ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញចូលរួមកិច្ចប្រជុំពិនិត្យ ពិភាក្សា ផ្តល់យោបល់ និងសម្រេចលើសេចក្តីព្រាងលិខិតបទដ្ឋានគតិយុត្ត បទដ្ឋានបច្ចេកទេស និងបទប្បញ្ញតិ្តពាក់ព័ន្ធនឹងវិស័យសំណង់ (ក.ជ.ប.ស.) ទីស្តីការក្រសួងរៀបចំដែនដី នគរូបនីយកម្ម និងសំណង់៖ នាព្រឹកថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញចូលរួមកិច្ចប្រជុំពិនិត្យ ពិភាក្សា ផ្តល់យោបល់ និងសម្រេចលើសេចក្តីព្រាងលិខិតបទដ្ឋានគតិយុត្ត បទដ្ឋានបច្ចេកទេស និងបទប្បញ្ញតិ្តពាក់ព័ន្ធនឹងវិស័យសំណង់ (ក.ជ.ប.ស.) ក្រោមអធិបតីភាព ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធាន ក.ជ.ប.ស. ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង អង្គភាពពាក់ព័ន្ធ និងមន្រ្តីបច្ចេកទេសជាច្រើនរូប។ កិច្ចប្រជុំនេះមានគោលបំណងពិនិត្យ ពិភាក្សា ផ្ដល់យោបល់ និងសម្រេចលើសេចក្តីព្រាងលិខិតបទដ្ឋានគតិយុត្ត បទដ្ឋានបច្ចេកទេស និងបទប្បញ្ញត្តិពាក់ព័ន្ធនឹងវិស័យសំណង់ក្នុងនោះរួមមាន បទដ្ឋានបច្ចេកទេសលើគ្រឿងផ្គុំ មូលដ្ឋានគ្រឹះនៃការគណនាគ្រឿងផ្គុំ និងភូគព្ភសាស្ត សុវត្ថិភាពគ្រឿងផ្គុំសំណង់ គោលការណ៍ណែនាំ ស្តីពីការគ្រប់គ្រង និងការធានាគុណភាពសំណង់ ផែនការសកម្មភាព សម្រាប់ការកាត់បន្ថយគ្រោះថ្នាក់សំណង់ឆ្នាំ២០២៦-២០២៨ និងផែនការគោលការណ៍ណែនាំបច្ចេកទេស ស្តីពីវិធីសាស្ត្រអនុវត្តការងាររុះរើសំណង់ និងគោលការណ៍ណែនាំបច្ចេកទេសពាក់ព័ន្ធមួយចំនួនទៀត៕