កិច្ចប្រជុំដំបូងរបស់ក្រុមលេខាធិការដ្ឋាននៃគណៈកម្មាធិការគ្រប់គ្រងប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈនៃក្រសួងសាធារណការ និងដឹកជញ្ជូន ទីស្តីការក្រសួង៖ នៅព្រឹកថ្ងៃទី២៧ ខែកុម្ភៈ ឆ្នាំ២០២៦ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ និងជាប្រធានក្រុមលេខាធិការដ្ឋាន បានអញ្ជើញដឹកនាំកិច្ចប្រជុំដំបូងរបស់ក្រុមការងារ ដោយមានការចូលរួមពី ឯកឧត្តម លោក លោកស្រីជាអនុប្រធាន និងសមាជិកក្រុមការងារ ដើម្បីពិនិត្យនិងពិភាក្សាលើកិច្ចការសំខាន់ៗពាក់ព័ន្ធនឹងការអនុវត្តការងារគាំទ្រដល់គណៈកម្មាធិការគ្រប់គ្រងប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈនៃក្រសួងសាធារណការ និងដឹកជញ្ជូន។ ថ្លែងនៅក្នុងកិច្ចប្រជុំដំបូងនេះ ឯកឧត្តមប្រធានក្រុមការងារ បានជម្រាបជូនថា ដើម្បីរៀបចំនូវយន្តការការងារស្ថិតក្រោមក្របខណ្ឌនៃប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ ឱ្យមានវឌ្ឍនភាព និងស្របតាមគោលការណ៍ណែនាំរបស់ក្រសួងមុខងារសាធារណៈ ចាំបាច់ណាស់ ក្រុមការងារទាំងអស់ ត្រូវពិនិត្យលើនីតិវិធីដែលបានកំណត់ គោលការណ៍អនុវត្ត ផែនការលើកទឹកចិត្ត និងគោលនយោបាយយុទ្ធសាស្រ្តរបស់ក្រសួង ដើម្បីឱ្យមានភាពបន្ស៊ីជាមួយយន្តការលើកទឹកចិត្តរួមដែលបានកំណត់ និងបញ្ជូនសំណើគម្រោងពាក់ព័ន្ធទៅក្រសួងមុខងារសាធារណៈតាមពេលវេលាកំណត់។ សូមជម្រាបជូនថា រាជរដ្ឋាភិបាល តាមរយៈក្រសួងមុខងារសាធារណៈ បានដាក់ចេញអនុក្រឹត្យស្តីពីប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ ក្នុងន័យជំរុញការបង្កើតឱ្យមានគណៈកម្មាធិការគ្រប់គ្រងប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈនៅតាមបណ្តាក្រសួង ស្ថាប័ន ដើម្បីអនុវត្តការងារនៅតាមវិស័យឱ្យទទួលបានវឌ្ឍនភាពស្របតាមសកម្មភាពអាទិភាពរបស់ក្រសួង និងទិសដៅការងាររបស់រាជរដ្ឋាភិបាល៕