលទាំងនេះ គឺជាសក្ខីភាពបញ្ជាក់ឱ្យឃើញនូវការសហការួមគ្នារបស់ក្រុមការងារ ក្នុងការបំពេញភារកិច្ចទទួលបានលទ្ធផលល្អប្រសើរខ្ពស់ តាមរយៈមានផែនការច្បាស់លាស់ មានសកម្មភាពសកម្មនិងបុរេសកម្ម បំពេញភារ កិច្ចដោយមិនខ្លាចនឿយហត់ ដែលបានដោះស្រាយទុក្ខលំបាក និងកខ្វល់របស់ប្រជាពលរដ្ឋបានទាន់ពេលវេលា។ ទន្ទឹមនឹងនេះផងដែរ ឯកឧត្តមប្រធាន បានជំរុញឱ្យក្រុមការងាររាជរដ្ឋាភិបាលចុះមូលដ្ឋានទាំងអស់ បន្តយកចិត្តទុកដាក់អនុវត្តតួនាទី ភារកិច្ច សេចក្តីណែនាំរបស់រាជរដ្ឋាភិបាលដែលបានដាក់ចេញកន្លងមក និងផែនការសកម្មភាពឱ្យទទួលបានប្រសិទ្ធភាព ព្រមទាំងដាក់ទិសដៅបន្ត មួយចំនួនដូចជា៖ (១).ការធ្វើបច្ចុប្បន្នភាពក្រុមការងារ (២).លទ្ធផលពាក់ព័ន្ធការអនុវត្តអាទិភាពគោលនយោបាយទាំង៦ វិធានការគន្លឹះទាំង៥ និង អាទិភាពគន្លឹះទាំង៥ របស់រាជរដ្ឋាភិបាល (៣).តារាងតាមដានផែនការរួមអនុវត្តការងារ (៤).ការចែករំលែកបទពិសោធន៍ និងការប្រើយន្តការដោះស្រាយ (៥).ឯកសារជំនួយស្មារតីចុះធ្វើវេទិកាសាធារណៈ (៦).ការបណ្តុះបណ្តាលសមត្ថភាពលេខាធិការដ្ឋាន និងបច្ចេកទេសបណ្តាញសង្គម និងថតរូប (៧).ការចែកពូជកូនឈើហូបផ្លែ (៨).ការចុះពិនិត្យ ព្យាបាលភ្នែក និងកាត់វ៉ែនតា (៩).ការចុះពិនិត្យព្យាបាលជំងឺទូទៅនៅតាមទីដាច់ស្រយោលជូនប្រជាពលរដ្ឋ (១០).ការទប់ទំនប់ ឬអាងស្ទាក់ទឹកតូចៗ នៅតាមភូមិ ឬតាមតំរូវការជាក់ស្តែងរបស់ប្រជាពលរដ្ឋ (១១).ការចែកចង្ក្រានបង្កើនថាមពលជូនគ្រួសារ (១២).ចុះជួបប្រជាពលរដ្ឋតាមតំបន់ដាច់ស្រយោល (១៣).ការចុះទស្សនកិច្ចតាមវិស័យអាទិភាពទាំង៥ (កសិកម្ម សុខាភិបាល បរិស្ថាន ទេសចរណ៍ និងអប់រំ) (១៤).រៀបចំផ្ទាំង QR Code ទីតាំងទេសចរណ៍ (១៥).ការចុះផ្ទាល់ជំរុញការចុះបញ្ជីអ្នកសេដ្ឋកិច្ចក្រៅប្រព័ន្ធ (១៦).បន្តកៀរគរសាងសង់អគារសម្រាលកូននៅតាមមន្ទីរពេទ្យ និង(១៧).ជំរុញគាំទ្រផ្សារផលិតផលជនជាតិ៕