រដ្ឋសភា គ្រោងនឹងអនុម័តប្រញាប់ វិសោធនកម្មច្បាប់ផ្លូវថ្នល់ ១៥មាត្រា ដើម្បីសម្រួលដល់អ្នកប្រើប្រាស់ផ្លូវឱ្យកាន់តែមានសុវត្ថិភាពខ្ពស់ កាត់បន្ថយគ្រោះថ្នាក់ចរាចរណ៍ និងធានាបាននូវចីរភាព និងគុណភាពនៃហេដ្ឋារចនាសម្ព័ន្ធផ្លូវថ្នល់។ វិសោធនកម្មច្បាប់ផ្លូវថ្នល់នេះ ក៏នឹងជួយកាត់បន្ថយចំណាយប្រតិបត្តិការដឹកជញ្ជូន និងថ្លៃដើមឡូជីស្ទិកផងដែរ។បើតាមចុះផ្សាយរបស់រដ្ឋសភាកម្ពុជា ការសម្រេចនេះធ្វើឡើងក្នុងកិច្ចប្រជុំរវាង អន្តរគណៈកម្មការជំនាញទាំង១០ នៃរដ្ឋសភាកម្ពុជា ជាមួយតំណាងរាជរដ្ឋាភិបាល នៅថ្ងៃទី១១ ខែមិថុនានេះ។ កិច្ចប្រជុំនេះដឹកនាំដោយលោក លោកស្រី និន សាផុន ប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា ខណៈភាគីរដ្ឋាភិបាល ដឹកនាំការពារសេចក្តីព្រាងច្បាប់ដោយ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន។ រដ្ឋសភាកម្ពុជា បានគូសបញ្ជាក់ថា យន្តការគតិយុត្តិថ្មីនេះ ត្រូវបានរៀបចំឡើងក្នុងទម្រង់ជាច្បាប់ ដែលត្រូវប្រកាសប្រើប្រាស់ជាការប្រញាប់ ដើម្បីឆ្លើយតបទៅនឹងការវិវត្តនៃសេដ្ឋកិច្ចជាតិ និន្នាការបច្ចេកវិទ្យាយានយន្តទំនើប ព្រមទាំងឆ្លើយតបនឹងយន្តការកំណែទម្រង់រចនាសម្ព័ន្ធវិស័យដឹកជញ្ជូននិងឡូជីស្ទិកនៅកម្ពុជា ឱ្យកាន់តែមានសមត្ថភាពប្រកួតប្រជែងខ្ពស់។ សេចក្តីព្រាងច្បាប់ ស្តីពីវិសោធនកម្មច្បាប់ផ្លូវថ្នល់នេះ ត្រូវបានធ្វើឡើងតាមសំណើបន្ទាន់របស់សម្តេច ហ៊ុន ម៉ាណែត នាយករដ្ឋមន្ត្រីកម្ពុជា ដែលបានដាក់លិខិតស្នើសុំទៅ សម្តេច ឃួន សុដារី ប្រធានរដ្ឋសភា កាលពីថ្ងៃទី៨ ខែមិថុនា ឆ្នាំ២០២៦ ថ្មីៗនេះ។ រដ្ឋសភាកម្ពុជា ឱ្យដឹងដូច្នេះ រួចបន្ថែមថា៖ «ការសម្រេចចិត្តធ្វើវិសោធនកម្មច្បាប់នេះ គឺដោយសារតែរាជរដ្ឋាភិបាលបានពិនិត្យឃើញថា បទប្បញ្ញត្តិមួយចំនួននៃច្បាប់ចាស់ មិនទាន់មានភាពគ្រប់ជ្រុងជ្រោយ និងមិនទាន់អាចឆ្លើយតបបានទាន់ពេលវេលា ចំពោះសភាពការណ៍សេដ្ឋកិច្ច និងសង្គម ទាំងក្នុងកម្រិតជាតិ តំបន់ និងសកលលោក។»។