ជប៉ុនជួយបច្ចេកទេស! ភ្លើងស្តុបថ្មី ២៤ទីតាំង និងសញ្ញាចរាចរណ៍ដាស់ស្មារតីអ្នកបើកបរ ត្រូវបានបំពាក់បន្ថែមលើដងផ្លូវជាតិលេខ៥ — ភ្លើងស្តុបថ្មីចំនួន ២៤ទីតាំង និងសញ្ញាចរាចរណ៍ ដើម្បីដាស់ស្មារតីអ្នកបើកបរ ត្រូវបានបំពាក់បន្ថែមលើដងផ្លូវជាតិលេខ៥ ក្នុងន័យគិតគូរពីសុវត្ថិភាពប្រជាពលរដ្ឋតាមដងផ្លូវ ។ នេះបើតាមការឱ្យដឹងពីអ្នកនាំពាក្យក្រសួងសាធារណការ និងដឹកជញ្ជូន ឯកឧត្តម ផន រឹម។ ឯកឧត្តមបានឱ្យដឹងថា នៅព្រឹកថ្ងៃទី១០ ខែមិថុនា ឆ្នាំ២០២៦ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកកម្ពុជា បានចុះពិនិត្យសកម្មភាពដំឡើងបរិក្ខាសុវត្ថិភាពចរាចរណ៍បន្ថែមលើដងផ្លូវជាតិលេខ៥ (ចំណុចសាលាលេខ៥) រួមមាន៖ ភ្លើងសញ្ញាដាស់តឿនអ្នកបើកបរ, គំនូសសញ្ញាចរាចរណ៍ និងផ្លាកសញ្ញាចរាចរណ៍ ដើម្បីដាស់ស្មារតីអ្នកបើកបរឱ្យគិតគូរពីសុវត្ថិភាពលើដងផ្លូវ។ សម្ភារៈទាំងនោះបានដឹកទៅកាន់ទីតាំងដំឡើង ដោយបំពាក់តាមទីតាំងកំណត់ ដែលមានការសិក្សាត្រឹមត្រូវច្បាស់លាស់ ពីក្រុមការងារបច្ចេកទេសក្រសួងសាធារណការ និងដឹកជញ្ជូន និងភាគីមិត្តជប៉ុន។ គួរបញ្ជាក់ថា ភ្លើងស្តុបថ្មីចំនួន២៤ទីតាំង ត្រូវដាក់ពង្រាយតាមបណ្តោយផ្លូវជាតិលេខ៥(កំពង់ឆ្នាំង,ពោធិ៍សាត់,បាត់ដំបង និងបន្ទាយមានជ័យ)រួមទាំងបរិក្ខាសុវត្ថិភាពចរាចរណ៍ដទៃទៀតដើម្បីសម្រួលដល់ការធ្វើចរាចរណ៍ និងបញ្ចៀសគ្រោះថ្នាក់ចរាចរណ៍ជាយថាហេតុ៕