ការសាងសង់ផ្លូវក្រវាត់​ក្រុងទី៣ ដែលចំណាយទំហំទឹកប្រាក់ចំនួន ៣០០ លានដុល្លារ សម្រេចបាន ៥០ ភាគរយគិតត្រឹមដើមខែឧសភានេះ ខណៈដែលការសាងសង់គ្រោងនឹងបញ្ចប់នៅឆ្នាំក្រោយ។ នេះបើតាមការឲ្យដឹងពី លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន។ ផ្លូវក្រវាត់ក្រុងដែលមានប្រវែងសរុប ៥២,៩៨៣ គីឡូម៉ែត្រនេះចាប់ផ្តើមពីចំណុចផ្លូវជាតិលេខ៤ ក្នុង ខណ្ឌពោធិ៍សែនជ័យ រាជធានីភ្នំពេញ ឆ្លងកាត់ផ្លូវជាតិលេខ៣ ផ្លូវជាតិលេខ២ ឆ្ពោះទៅផ្លូវជាតិលេខ១ ក្នុងស្រុកកៀនស្វាយ ខេត្តកណ្ដាល តភ្ជាប់ទៅកាន់ចំណតផែកុងតឺន័រថ្មីរបស់កំពង់ផែស្វ័យតភ្នំពេញ។ លោក ហ៊ាង សុទ្ធាយុត្តិ បានបញ្ជាក់ថាការស្ថាបនាផ្លូវនេះនឹងរួចរាល់នៅខែកញ្ញា ឆ្នាំ​ក្រោយ។ ផ្លូវក្រវាត់ក្រុងខ្សែទី ៣ នេះមានផ្លូវមេប្រវែង ៤៧,៦០៨គីឡូម៉ែត្រ ជាប្រភេទផ្លូវក្រាលបេតុង ស៊ីម៉ង់ត៍សរសៃដែក និងផ្លូវខ្នែងប្រវែង ៥,៣៧៥គីឡូម៉ែត្រ ជាប្រភេទផ្លូវក្រាលបេតុងកៅស៊ូ(AC)។ លោក ហ៊ាង សុទ្ធាយុត្តិ បន្តថា បើគ្មានអ្វីប្រែប្រួល​ទេ គម្រោងនេះ​នឹងរួចរាល់តាមការគ្រោងទុក។ លោកថា៖ «ដំណើរការសាងសង់នៅតែបន្ត បើទោះបីជាមានការគំរាមកំហែងដោយវីរុសកូវីដ-១៩ ក៏ដោយ ខណៈដែលទាំងក្រុមហ៊ុនសំណង់ និងក្រុមហ៊ុនប្រឹក្សាបច្ចេកទេសបានប្រកាន់ខ្ជាប់នូវគោលការណ៍ណែនាំរបស់ក្រសួងសុខាភិបាលក្នុងការប្រយុទ្ធប្រឆាំងនឹងជម្ងឺកូវីដ-១៩»។ ផ្លូវនេះនឹងចូលរួមចំណែកផ្នែកសេដ្ឋកិច្ចដល់វិស័យដឹកជញ្ជូនតភ្ជាប់​ផ្លូវជាតិលេខ៦ លេខ៥ លេខ៤, លេខ៣, លេខ២ និង​លេខ១ ដើម្បីបង្កើតការតភ្ជាប់បណ្ដាញផ្លូវថ្នល់។ កំណាត់ផ្លូវនេះក៏នឹងតភ្ជាប់ផ្លូវ អាស៊ានហាយវេ និងផ្លូវដែលជាច្រករបៀងសេដ្ឋកិច្ចសំខាន់ៗជាច្រើនទៀតនៃអនុតំបន់មេគង្គដែលរួមចំណែកដល់ការសម្រួលដល់ការដឹកជញ្ជូនឆ្លងកាត់ព្រំដែន ជំរុញពាណិជ្ជកម្ម និងភ័ស្តុភារអន្តរជាតិ។ ជាមួយគ្នានេះផងដែរ កំណាត់ផ្លូវនេះនឹងប្រែក្លាយទីតាំងដីនៅសងខាងផ្លូវទៅជាតំបន់សក្តានុពលលំនៅដ្ឋាន ភ័ស្តុភារ និងតំបន់អភិវឌ្ឍន៍ឧស្សាហកម្ម៕