កិច្ចប្រជុំពិនិត្យ និងពិភាក្សាលើរូបមន្ត នៃការគណនាថ្លៃដឹកជញ្ជូនទំនិញផ្លូវគោក សមាមាត្រនឹងការប្រែប្រួលតម្លៃប្រេងឥន្ធនៈ ទីស្តីការក្រសួង៖ នាថ្ងៃទី៨ ខែមិថុនា ឆ្នាំ២០២៦ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំ ស្ដីពីការពិនិត្យ និងពិភាក្សាលើរូបមន្ត នៃការគណនាថ្លៃដឹកជញ្ជូនទំនិញផ្លូវគោក សមាមាត្រនឹងការប្រែប្រួលតម្លៃប្រេងឥន្ធនៈ ដោយមានការអញ្ជើញចូលរួមពីឯកឧត្តម លោកជំទាវអនុរដ្ឋលេខាធិការ លោកជំទាវអគ្គនាយកភស្ដុភារកម្ម ឯកឧត្តមអគ្គនាយកដឹកជញ្ជូនផ្លូវគោក តំណាងកំពង់ផែស្វយ័តភ្នំពេញ តំណាងសមាគមដឹកជញ្ជូនទំនិញផ្លូវគោកកម្ពុជា (CAMTA) តំណាងសមាគមភស្តុភារកម្មកម្ពុជា (CLA) តំណាងសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា (LOSCBA) និងក្រុមហ៊ុនឯកជន ដែលជាប្រតិបត្តិករដឹកជញ្ជូនផ្លូវគោកផងដែរ។ កិច្ចប្រជុំនេះត្រូវបានរៀបចំឡើងក្នុងគោលបំណង ដើម្បីជាឱកាសឱ្យក្រុមហ៊ុនឯកជន និងស្ថាប័នរដ្ឋ បានជួបពិនិត្យ និងពិភាក្សារួមគ្នា ដើម្បីស្វែងរកដំណោះស្រាយ ដែលមានប្រសិទ្ធភាព និងតម្លាភាព ដែលអាចឆ្លើយតបនឹងការប្រែប្រួលនៃតម្លៃប្រេងឥន្ធនៈជាក់ស្តែង៕