ព្យុហយាត្រា «ដើរដើម្បីសន្តិភាព March for Peace» របស់មហាគ្រួសារខ្មែរ ក្នុងបរិយាកាសពោរពេញដោយក្ដីសង្ឃឹម ក្ដីជឿជាក់ និងស្មារតីសាមគ្គីភាពជាតិ! រាជធានីភ្នំពេញ៖ នារសៀលថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងលោកជំទាវ បានអញ្ជើញចូលរួមក្នុងកម្មវិធី «ដើរដើម្បីសន្តិភាព March for Peace» ក្រោមអធិបតីភាព ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) ដែលជាការដើរថ្មើរជើងចម្ងាយ ៣គីឡូម៉ែត្រ គិតចាប់ពីផ្សាររាត្រីមុខមាត់ទន្លេ រហូតដល់វិមានឯករាជ្យ។ «ដើរដើម្បីសន្តិភាព March for Peace» ជាការដើរព្យុហយាត្រាដើម្បីសន្តិភាព បង្ហាញទៅពិភពលោកថា យើងឱ្យតម្លៃសន្តិភាព យើងត្រូវការសន្តិភាព យើងស្រលាញ់សន្តិភាព និងរួមគ្នាថែរក្សាសន្តិភាពដែលយើងមានឱ្យបានគង់វង្ស ជាពិសេសជំរុញឱ្យមានការគោរពបទឈប់បាញ់ និងកិច្ចព្រមព្រៀងសន្ដិភាព រវាងព្រះរាជាណាចក្រកម្ពុជា និងព្រះរាជាណាចក្រថៃ។ « អត់មានពេលណាមួយដែលខ្មែរមានការរួបរួម សាមគ្គី ដូចក្នុងពេលបច្ចុប្បន្ននេះទេ! » មកទល់ពេលនេះយើងបានយល់កាន់តែច្បាស់ពីកម្លាំងនៃការរួបរួមរបស់ប្រជាជនខ្មែរ មិនថាកាលៈទេសលំបាកយ៉ាងណា យើងនៅតែបន្តរួមរួបគ្នា ជាក់ស្តែងដូចពេលបច្ចុប្បន្នដែលយើងកំពុងជួបប្រទះ ជួរមុខការពារនូវអ្វីដែលជាដែនអធិបតេយ្យភាពរបស់ព្រះរាជាណាចក្រកម្ពុជា ហើយជួរក្រោយនៅតែបន្តគាំទ្រ និងកម្លាំងចិត្តពីចម្ងាយ៕