ភ្នំពេញ៖ ឯកឧត្តម សួង ហេង រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានឱ្យដឹងថា គម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេចវឌ្ឍនភាពជិត ៨០ ភាគរយហើយ ខណៈក្រុមការងារកំពុងពន្លឿនការងារសាងសង់ ដើម្បីឱ្យសម្រេចតាមផែនការដែលបានគ្រោងទុក។ ក្នុងឱកាសចុះពិនិត្យ និងតាមដានការអនុវត្តគម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) ឯកឧត្តម សួង ហេង បានឱ្យដឹងថា គិតត្រឹមដើមខែកក្កដា ឆ្នាំ២០២៦នេះ គម្រោងនេះសម្រេចវឌ្ឍនភាពបាន ៧៩ ភាគរយហើយ បន្ទាប់ពីបានបើកការដ្ឋានសាងសង់កាលពីថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ឯកឧត្តម បានវាយតម្លៃខ្ពស់ចំពោះក្រុមហ៊ុនសំណង់សៀងហៃ ដែលបាន និងកំពុងអនុវត្តការងារសាងសង់ដោយគោរពតាមបទដ្ឋានបច្ចេកទេស និងលក្ខខណ្ឌកិច្ចសន្យា ប្រកបដោយគុណភាព និងសោភ័ណភាព។ ជាមួយគ្នានេះ អង្គភាពគ្រប់គ្រងគម្រោង បានបន្តពង្រឹងវិធានការសុវត្ថិភាពការងារ ដោយសារតែរដូវវស្សាចាប់ផ្តើមចូលមកដល់ និងកម្រិតទឹកទន្លេកើនឡើង។ ក្រុមការងារក៏បន្តថែទាំ និងបំពាក់បន្ថែមពោងសុវត្ថិភាពនៅលើផ្ទៃទឹក ដើម្បីធានាសុវត្ថិភាពដល់អ្នកប្រើប្រាស់មធ្យោបាយដឹកជញ្ជូនតាមផ្លូវទឹក។ ឯកឧត្តម ក៏បានណែនាំឱ្យពិនិត្យបន្ថែមលើផ្ទៃកម្រាលផ្លូវបេតុង ដើម្បីបង្កើនភាពកកិត និងជៀសវាងការរអិល ឬគ្រោះថ្នាក់ដល់អ្នកធ្វើដំណើរ ព្រមទាំងសិក្សាបន្ថែមលើប្រព័ន្ធភ្លើងបំភ្លឺឱ្យមានពន្លឺគ្រប់គ្រាន់ រួមទាំងការរៀបចំសួននៅរង្វង់មូលទាំងសងខាង និងលើស្ពាន ដើម្បីលើកកម្ពស់សោភ័ណភាពឱ្យកាន់តែប្រសើរឡើង។ សូមជម្រាបថា វឌ្ឍនភាពការងាររបស់គម្រោងរួមមាន៖ ១. ផ្នែកគ្រឹះស្ពាន សម្រេចបាន ១០០ ភាគរយ។ ២. រចនាសម្ព័ន្ធក្រោមស្ពាន សម្រេចបាន ១០០ ភាគរយ។ ៣. រចនាសម្ព័ន្ធលើនៃស្ពានតភ្ជាប់ សម្រេចបាន ១០០ ភាគរយ។ ៤. រចនាសម្ព័ន្ធលើនៃស្ពានមេ សម្រេចបាន ៨៤ ភាគរយ។ ៥. បណ្តាញផ្លូវ សម្រេចបាន ៥១ ភាគរយ ក្នុងនោះផ្លូវតភ្ជាប់ប្រវែង ៨០៤,៣០ ម៉ែត្រ សម្រេចបាន ៥០ ភាគរយ និងផ្លូវបង្វែរទិស (Ramp) ប្រវែង ១.៥៤១ ម៉ែត្រ សម្រេចបាន ៥០ ភាគរយ។ សូមបញ្ជាក់ថា ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) គឺជាស្ពានទី៧ តាមដងទន្លេបាសាក់ បន្ទាប់ពីស្ពានដែលបានសាងសង់រួចចំនួន៦ រួមមាន ស្ពានឆ្លងកោះពេជ្រ-កោះនរា ស្ពានព្រះមុនីវង្សទាំង២ ស្ពានសំរោង ស្ពានកោះអន្លង់ចិន និងស្ពានកោះធំ៕