ភ្នំពេញៈ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន កាលថ្ងៃទី៦ ខែមីនា ឆ្នាំ២០១៩ បានបើកកិច្ចប្រជុំពិភាក្សាត្រៀមរៀបចំកិច្ចប្រជុំលើកទី៧ នៃគណៈកម្មាធិការរួមការងារឆ្លងកាត់ព្រំដែន ក្របខ័ណ្ឌមហាអនុតំបន់មេគង្គ នាទីស្ដីការក្រសួងសាធារណការ។ កិច្ចប្រជុំនេះ មានគោលបំណងពិនិត្យវឌ្ឍនភាព នៃការត្រៀមរៀបចំរបស់គណៈកម្មការ និងអនុគណៈកម្មការនីមួយៗ ព្រមទាំងពិភាក្សា និងបំពេញបន្ថែមលើចំណុចខ្វះខាតមួយចំនួន សំដៅឲ្យការរៀបចំកិច្ចប្រជុំនេះ ប្រព្រឹត្តទៅប្រកបដោយភាពរលូន និងទទួលបានលទ្ធផលជាផែ្លផ្កាខ្ពស់។ ថ្លែងនៅក្នុងអង្គពិធីទាំងមូល រដ្ឋមន្ដ្រីសាធារណការ ក៏បានផ្ដាំផ្ញើឲ្យមន្ត្រីទទួលបន្ទុកតាមគណៈកម្មការ និងអនុគណៈកម្មការទាំងអស់ យកចិត្តទុកដាក់បំពេញការងាររបស់ខ្លួនប្រកបដោយទំនួលខុសត្រូវខ្ពស់ និងប្រកាន់យកឥរិយាបទថ្លៃថ្នូរ ក្នុងនាមតំណាងឲ្យកម្ពុជាទាំងមូល។ ជាមួយគ្នានេះផងដែរ លោករដ្ឋមន្ត្រី ក៏បានសម្តែងការកោតសរសើរខ្ពស់ ចំពោះការរៀបចំតាមផ្នែក និងតាមដំណាក់នីមួយៗប្រកបដោយភាពច្នៃប្រឌិតរបស់គណៈកម្មការ និងអនុគណៈកម្មការនីមួយៗ។ សូមរំលឹកថា កិច្ចប្រជុំលើកទី៧ នៃគណៈកម្មាធិការរួមការងារឆ្លងកាត់ដែន ក្របខ័ណ្ឌមហាអនុតំបន់មេគង្គ នឹងប្រព្រឹត្តទៅនៅលើទឹកដីខេត្តសៀមរាប ចាប់ពីថ្ងៃទី១២ ដល់១៣ ខែមីនា ឆ្នាំ២០១៩ ខាងមុខនេះ ដោយមានការចូលរួមពីប្រទេសកម្ពុជា, ថៃ ,មីយ៉ាន់ម៉ា ,វៀតណាម និងឡាវ ព្រមទាំងធនាគារអភិវឌ្ឍន៍អាស៊ី អង្គការ GIZ និង អង្គការ DEFAT