ភ្នំពេញ ៖ ក្រសួងសាធារណការ និងដឹកជញ្ជូន នៅព្រឹកថ្ងៃទី១៤ ខែមិថុនា ឆ្នាំ២០១៩នេះ បានដាក់តាំងបង្ហាញ ប្រព័ន្ធបច្ចេកវិទ្យាព័ត៌មាន Mobile App ក្នុងពិព័រណ៍ការងារលើកទី២ ដែលរៀបចំឡើង ដោយសាកលវិទ្យាល័យភូមិន្ទភ្នំពេញ ក្នុងគោលបំណង ដើម្បីផ្សព្វផ្សាយលើកកម្ពស់ សុវត្ថិភាពចរាចរណ៍ តាមរយៈកម្មវិធីបច្ចេកវិទ្យា ព័ត៌មាន និងចែករំលែកចំណេះដឹង ទូលំទូលាយ ដល់សិស្ស-និស្សិត មកពីបណ្តាសាកលវិទ្យាល័យនានា ។ ការដាក់តាំងបង្ហាញ ប្រព័ន្ធបច្ចេកវិទ្យាសំខាន់ៗ មានដូចជា កម្មវិធីយល់ដឹងអំពីទ្រឹស្តី នៃការបើកបរ (Cambodia Driving Rules) កម្មវិធីថែទាំផ្លូវ (ROAD CARE Mobile App) និងកម្មវិធីព័ត៌មានសាធារណការ និងដឹកជញ្ជូន (MPWT News) បានរៀបចំដោយ មណ្ឌលផ្តល់ប្រឹក្សាយោបល់ លើសេវាសាធារណៈ របស់ក្រសួងសាធារណការ ដែលកំពុងដើរតួនាទីយ៉ាងសំខាន់ ក្នុងការចូលរួមចំណែក ផ្តល់ព័ត៌មាន និងដោះស្រាយបញ្ហាកង្វល់ របស់ប្រជាពលរដ្ឋ ក្នុងការផ្តល់សេវាសាធារណៈ។ សូមរំលឹកថា ការដាក់តាំងបង្ហាញនូវកម្មវិធី Mobile App របស់ក្រសួង ក្នុងពិព័រណ៍ការងារ លើកទី២នេះ បានទទួលការចាប់អារម្មណ៍ពីសំណាក់ សិស្ស-និស្សិត និងសាធារណជនទូទៅ ដែលអាច ផ្តល់ចំណេះដឹងនានា អំពីច្បាប់ចរាចរណ៍ផ្លូវគោក ទទួលបានព័ត៌មានទូទៅក្នុងវិស័យសាធារណការ និងដឹកជញ្ជូន និងរបៀបប្រើប្រាស់កម្មវិធីរាយការណ៍ពីផ្លូវខូច (គ្រលុកសំបុកមាន់) ដើម្បីធ្វើការ ជួសជុលបានទាន់ពេលវេលា ព្រមទាំងទទួលបានរង្វាន់មួកសុវត្ថិភាព ពីការលេងល្បែងកំសាន្ត យ៉ាងសប្បាយរីករាយ ៕ ដោយ ៖ អេង ប៊ូឆេង