ព្រះសីហនុ ថ្ងៃទី១៣ ខែមីនា ឆ្នាំ២០២០-- នៅសាលាខេត្តព្រះសីហនុ រសៀលថ្ងៃព្រហស្បតិ៍ ៤រោច ខែផល្គុន ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១២ ខែមីនា ឆ្នាំ២០២០ ឯកឧត្តម គួច ចំរើន អភិបាលខេត្តព្រះសីហនុ បានដឹកនាំកិច្ចប្រជុំត្រួតពិនិត្យការស្ថាបនាហេ ដ្ឋារចនាសម្ព័ន្ធផ្លូវក្នុងក្រុងព្រះសីហនុ ចំនួន ៣៤ខ្សែ នៅខេត្តព្រះសីហនុ ។ កិច្ចប្រជុំនេះមានការចូលរួមពីក្រុមហ៊ុន និងកងវិស្វកម្មទាំង៨ក្រុមហ៊ុន អាជ្ញាធរក្រុង ស្រុក មន្ទី និងអង្គភាពពាក់ព័ន្ធក្នុងខេត្ត ។ តាមរបាយការណ៍របស់ក្រុមការងារបច្ចេកទេសពិនិត្យ នៃការស្ថាបនាផ្លូវទាំង ៣៤ខ្សែ និងការដាក់ប្រព័ន្ធលូ ឃើញថា មកដល់បច្ចុប្បន្នការងារស្ថាបនាផ្លូវទាំង ៣៤ខ្សែ មានការយឺតយ៉ាវ ។ ដោយឡែកក្រុមហ៊ុន ២ ក្នុងចំណោមក្រុមហ៊ុនទាំង៨ បានអនុវត្តន៍តាមផែនការ ដូច្នេះក្រុមហ៊ុន ៦ផ្សេងទៀតត្រូវបង្កើនការស្ថាបនាទេ្វដង ឬគុណនឹង៣ដងទើបសម្រេចតាមផែនការ ។ ដូច្នេះត្រូវពន្លឿនការសាងសង់ផ្លូវ និងដាក់លូឱ្យទាន់ពេលវេលា។ ការស្ថាននាផ្លូវ ៣៤ខ្សែក្នុងក្រុងព្រះសីហនុ ត្រូវប្រើពេលរយ:ពេល ៨ខែ ដែលបានបើកការដ្ឋានកាលពីថ្ងៃទី១៦ ខែវិច្ឆិកា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មកដល់ពេលនេះការអនុវត្តការងារសាងសង់អស់រយ:ពេលជិត ៤ខែហើយ ។ ក្រុមហ៊ុនទាំង៨ បានធានាការពន្លឿន នៃដំណើការសាងសង់ផ្លូវចាក់បេតុង និងដាក់លូឱ្យបានទាន់តាមផែនការ។ ដោយឡែកកងវិស្វកម្ម ១៧៨ បានបញ្ជាក់ថា នឹងបញ្ចប់ការដ្ឋាននៅចុងខែមេសា ឆ្នាំ២០២០នេះមុនផែនការ ។ ឯកឧត្តម គួច ចំរើន អភិបាលខេត្តព្រះសីហនុ បានធ្វើការណែនាំដល់ក្រុមហ៊ុន និងកងវិស្វកម្មទាំង៨ថា ទី១.ត្រូវពន្លឿនការសាងសង់ឱ្យបានទ្វេដង ព្រោះមានតែក្រុមហ៊ុន២ បានស្ថាបនា និងដាក់ប្រព័ន្ធលូតាមផែនការ ។ ចំពោះក្រុមហ៊ុន ៦ទៀត ការស្ថាននាផ្លូវ និងលូមិនទាន់តាមតម្រូវការ នៃរយ:ពេលសាងសង់ ៨ខែ ។ ទី២.បញ្ហាការកកស្ទះចរាចរណ៍នៅតាមការដ្ឋានមួយចំនួន ពិសេសការដ្ឋានផ្លូវឯករាជ្យ ក្រុមហ៊ុនចង់លឿន មិនបានគិតពីផលប៉ះពាល់ដល់ការធ្វើចរាចរណ៍ប្រសើប្រជាពករដ្ឋ ក៏ដូចជាការកាយដាច់ប្រព័ន្ធទឹកស្អាត ខ្សែកាបអគ្គិសនី កាបអុបទិចក្រោមដី ជាដើម ពិសេសត្រូវដាក់ស្លាកសញ្ញាចរាចរណ៍ឱ្យបានត្រឹមត្រូវ ។ ទី៣.ប្រពន្ធ័លូត្រូវធ្វើការកែសម្រួលតាមបទដ្ឋានបច្ចេកទេស និងតាមកិច្ចសន្យា និងបានជំរុញឱ្យក្រុមការងារបច្ចេកទេសចុះពិនិត្យគ្រប់ការដ្ឋានប្រសិនបើរកឃើញថាការដ្ឋានណាដាក់លូមិនមានលក្ខណៈ បច្ចេកទេសត្រឹមត្រូវ តម្រូវឱ្យកាយចេញ ធ្វើការដាក់លូសារជាថ្មី ។ ទី៤.បញ្ចៀសផលប៉ះពាល់ដល់លំនៅឋានប្រជាពលរដ្ឋចេញ-ចូល ក៏ដូចជាការធ្វើចរាចរណ៍ ។ ទី៥.ការស្ថាននាផ្លូវ លូ ត្រូវធ្វើតាមបទដ្ឋានបច្ចេកទេស ដូចជា ដែក បេតុង ត្រូវមានគុណភាព និងការស្រោចទឹក ។ល។ ឯកឧត្តម អភិបាលខេត្ត បានសំណូមពរឱ្យក្រុមហ៊ុនសាងសង់ទាំង៨ ត្រូវសហការជាមួយក្រុមហ៊ុនអាងកូ (ផលិតទឹកស្អាត) ក្រុមហ៊ុនខ្សែកាបអុបទិច និងខាងអគ្គិសនី ដើម្បីឱ្យការស្ថាបនាផ្លូវទាំង ៣៤ខ្សែក្នុងក្រុងព្រះសីហនុ ប្រព្រឹត្តទៅបានរលូនតាមការគ្រោងទុក និងមិនមានផលប៉ះពាល់ដល់ប្រជាពលរដ្ឋ និងភ្ញៀវទេសចរ ៕