កិច្ចប្រជុំពិនិត្យពិភាក្សា និងផ្លាស់ប្តូរយោបល់លើសេចក្តីព្រាងគោលការណ៍ណែនាំស្តីពី ការវាយតម្លៃផលប៉ះពាល់នៃលិខិតបទដ្ឋានគតិយុត្តសម្រាប់កម្ពុជា រាជធានីភ្នំពេញ៖ នាថ្ងៃព្រហស្បតិ៍ ទី២ ខែមេសា ឆ្នាំ២០២៦ ឯកឧត្តម ប៊ុន សុផាត អនុរដ្ឋលេខាធិការ និងជាអនុប្រធានក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្ត បានដឹកនាំក្រុមការងារជំនាញជួបប្រជុំជាមួយក្រុមការងារជំនាញរបស់ធនាគារអភិវឌ្ឍន៍អាស៊ី។ កិច្ចប្រជុំនេះធ្វើឡើងក្នុងគោលបំណងដើម្បីពិនិត្យ ពិភាក្សា និងផ្លាស់ប្តូរយោបល់លើសេចក្តីព្រាងគោលការណ៍ណែនាំស្តីពីការវាយតម្លៃផលប៉ះពាល់នៃលិខិតបទដ្ឋានគតិយុត្តសម្រាប់កម្ពុជា ដែលរៀបចំដោយធនាគារអភិវឌ្ឍន៍អាស៊ី ដើម្បីធានាថា គោលការណ៍ណែនាំនេះមានភាពគ្រប់ជ្រុងជ្រោយ និងអាចជាគោលការណ៍ណែនាំគំរូមួយដល់ក្រសួងស្ថាប័នសម្រាប់វាយតម្លៃលើផលប៉ះពាល់នៃលិខិតបទដ្ឋានគតិយុត្តស្របតាមបរិបទនៃប្រទេសកម្ពុជា។ ជាមួយគ្នានេះ កិច្ចប្រជុំក៏បានលើកឡើងពីការពិនិត្យ និងបង្កើនកិច្ចសហប្រតិបត្តិការលើការងារមួយចំនួនបន្ថែមទៀតរវាងក្រសួងសាធារណការ និងដឹកជញ្ជូន និងធនាគារអភិវឌ្ឍន៍អាស៊ី លើការរៀបចំការបណ្តុះបណ្តាល ឬសិក្ខាសាលាដល់មន្ត្រីជំនាញ និងបញ្ជ្រាបការយល់ដឹងលើការងារពាក់ព័ន្ធនឹងការវាយតម្លៃលើផលប៉ះពាល់នៃលិខិតបទដ្ឋានគតិយុត្ត៕