កិច្ចប្រជុំពិភាក្សាត្រួតពិនិត្យលើពង្រាងចុងក្រោយផែនទីបណ្ដាញផ្លូវថ្នល់ឆ្នាំ២០២០ តាមរយៈប្រព័ន្ធវីដេអូពីចម្ងាយ ដឹកនាំដោយឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន ថ្ងៃចន្ទ ៨កើត ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៣ ខែតុលា ឆ្នាំ២០២២ នៅទីស្តីការក្រសួង ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកជាប្រធានក្រុមការងាររៀបចំផែនទីបណ្ដាញផ្លូវថ្នល់ឆ្នាំ២០២០ បានអញ្ជើញដឹកនាំកិច្ចប្រជុំពិភាក្សាត្រួតពិនិត្យលើពង្រាងចុងក្រោយផែនទីបណ្ដាញផ្លូវថ្នល់ឆ្នាំ២០២០ ដោយមានការចូលរួមពីថ្នាក់ដឹកនាំក្រសួង មន្ទីរសាធារណការ និងដឹកជញ្ជូនរាជធានី-ខេត្ត ព្រមទាំងមន្ត្រីបច្ចេកទេសជំនាញប្រមាណ៧០រូប តាម រយៈប្រព័ន្ធវីដេអូពីចម្ងាយ។ ថ្លែងក្នុងឱកាសនោះ ឯកឧត្តមរដ្ឋលេខាធិការប្រធានអង្គប្រជុំ បានគូសបញ្ជាក់ពីការរីកចម្រើនឥតឈប់ឈរនៃបណ្ដាញផ្លូវថ្នល់របស់កម្ពុជាពីមួយឆ្នាំទៅមួយឆ្នាំ ដែលចាំបាច់ត្រូវរៀបចំ និងធ្វើបច្ចុប្បន្នភាពផែនទី បណ្ដាញផ្លូវថ្នល់ឱ្យបានត្រឹមត្រូវជារៀងរាល់៥ឆ្នាំម្ដង ក្នុងទិសដៅលើកកម្ពស់ទិន្នន័យផ្លូវថ្នល់ឱ្យកាន់តែមានភាពសុក្រឹត្យភាព ងាយស្រួលក្នុងការគ្រប់គ្រង ជួសជុល និងថែទាំប្រកបដោយប្រសិទ្ធភាព។ អង្គប្រជុំបានពិភាក្សាអំពីការប្រើប្រាស់ទិន្នន័យផ្លូវថ្នល់ដែលអនុវត្តតាមអនុក្រឹត្យឆ្នាំ២០១៦ស្ដីពីបែបបទ និងនីតិវិធីនៃការដាក់ឈ្មោះផ្លូវ ឬលេខផ្លូវ និងការកែប្រែឈ្មោះផ្លូវឈរលើមូលដ្ឋានចាស់ឆ្នាំ១៩៦៩ ដោយ ផ្លូវវាងថ្មីតាមទីប្រជុំជន រាជធានី-ខេត្ត ត្រូវកំណត់លេខថ្មីតាមវិធីសាស្ត្រនៃការដាក់លេខផ្លូវ និងការចុះស្រង់ ទិន្នន័យរបស់ក្រសួងស្ថាប័នពាក់ព័ន្ធលើបណ្ដាញផ្លូវខេត្តដែលមិនមានភាពច្បាស់លាស់ក្នុងដែនសមត្ថកិច្ច និងផ្ទៀងផ្ទាត់គ្រប់ខ្សែផ្លូវក្នុងភូមិសាស្ត្ររបស់ខ្លួនដើម្បីដាក់បញ្ចូលជាទិន្នន័យតាមលទ្ធភាព។ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់សមាជិកសមាជិកាក្រុមការងាររៀបចំផែនទីបណ្ដាញផ្លូវថ្នល់ឆ្នាំ២០២០ទាំងអស់ ជាពិសេសមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត ដែលបានខិតខំប្រឹងប្រែងបំពេញការងារនេះបានល្អប្រសើរ។ សូមបញ្ជាក់ជូនថា៖ ក្រសួងសាធារណការ និងដឹកជញ្ជូន កំពុងធ្វើបច្ចុប្បន្នភាពបញ្ជីសារពើភណ្ឌបណ្ដាញ ផ្លូវជាតិ ផ្លូវខេត្ត និងផ្លូវថ្នល់ផ្សេងទៀតក្រោមការគ្រប់គ្រងរបស់ខ្លួនឱ្យបានត្រឹមត្រូវ និងរៀបចំចេញជាផែនទីបណ្ដាញផ្លូវឱ្យបានគ្រប់ជ្រុងជ្រោយ ដើម្បីធានាបាននូវការគ្រប់គ្រងប្រកបដោយប្រសិទ្ធភាព និងការទទួលខុសត្រូវ៕