ភ្នំពេញ៖ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូននារសៀល ថ្ងៃពុធ ទី០៦ ខែកក្កដា ឆ្នាំ២០២២នេះ បានអញ្ជើញដឹកនាំកិច្ចប្រជុំប្រចាំខែមិថុនា និងលើកទិសដៅប្រចាំខែកក្កដា របស់វិទ្យាស្ថានតេជោសែន សាធារណការ និងដឹកជញ្ជូន ដែលមានការចូលរួមពី លោកស្រីនាយិការង លោក លោកស្រីប្រធាននាយកដ្ឋាន លោកអនុប្រធាននាយកដ្ឋាន លោក លោកស្រីប្រធាន អនុប្រធានការិយាល័យ មន្ត្រីរាជការ មន្ត្រីកិច្ចសន្យា និងបុគ្គលិកកិច្ចសន្យាទាំងអស់ នៃវិទ្យាស្ថាន។ នាឱកាសនោះ ឯកឧត្ដមនាយកវិទ្យាស្ថាន បានថ្លែងអំណរគុណដល់ថ្នាក់ដឹកនាំ និងមន្ត្រីរាជការទាំងអស់គ្រប់នាយកដ្ឋាន ដែលបានខិតខំប្រឹងប្រែងបំពេញការងារ ប្រកបដោយការទទួលខុសត្រូវខ្ពស់ និងទទួលបានលទ្ធផលគួរជាទីគាប់ប្រសើរ។ ជាមួយគ្នានោះឯកឧត្តមក៏បានអនុញ្ញាតជូន លោក លោកស្រី ប្រធាននាយកដ្ឋាន ឡើងរាយការណ៍ជូនអង្គប្រជុំ ដើម្បីជ្រាបនូវសកម្មភាពដែលបានអនុវត្ត ព្រមទាំងលើកឡើងអំពីបញ្ហាប្រឈម និងសំណូមពរផ្សេងៗ។ ឯកឧត្តមនាយកក៏បានផ្តាំផ្ញើជូន ថ្នាក់ដឹកនាំ មន្ត្រីរាជការ គ្រប់លំដាប់ថ្នាក់ ព្រមទាំងមន្ត្រីកិច្ចសន្យា និងបុគ្គលិកកិច្ចសន្យា គឺត្រូវតែខិតខំប្រឹងប្រែងបំពេញការងារ សហការ និងចូលរួមបំពេញការងារក្នុងនាមជាគ្រួសាររបស់វិទ្យាស្ថានតែមួយ ដើម្បីទទួលបាននូវលទ្ធផលល្អប្រសើរផ្សេងៗបន្ថែមទៀត។ គួរបញ្ជាក់ផងដែរថា ជាលទ្ធផលកិច្ចប្រជុំបានពិនិត្យ ពិភាក្សាលើលទ្ធផល ព្រមទាំងដោះស្រាយលើសំណូមមួយចំនួនមួយចំនួន ដែលដាក់ក្នុងរបៀបវារៈ កិច្ចប្រជុំប្រចាំខែរបស់វិទ្យាស្ថានផងដែរ៕