រាជធានីភ្នំពេញ៖ ថ្ងៃសុក្រ ១២កើត ខែកត្តិក ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៨ ខែវិច្ឆិកា ឆ្នាំ២០១៩ លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្ដមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយលទ្ធផលរបាយការណ៍លើកទី១ (លេខពិសេស) ស្ដីពីវឌ្ឍនភាពវិស័យភស្តុភារកម្មនៅកម្ពុជា ដោយមានការចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធ អាជ្ញាធរដែនដី ក្រុមហ៊ុនឯកជន និងដៃគូអភិវឌ្ឍន៍ផងដែរ។ សិក្ខាសាលានេះមានគោលបំណង ផ្សព្វផ្សាយលទ្ធផលរបាយការណ៍លើកទី១ ស្ដីពី វឌ្ឍនភាពវិស័យភស្តុភារកម្មនៅកម្ពុជា និងដើម្បីប្រមូលធាតុចូលបន្ថែមទៀត សំដៅឱ្យការរៀបចំរបាយការណ៍លេខពិសេសឱ្យមានខ្លឹមសារគ្រប់ជ្រុងជ្រោយថែមទៀត។ ថ្លែងក្នុងសន្ទរកថាបើក លោកជំទាវបានមានប្រសាសន៍ថា ហេដ្ឋារចនាសម្ព័ន្ធដឹកជញ្ជូន និងកំពង់ផែ ដើរតួយ៉ាងសំខាន់មិនអាចខ្វះបានក្នុងការជំរុញវិស័យភស្ដុភារកម្មឱ្យមានសកម្មភាពផុលផុស និងមានលក្ខណៈប្រកួតប្រជែងនៅក្នុងចំណោមប្រទេសក្នុងតំបន់ និងសកលលោកទាំងមូល។ លោកជំទាវរដ្ឋលេខាធិការបានបន្តថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិត របស់សម្ដេចតេជោនាយករដ្ឋមន្ត្រី ហេដ្ឋារចនាសម្ព័ន្ធដឹកជញ្ជូន និងកំពង់ផែត្រូវបានសាងសង់ ស្ដារ ពង្រីក និងលើកកម្ពស់គុណភាពផ្លូវ ឱ្យស្របតាមស្តង់ដានិងតម្រូវការ និងបានតភ្ជាប់ទៅគ្រប់ច្រកល្ហក និងទៅគ្រប់ប៉ូល និងច្រករបៀងសេដ្ឋកិច្ចសំខាន់ៗទាំងក្នុង និងក្រៅប្រទេស ព្រមទាំងបាន និងបង្កើតច្បាប់នានាទាក់ទងនឹងវិស័យនេះ ជាពិសេសកាត់បន្ថយនីតិវិធីបញ្ជូនឯកសារ ដូចជាការលុបបំបាត់ភ្នាក់ងារកាំសាប និងកាំកុងត្រូលនៅតាមច្រកចេញចូលព្រំដែនជាដើម ដើម្បីសម្រួលដល់សង្វាក់ដឹកជញ្ជូនឱ្យមានប្រសិទ្ធភាព ពោលគឺ ចំណេញពេលវេលា ចំណាយតិច និងសេវាកម្មមានភាពទុកចិត្តបាន។ លោកជំទាវរដ្ឋលេខាធិការ បានសង្កត់ធ្ងន់ថា ប្រទេសមានសុខសន្តិភាព ស្ថេរភាពនយោបាយ និងសណ្ដាប់ធ្នាប់សង្គមពេញលេញ គឺជាចលករជំរុញឱ្យមានការអភិវឌ្ឍលើគ្រប់វិស័យ ដែលជាលទ្ធផលកម្ពុជាសម្រេចបាននូវកំណើនសេដ្ឋកិច្ចប្រចាំឆ្នាំជាមធ្យមក្នុងរង្វង់ ៧%។ លោកជំទាវរដ្ឋលេខាធិការ បានផ្ដាំផ្ញើឱ្យសិក្ខាកាមទាំងអស់ ដែលមកពីគ្រប់ស្ថាប័នពាក់ព័ន្ធយកចិត្តទុកដាក់ ចូលរួមជាសំណួរ និងផ្ដល់ជាយោបល់ឱ្យបានផុលផុស ព្រោះថាព័ត៌មានទាំងនោះគឺជាធាតុចូលយ៉ាងសំខាន់ក្នុងការរៀបចំរបាយការណ៍មួយឱ្យមានខ្លឹមសារគ្រប់ជ្រុងជ្រោយ។ ជាមួយគ្នានោះដែរ ថ្លែងក្នុងពិធីបិទសិក្ខាសាលា លោកជំទាវ តុង ផល្លី អនុរដ្ឋលេខាធិការ បានសំដែងនូវការកោតសរសើរខ្ពស់ចំពោះការបង្កើតឱ្យមានសិក្ខាសាលានេះឡើង ព្រោះថាវាបានផ្ដល់ចំណេះដឹងទាក់ទងនឹងវិស័យភស្តុភារកម្ម យល់ដឹងពីបញ្ហាប្រឈម បង្កើតគំនិតផ្ដួចផ្ដើមក្នុងការកែលម្អ សំដៅជំរុញសេដ្ឋកិច្ចជាតិឱ្យកាន់តែរឹងមាំជាងនេះថែមទៀត៕