សៀមរាប ថ្ងៃទី០៤ ខែមីនា ឆ្នាំ២០២១ -- នៅក្នុងឱកាសចុះត្រួតពិនិត្យការដ្ឋានស្ថាបនាផ្លូវចំនួន៣៨ខ្សែនៅក្រុងសៀមរាបខេត្តសៀមរាប នារសៀលថ្ងៃ៥រោច ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃពុធ ទី០៣ ខែមីនា ឆ្នាំ២០២១ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង បានវាយតម្លៃខ្ពស់ចំពោះវឌ្ឍនភាព នៃកិច្ចដំណើរការការដ្ឋានស្ថាបនាផ្លូវ៣៨ខ្សែនេះ។ នៅក្នុងដំណាក់កាលនៃការអនុវត្តគម្រោងនេះ សម្តេចពិជ័យសេនាបានណែនាំឱ្យអង្គភាពស្ថាបនាផ្លូវទាំងអស់ត្រូវយកចិត្តទុកដាក់ការសាងសង់ស្រទាប់គ្រឹះផ្លូវប្រកបដោយគុណភាព ដែលតម្រូវឱ្យមានការគោរពតាមបទដ្ឋានបច្ចេកទេសសាងសង់ ចៀសវាងការសាងសង់រួច ត្រូវគាស់កកាយ ជួសជុលឡើងវិញ ដែលនាំឱ្យខាតបង់ថវិកា និងពេលវេលា។ ជាមួយគ្នានោះសម្តេចពិជ័យសេនា ទៀ បាញ់ ក៏បានសុំឱ្យប្រជាពលរដ្ឋទាំងអ្នករស់នៅក្រុងសៀមរាប ក៏ដូចជាអ្នកមកកម្សាន្ត មេត្តាយោគយល់ និងអធ្យាស្រ័យចំពោះផលរំខាននានាដែលកើតចចេញពីគម្រោងស្ថាបនាផ្លូវទាំង ៣៨ខ្សែ ក្នុងក្រុងសៀមរាបនេះ។ ​ព្រោះថាការងារស្ថាបនាផ្លូវ គឺយើងចៀសមិនផុតឡើយពីការប៉ះពាល់ ដល់អារម្មណ៍របស់ប្រជាជនមហាជនដែលបានធ្វើចរាចរណ៍ទៅមក និងអ្នកមានលំនៅឋានតាមដងផ្លូវទាំងនេះផងដែរ។ ដូច្នេះសុំមានការយោគយល់អធ្យាស្រ័យ អត់ធ្មត់ ចំពោះការរំខាន និងផលប៉ះពាល់ដោយសារដំណើរការការដ្ឋានសាងសង់ដោយតម្រូវឱ្យបិទចរាចរណ៍ជាបណ្តោះអាសន្ន ដើម្បីសម្រួលដល់ដំណើរការសាងសង់ រៀបចំដាក់បណ្តាញលូទឹកភ្លៀង និងលូទឹកកខ្វក់ ទឹកស្អាត បណ្តាញអគ្គិសនី និង ខ្សែកាប។ ក្រោយពេលស្ថាបនាផ្លូវទាំង៣៨ខ្សែរួចរាល់ ក្រុងសៀមរាបនឹងលើកកម្ពស់សោភណភាពបន្ថែមទៀត ស័ក្ដិសមជាទីក្រុងទេសចរណ៍វប្បធម៌ ប្រវត្តិសាស្រ្ដ អភិវឌ្ឍន៍ជាទីក្រុងឆ្លាតវៃ នាពេលអនាគត ដើម្បីជួយជំរុញដល់កំណើនសេដ្ឋកិច្ចជាតិ៕