ភ្នំពេញៈ នាពេលបច្ចុប្បន្ន សាលារាជធានីភ្នំពេញ បានយកចិត្តទុកដាក់ពីបញ្ហាការខូចខាតផ្លូវ ការកកស្ទះចរាចរណ៍ និងរៀបចំសណ្ដាប់ធ្នាប់ នៅតាមបណ្ដាមហាវិថីតូចធំ និងផ្លូវតូចៗមួយចំនួនធំ ក្នុងមូលដ្ឋានទាំង១២ខណ្ឌ ដើម្បីកាត់បន្ថយការកកស្ទះចរាចរណ៍ផងដែរ។ ជាក់ស្ដែង នៅព្រឹកថ្ងៃទី២៧ ខែធ្នូ ឆ្នាំ២០១៨ តាមបណ្ដោយផ្លូវជុំវិញរង្វង់មូលវត្តភ្នំ ក្នុងមូលដ្ឋានសង្កាត់វត្តភ្នំ ខណ្ឌដូនពេញ ដែលកន្លងមកផ្លូវ មួយកំណាត់នេះ ក្រលុកខូច(សំបុកមាន់) បង្កឲ្យបងប្អូនប្រជាពលរដ្ឋ ធ្វើដំណើរឆ្លងកាត់បណ្ដោយផ្លូវនេះ លំបាកក្នុងការធ្វើដំណើរ ចរាចរណ៍ទាំងព្រឹក ទាំងល្ងាចតែម្ដង។ ដូចនេះរដ្ឋបាលសាលារាជធានីភ្នំពេញ បានបន្តជួសជុល និងអ៊ុតកៅស៊ូនៅផ្លូវជុំវិញរង្វ់ងមូលវត្តភ្នំ ដោយជង្ហុក គ្រលុក ដីស្អុយ កាយចេញដាក់ខ្សាច់ ហើយផ្លូវអត់ខូច អ៊ុតកៅស៊ូពីលើ កម្រាស់៥ហ៊ុន បន្ថែម ដើម្បីដាក់ជូនបងប្អូនប្រជាពលរដ្ឋធ្វើដំណើរងាយស្រួល មិនបង្កការកកស្ទះ និងជង្ហុក លំបាកដូចពេលកន្លងមក។ ជាចុងក្រោយ អាជ្ញាធសូមអំពាវនាវដល់បងប្អូនប្រជាពលរដ្ឋ រស់នៅសងខាងផ្លូវ១ខ្សែនេះ ចូលរួមសហការជាមួយអាជ្ញាធ កុំបានផ្លូវធំទូលាយ ដាក់តាំងលក់លើចិញ្ជើមផ្លូវលើសពី១ភាគ៣ បន្តទៀត ដើម្បីកាត់បន្ថយការកកស្ទះទៀត និងលើកសោរភណ្ឌភាពទៅក្រុងផងដែរ៕