លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានគូសបញ្ជាក់ថា ក្រសួងនឹងរៀបចំនូវប្រព័ន្ធសេនសឺរ (Sensor Systems )ដើម្បីបំពាក់ទៅលើរថយន្តធុនធំ ទាំងរថយន្តទេសចរណ៍ និងរថយន្តដឹកទំនិញ ដើម្បីកុំឱ្យពួកគេបើកបរលើសល្បឿនកំណត់។ ប្រសិនបើពួកគេបើកបរលើសល្បឿន នោះ ប្រព័ន្ធនេះនឹងលោតប្រាប់ ដូច្នេះក្រុមហ៊ុនផ្ទាល់អាចនឹងមានវិធានការផ្ទាល់ជាមួយអ្នកបើកបរ។ លោករដ្ឋមន្រ្តីបានបញ្ជាក់បន្ថែមថា គម្រោងនៃការបំពាក់នូវប្រព័ន្ធសេនសឺរខាងលើនេះ ទាំងក្រុមហ៊ុនដឹកជញ្ជូន និងក្រុមហ៊ុនដឹកអ្នកដំណើរក៏បានឯកភាពជាគោលការណ៍ផងដែរ ហើយក្រសួងក៏កំពុងតែពិនិត្យមើលទៅលើបច្ចេកវិទ្យា ដើម្បីឱ្យសមស្របជាមួយនឹងស្ថានភាពនៃការដឹកជញ្ជូន ដែលលោកនឹងជំរុញកិច្ចការនេះឱ្យបានលឿន។ លោកបន្ថែមថា ជាអាទិភាពគឺផ្តោតលើក្រុមហ៊ុនដឹកជញ្ជូនធំៗសិន ដើម្បីពិនិត្យមើលថាការបំពាក់នេះមានប្រសិទ្ធភាពកម្រិតណា មុននឹងបន្តជំរុញបំពាក់រថយន្តផ្សេងៗ ដូចជារថយន្តដឹកកម្មករនិយោជិតជាដើម។