កិច្ចប្រជុំត្រួតពិនិត្យវឌ្ឍនភាពការងារ និងត្រៀមលក្ខណៈដាក់ឱ្យប្រើប្រាស់ជាផ្លូវការប្រព័ន្ធវិក្កយបត្រឌីជីថល (MPWT Digital Invoice) សម្រាប់ទូទាត់សេវាសាធារណៈ ដែលមិនទាន់មានក្នុងប្រព័ន្ធស្វ័យប្រវត្តិកម្ម របស់ក្រសួងសាធារណការ និងដឹកជញ្ជូន និងមុខងារការដាក់ពាក្យស្នើសុំបន្តសុពលភាពត្រួតពិនិត្យលក្ខណៈបច្ចេកទេសយានជំនិះ(ឆៀក) តាមធនាគារដៃគូ ទីស្ដីការក្រសួង៖ នារសៀលថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ ឯកឧត្តម នឹម សុធា អនុរដ្ឋលេខាធិការ ក្រសួងសាធារណការ និងដឹកជញ្ជូន អញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារ និងត្រៀមលក្ខណៈដាក់ឱ្យប្រើប្រាស់ជាផ្លូវការប្រព័ន្ធវិក្កយបត្រឌីជីថល (MPWT Digital Invoice) សម្រាប់ទូទាត់សេវាសាធារណៈ ដែលមិនទាន់មានក្នុងប្រព័ន្ធស្វ័យប្រវត្តិកម្ម របស់ក្រសួងសាធារណការ និងដឹកជញ្ជូន និងមុខងារការដាក់ពាក្យស្នើសុំបន្តសុពលភាពត្រួតពិនិត្យលក្ខណៈបច្ចេកទេសយានជំនិះ(ឆៀក) តាមធនាគារដៃគូ ដោយមានការចូលរួមពីឯកឧត្តមអគ្គនាយក លោក-លោកស្រី អគ្គនាយករង ប្រធាននាយកដ្ឋាន អនុប្រធាននាយកដ្ឋាន តំណាងអគ្គនាយកដ្ឋានពាក់ព័ន្ធ និងមន្ត្រីជំនាញបច្ចេកទេស។ កិច្ចប្រជុំនេះរៀបចំឡើងក្នុងគោលបំណង ដើម្បីពិនិត្យវឌ្ឍនភាពលើរបាយការណ៍លទ្ធផលនៃការអភិវឌ្ឍប្រព័ន្ធវិក្កយបត្រឌីជីថល (MPWT Digital Invoice) សម្រាប់សេវាសាធារណៈរបស់ក្រសួង ព្រមទាំងពិនិត្យវឌ្ឍនភាពមុខងារការដាក់ពាក្យស្នើសុំបន្តសុពលភាពត្រួតពិនិត្យលក្ខណ:បច្ចេកទេសយានជំនិះ(ឆៀក) តាមធនាគារដៃគូ ដើម្បីគាំទ្រការផ្ដល់សេវាសាធារណៈឱ្យកាន់តែមានប្រសិទ្ធភាព ស្របតាមគោលនយោបាយរបស់រាជរដ្ឋាភិបាល ក្នុងការជំរុញការធ្វើឌីជីថលូបនីយកម្ម ការប្រមូលចំណូលពីសេវាសាធារណៈ និងការប្រើប្រាស់ប្រព័ន្ធបច្ចេកវិទ្យាដែលមានភាពងាយស្រួល តម្លាភាព និងប្រសិទ្ធភាពខ្ពស់ ដើម្បីពង្រឹងគុណភាព និងពង្រីកវិសាលភាពនៃការផ្ដល់សេវាជូនប្រជាពលរដ្ឋឱ្យកាន់តែល្អប្រសើរ។ ក្នុងឱកាសនោះ ឯកឧត្តមអនុរដ្ឋលេខាធិការ ប្រធានអង្គប្រជុំ បានសម្ដែងសេចក្ដីសោមនស្សរីករាយ និងកោតសរសើរយ៉ាងខ្លាំងចំពោះក្រុមការងារបច្ចេកទេស នៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ និងអគ្គនាយកដ្ឋានពាក់ព័ន្ធ ដែលបានខិតខំប្រឹងប្រែងសហការលើការអភិវឌ្ឍ "ប្រព័ន្ធវិក្កយបត្រឌីជីថល (MPWT Digital Invoice)" និងមុខងារការដាក់ពាក្យស្នើសុំបន្តសុពលភាពត្រួតពិនិត្យលក្ខណ:បច្ចេកទេសយានជំនិះ(ឆៀក) តាមធនាគារដៃគូ សម្រាប់សេវាសាធារណៈនេះឡើង រហូតសម្រេចលទ្ធផលការងារតាមការគ្រោងទុក ព្រមទាំងបានណែនាំឱ្យបន្តនីតិវិធីស្នើសុំគោលការណ៍ថ្នាក់ដឹកនាំក្រសួង ពិនិត្យ និងដាក់ដំណើរការប្រើប្រាស់ជាផ្លូវការ ក្នុងពេលឆាប់ៗខាងមុខនេះផងដែរ៕