នាថ្ងៃទី២ ខែធ្នូ ឆ្នាំ២០១៩ មានកិច្ចប្រជុំស្តីពីការត្រួតពិនិត្យ ពិភាក្សាផ្តល់យោបល់ លើរបាយការណ៍លទ្ធផលបឋមនៃគម្រោងសិក្សាសមិទ្ធិលទ្ធភាព និងផែនការមេអភិវឌ្ឍបណ្តាញលូទឹកកខ្វក់ និងលូទឹកភ្លៀង ដែលបានប្រារព្ធនាសាលប្រជុំខេត្តពីរផ្សេងៗគ្នាគឺ ខេត្តកំពត និងកែប។ កិច្ចប្រជុំមានការចូលរួមពី តំណាងអភិបាលនៃគណៈអភិបាលក្រុងកំពត និងក្រុងកែប ថ្នាក់ដឹកនាំនាយកដ្ឋានសំណង់ប្រព័ន្ឋចម្រោះទឹកកខ្វក់ និងជាតំណាងឯកឧត្តមអគ្គនាយកសាធារណការ មន្ទីរសាធារណការ និងដឹកជញ្ជូន មន្ទីរបរិស្ថាន មន្ទីរដែនដីនគររូបនីយ៍កម្ម មន្ទីរឧស្សាហកម្មនិងសិប្បកម្ម មន្ទីរទេសចរណ៍ មន្ទីរផែនការ និងអង្គភាពរដ្ឋាករទឹកខេត្តកំពត និង អង្គភាពពាក់ព័ន្ធផ្សេងៗទៀត។ កិច្ចប្រជុំនេះមានគោលបំណង ផ្តោតលើការត្រួតពិនិត្យ ពិភាក្សាផ្តល់យោបល់ លើលទ្ធផលបឋម “ គម្រោងសិក្សាសមិទ្ធិលទ្ធភាព និងផែនការមេអភិវឌ្ឍបណ្តាញលូទឹកកខ្វក់ និងលូទឹកភ្លៀងក្នុងក្រុងកំពត ខេត្តកំពត និងក្រុងកែប ខេត្តកែប ” សិក្សាដោយក្រុមហ៊ុនវិស្វកម្មសៀងហៃ (Shanghai Engineering Co., Ltd) សហការជាមួយនាយកដ្ឋានសំណង់ប្រព័ន្ឋចម្រោះទឹកកខ្វក់ (SMCD/MPWT) នៃអគ្គនាយកដ្ឋានសាធារណការ ក្រសួងសាធារណការ និងដឹកជញ្ជូន ។ ជាលទ្ធផលក្រោយបទបង្ហាញពីតំណាងក្រុមហ៊ុន អង្គប្រជុំបង្ហាញការពេញចិត្តគាំទ្រលើលទ្ធផលការសិក្សាគម្រោង និងស្នើពន្លឿនការសិក្សាផែនការមេបញ្ចប់ ដោយយោងតាមផែនទីប្លង់គោលប្រើប្រាស់ដីក្រុង ចក្ខុវិស័យឆ្នាំ២០៣០ ដើម្បីឈានដល់ការសាងសង់ព្រោះបញ្ហាទឹកកខ្វក់ និងការអភិវឌ្ឍប្រព័ន្ធលូ ស្ថានីយប្រព្រឹត្តកម្មទឹកកខ្វក់ ជាកិច្ចការអាទិភាពខ្ពស់របស់រាជរដ្ឋាភិបាលអណ្ណត្តិទី៦។