យានយន្តដឹកជញ្ជូនលើសទម្ងន់ចំនួន ១៦គ្រឿង នៅខេត្តត្បូងឃ្មុំ ព្រៃវែង កណ្តាល និងរាជធានីភ្នំពេញ ត្រូវបានក្រុមចល័តក្រសួង ចុះឆ្មក់ត្រួតពិនិត្យ ត្បូងឃ្មុំ ព្រៃវែង កណ្តាល និងរាជធានីភ្នំពេញ៖ នៅថ្ងៃទី៨ ខែមេសា ឆ្នាំ២០២៦ ក្រោមការចង្អុលបង្ហាញពី ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងជាប្រធានក្រុមការងារត្រួតពិនិត្យចល័តចម្រុះ ព្រមទាំងអនុប្រធាន និងសមាជិកក្រុមការងារចល័តចម្រុះ សហការជាមួយមន្រ្តីស្ថានីយថ្នល់ទទឹង ស្ថានីយអ្នកលឿង ស្ថានីយកំពង់ទួល ស្ថានីយអង្គស្នួល និងស្ថានីយព្រែកហូរ បានចុះត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់នៅ ៥ទីតាំងផ្សេងៗគ្នា ដោយទទួលបានលទ្ធផលដូចខាងក្រោម៖ ១-នៅលើផ្លូវជាតិលេខ១១ គ.មលេខ៧៩ ស្រុកអូររាំងឳ ខេត្តត្បូងឃ្មុំ បានត្រួតពិនិត្យយានយន្តចំនួន ២គ្រឿង លើសទម្ងន់អនុញ្ញាតចន្លោះពី១៩តោន ដល់ ២០តោន គិតជាភាគរយចន្លោះពី៦៦% ដល់ ៧៦%។ ២-នៅលើផ្លូវជាតិលេខ៣១៣ គ.មលេខ០+១០០ ស្រុកកំពង់ត្របែក ខេត្តព្រៃវែង បានត្រួតពិនិត្យយានយន្តចំនួន ២គ្រឿង លើសទម្ងន់អនុញ្ញាតចន្លោះពី៩តោន ដល់ ២៣តោន គិតជាភាគរយចន្លោះពី២២% ដល់ ៥៧%។ ៣-នៅលើផ្លូវជាតិលេខ៣ គ.មលេខ២៤+៧៥០ ស្រុកកណ្តាលស្ទឹង ខេត្តកណ្តាល បានត្រួតពិនិត្យយានយន្តចំនួន ៥គ្រឿង មានពាក់ឡូហ្គូ SSP លើសទម្ងន់អនុញ្ញាតចន្លោះពី៦តោន ដល់ ១០តោន គិតជាភាគរយចន្លោះពី៣៧% ដល់ ៦២%។ ៤-នៅលើផ្លូវជាតិលេខ៣៤ គ.មលេខ៨ ស្រុកកណ្តាលស្ទឹង ខេត្តកណ្តាល បានត្រួតពិនិត្យយានយន្តចំនួន ៣គ្រឿង លើសទម្ងន់អនុញ្ញាតចន្លោះពី៥តោន ដល់ ៩តោន គិតជាភាគរយចន្លោះពី៣១% ដល់ ៥៦%។ ៥-នៅលើផ្លូវជាតិលេខ20A គ.មលេខ១ ខណ្ឌដង្កោ រាជធានីភ្នំពេញ បានត្រួតពិនិត្យយានយន្តចំនួន ៤គ្រឿង មានពាក់ឡូហ្គូ SL, DN, KH លើសទម្ងន់អនុញ្ញាតចន្លោះពី៧តោន ដល់ ១២តោន គិតជាភាគរយចន្លោះពី៤៣% ដល់ ៧៥%។ សរុបលទ្ធផលនៅក្នុងយុទ្ធនាការត្រួតពិនិត្យយានយន្តទាំង ១៦ទីតាំងខាងលើ ក្រុមការងារបានត្រួតពិនិត្យយានយន្តចំនួន ១៦គ្រឿង លើសទម្ងន់កម្រិតកំណត់ទាំង១៦គ្រឿង លើសទម្ងន់អនុញ្ញាតចន្លោះពី ៥តោន ដល់ ២៣តោន គិតជាភាគរយចន្លោះពី២២% ដល់ ៧៦%។ ក្រសួងសាធារណការ និងដឹកជញ្ជូន សូមក្រើនរម្លឹកដល់ម្ចាស់ក្រុមហ៊ុនដឹកជញ្ជូនធុនធ្ងន់ ម្ចាស់យានយន្តដឹកជញ្ជូនធុនធ្ងន់ និងអ្នកបើកបរយានយន្តធុនធ្ងន់ទាំងអស់ សូមចូលរួមគោរពច្បាប់ និងគោរពតម្រាយផ្លូវអនុញ្ញាតសម្រាប់យានយន្តចាប់ពីភ្លៅ៦ឡើង ដែលក្រសួងបានណែនាំឱ្យបានត្រឹមត្រូវ។ ក្រុមការងារចល័តពិសេស នឹងបន្តចុះឆ្មក់ត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅទូទាំងប្រទេស ដើម្បីទប់ស្កាត់ និងចាត់វិធានការរឹតបន្តឹងការអនុវត្តច្បាប់យ៉ាងតឹងរ៉ឹងដោយគ្មានការលើកលែងឡើយ៕