ផ្លូវជាតិលេខ៨ប្រវែងសរុប ១២៣,៦ គីឡូម៉ែត្រ គឺជាសរសៃឈាមសេដ្ឋកិច្ច បន្ទាប់ពីបញ្ចប់ការស្ដារ ក្នុងគោលដៅពង្រឹងបណ្ដាញដឹកជញ្ជូន និងជំរុញកំណើនសេដ្ឋកិច្ចនៅតំបន់ភូមិភាគឦសាន រាជរដ្ឋាភិបាលកម្ពុជាតាមរយៈក្រសួងសាធារណការ និងដឹកជញ្ជូន បានចាប់ផ្ដើមបោះជំហានសំខាន់ក្នុងគម្រោងស្ដារផ្លូវជាតិលេខ ៨ ឱ្យកាន់តែមានគុណភាពខ្ពស់។ កាលពីថ្ងៃទី០៤ ខែឧសភា ឆ្នាំ២០២៦ ម្សិលមិញនេះ លោក ឈួន វិន រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំប្រកាសសមាសភាពអង្គភាពគ្រប់គ្រងគម្រោង ដើម្បីត្រៀមលក្ខណៈបច្ចេកទេសឱ្យបានហ្មត់ចត់បំផុត។ យោងតាមផែនការ គម្រោងដ៏មានសារៈសំខាន់នេះនឹងត្រូវអនុវត្តក្រោមក្របខណ្ឌហិរញ្ញប្បទានពី ធនាគារវិនិយោគហេដ្ឋារចនាសម្ព័ន្ធអាស៊ី (AIIB)។ ផ្លូវជាតិលេខ ៨ ដែលមានប្រវែងសរុប ១២៣,៦ គីឡូម៉ែត្រ គឺជាសរសៃឈាមសេដ្ឋកិច្ចឆ្លងកាត់ខេត្តចំនួនបីគឺ ខេត្តកណ្ដាល ខេត្តព្រៃវែង និងខេត្តត្បូងឃ្មុំ ដោយចាប់ផ្ដើមពីរង្វង់មូលស្ពានព្រែកតាមាក់ រហូតដល់ចំណុចប្រសព្វផ្លូវជាតិលេខ ៧ ក្នុងស្រុកពញ្ញាក្រែក។ ការសិក្សា និងរៀបចំគម្រោងធ្វើឱ្យប្រសើរឡើងវិញនូវផ្លូវជាតិនេះ នឹងនាំមកនូវអត្ថប្រយោជន៍ជាច្រើនដូចជា៖ធានាបាននូវភាពរឹងមាំ និងសុវត្ថិភាពសម្រាប់ការធ្វើដំណើរ និងដឹកជញ្ជូនទំនិញ បង្កើនសក្ដានុពលនៃការតភ្ជាប់ហេដ្ឋារចនាសម្ព័ន្ធពីតំបន់ក្បែររាជធានីភ្នំពេញ ទៅកាន់តំបន់ភូមិភាគឦសាន។ សម្រួលដល់ការចរាចរផលិតផលកសិកម្ម និងការធ្វើពាណិជ្ជកម្មរបស់ប្រជាពលរដ្ឋក្នុងខេត្តទាំងបី។ ជារួម កិច្ចប្រជុំនាពេលនេះគឺជាសញ្ញាណវិជ្ជមានដែលបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការអភិវឌ្ឍប្រព័ន្ធដឹកជញ្ជូនឱ្យកាន់តែទំនើប និងមានប្រសិទ្ធភាព ដើម្បីបម្រើផលប្រយោជន៍ជូនប្រជាពលរដ្ឋ និងសង្គមជាតិទាំងមូល៕