កាលពីថ្ងៃទី ០៨ ខែកក្កដា ឆ្នាំ២០២៦ មន្ត្រីបច្ចេកទេសនៃក្រសួងសាធារណការ និងដឹកជញ្ជូន សហការជាមួយមន្ត្រីតំណាងរដ្ឋបាលរាជធានីភ្នំពេញ និងក្រុមការងារបច្ចេកទេសនៃអង្គការចៃកា (JICA) របស់ប្រទេសជប៉ុន បានរួមគ្នារៀបចំសិក្ខាសាលាមួយ ដើម្បីបង្ហាញពីលទ្ធផលនៃការសិក្សាស្រាវជ្រាវគម្រោងកន្លងមក ព្រមទាំងបានដាក់បង្ហាញប្លង់គំរូជាផ្លូវការនៃស្ពានឆ្លងកាត់ទន្លេមេគង្គថ្មី។ ផ្អែកតាមគម្រោង ស្ពានយុទ្ធសាស្ត្រថ្មីនេះ នឹងត្រូវស្ថាបនាតភ្ជាប់ពីតំបន់ផ្លូវជាតិលេខ១ ឆ្លងកាត់ទន្លេមេគង្គ តម្រង់ទៅកាន់តំបន់ក្តីតាកុយ-អរិយក្សត្រ ដោយសាងសង់ឡើងក្រោមជំនួយឧបត្ថម្ភថវិកាពីរដ្ឋាភិបាលនៃប្រទេសជប៉ុន។ បន្ថែមលើការកសាងស្ពានថ្មីនេះ ភាគីជប៉ុនក៏នឹងជួយជួសជុល និងកែលម្អសោភ័ណភាព ក៏ដូចជាគុណភាពនៃកំណាត់ផ្លូវជាតិលេខ១ ចាប់តាំងពីគល់ស្ពានព្រះមុនីវង្ស រហូតទៅដល់ស្ពានត្សឹបាសា (ស្ពានអ្នកលឿង) ផងដែរ។ គួររំលឹកផងដែរថា គម្រោងសាងសង់ស្ពានឆ្លងកាត់ទន្លេមេគង្គថ្មីមួយនេះ ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ធ្វើការស្នើសុំទៅកាន់ភាគីរដ្ឋាភិបាលជប៉ុនតាំងពីឆ្នាំ២០២៣ មកម៉្លេះ។ សម្តេចធិបតី តែងតែចាត់ទុកប្រទេសជប៉ុនថាជាមិត្តដ៏មានសារៈសំខាន់បំផុត និងជាដៃគូអភិវឌ្ឍន៍ដ៏ស្មោះត្រង់ ដែលបានរួមចំណែកយ៉ាងធំធេងក្នុងការជួយស្តារ និងកសាងប្រព័ន្ធហេដ្ឋារចនាសម្ព័ន្ធ ផ្លូវថ្នល់ និងស្ពានយុទ្ធសាស្ត្រនៅក្នុងប្រទេសកម្ពុជា តាំងពីអតីតកាល បច្ចុប្បន្ន ក៏ដូចជាសម្រាប់ទៅថ្ងៃអនាគត។